Hechos
9 Abʼan laj Saulo inkʼaʼ naxkanabʼ xsebʼesinkilebʼ li nekeʼtaqenk re li Qaawaʼ ut kiraj xkamsinkilebʼ. Joʼkan naq xkoho rikʼin li xyuwaʼil aj tij 2 ut kixpatzʼ re ebʼ li hu re naq tixkʼut saʼebʼ li naʼaj re loqʼonink re Damasco. Li hu aʼin ttenqʼanq re chi xkʼambʼalebʼ chaq chi bʼakʼbʼo aran Jerusalén yalaq ani li naʼokenk chirix li Xbʼe li Yos aʼ yaal ma winq malaj ixq.
3 Joʼkan bʼiʼ, naq yook chi xik Damasco ut nachʼ wank rikʼin li naʼaj aʼin, maakʼaʼ saʼ xchʼool naq jun li saqenk li kichalk saʼ choxa kisutunk re, 4 ut kitʼaneʼk chiru chʼochʼ ut kirabʼi jun li yaabʼ kuxej li kixye re: «Saulo, Saulo, kʼaʼut xikʼ nikinaawil?». 5 Aʼan kixye re: «Anihat Qaawaʼ?». Ut aʼan kixsume: «Laaʼin li Jesús li xikʼ yookat rilbʼal. 6 Anaqwan waklin ayu saʼ li tenamit ut aran teʼxye aawe li tento taabʼaanu». 7 Ebʼ li winq li yookebʼ chi ochbʼeenink re inkʼaʼ chik xeʼruuk chi aatinak, usta nekeʼrabʼi li yaabʼ kuxej, abʼan maaʼani nekeʼril ru. 8 Laj Saulo kiwakliik, usta teeto li ru abʼan maakʼaʼ naril. Joʼkan naq chʼilonbʼil xeʼxkʼam Damasco. 9 Chiru oxibʼ kutan inkʼaʼ kiruuk chi ilok, inkʼaʼ kiwaʼak chi moko kiʼukʼak.
10 Aran Damasco wank chaq jun li winq li nataqenk re li Jesús, aj Ananías xkʼabʼaʼ, ut li Qaawaʼ kixye re saʼ jun li moy u: «Ananías!». Aʼan kichaqʼok ut kixye re: «Weʼkin Qaawaʼ». 11 Li Qaawaʼ kixye re: «Waklin, ayu saʼ li bʼe li nakʼabʼaʼiik Tiik Ru ut sikʼ chaq saʼ rochoch laj Judas jun li winq re Tarso li nakʼabʼaʼiik Saulo. Li winq aʼin yook chi tijok 12 ut xril saʼ jun li moy u naq jun li winq li nakʼabʼaʼiik Ananías naʼok saʼ li ochoch ut naxkʼe li ruqʼ saʼ xbʼeen re naq t-iloq wiʼ chik». 13 Abʼan laj Ananías kixye re: «Qaawaʼ wabʼihom naq naabʼalebʼ nekeʼaatinak chirix li winq aʼin ut nekeʼxye ajwiʼ chixjunil li maaʼusilal li kixbʼaanu rehebʼ laasantil paabʼanel aran Jerusalén. 14 Ut arin kʼebʼil xwankil xbʼaanebʼ li xbʼeenil laj tij re xkʼebʼalebʼ saʼ tzʼalam chixjunilebʼ li nekeʼtaqenk aawe». 15 Abʼan li Qaawaʼ kixye re: «Ayu xbʼaan naq xinsikʼ ru li winq aʼin re naq tixkʼe chi naweʼk linkʼabʼaʼ rehebʼ li maawaʼebʼ aj judiiy, ebʼ li awabʼej ut ebʼ li ralal xkʼajol li tenamit Israel. 16 Laaʼin tinkʼut chiru chi tzʼaqal re ru chixjunil li rahilal li tixkʼul xbʼaan linkʼabʼaʼ».
17 Joʼkan naq xkoho laj Ananías, kiʼok saʼ li ochoch ut kixkʼe li ruqʼ saʼ xbʼeen ut kixye re: «Saulo, at wiitzʼin, li Qaawaʼ Jesús, li kixkʼut ribʼ chaawu saʼ bʼe naq yookat chi chalk xinxtaqla chaq aawikʼin re naq tat-iloq wiʼ chik ut tatnujaq rikʼin santil musiqʼej». 18 Saʼ junpaat kiʼelk li wank saʼ ru, li chanchan rix kar ut kiʼilok wiʼ chik. Tojaʼ naq kiwakliik ut kikubʼsiik xhaʼ, 19 kiwaʼak ut kikawuuk wiʼ chik.
Chirix chik aʼan kikanaak wiibʼ oxibʼ kutan rikʼinebʼ li nekeʼtaqenk re li Jesús aran Damasco 20 ut saʼ junpaat kiʼok xkʼebʼal chi naweʼk saʼebʼ li naʼaj re loqʼonink naq li Jesús aʼan Ralal li Yos. 21 Abʼan chixjunil li nekeʼabʼink re sachsokebʼ xchʼool nekeʼkanaak ut nekeʼxye: «Ma inkʼaʼ tabʼiʼ aʼin li winq li kirahobʼtesink rehebʼ li nekeʼtaqenk re li Jesús aran Jerusalén? Ma inkʼaʼ xchalk arin re xchapbʼalebʼ ut xkʼambʼalebʼ chiruhebʼ li xbʼeenil aj tij?». 22 Abʼan laj Saulo qʼaxal us yook chaq chi elk saʼ xkʼanjel li Yos, ut ebʼ laj judiiy li wankebʼ Damasco sachsokebʼ xchʼool nekeʼkanaak naq naxchʼolobʼ chi tzʼaqal re ru naq li Jesús aʼan li Kriist.
23 Naq xnumeʼk naabʼal kutan, ebʼ laj judiiy xeʼxkʼubʼ xkamsinkil. 24 Abʼan laj Saulo kixnaw li yookebʼ xkʼubʼankil chirix. Saʼ xkʼabʼaʼ naq yookebʼ xkʼaakʼalenkil rokebʼaal li tenamit chi qʼeq ut chi kutan re xkamsinkil, 25 saʼ jun li qʼoqyink ebʼ li xtzolom xeʼxkʼe saʼ jun li chakach ut xeʼxkubʼsi saʼ xbʼentaanil li xsuttzʼakil li tenamit.
26 Naq kiwulak Jerusalén, laj Saulo kiʼok xkʼebʼal xqʼe re naq t-oq saʼ xyanqebʼ li nekeʼtaqenk re li Jesús, abʼan chixjunilebʼ nekeʼxxuwa ru xbʼaan naq inkʼaʼ nekeʼxpaabʼ naq aʼan jun rehebʼ li nekeʼtaqenk re li Jesús. 27 Joʼkan naq laj Bernabé xkoho xtenqʼankil ut kixkʼam chiruhebʼ li apóstol. Chirix chik aʼan kixchʼolobʼ chiruhebʼ chi tzʼaqal re ru naq laj Saulo kiril saʼ bʼe li Qaawaʼ ut kiʼaatinaak xbʼaan. Ut aran Damasco, laj Saulo kixkʼe chi naweʼk li xkʼabʼaʼ li Jesús chi maakʼaʼ xxiw. 28 Joʼkan naq laj Saulo kikanaak rikʼinebʼ ut naru chi elk ut chi ok saʼ li tenamit Jerusalén ut naxkʼe chi naweʼk li xkʼabʼaʼ li Qaawaʼ chi maakʼaʼ xxiw. 29 Yook chi aatinak ut xchoqinkil ribʼ rikʼinebʼ laj judiiy li nekeʼaatinak saʼ griego re xkolbʼal rix li naxpaabʼ. Ut naabʼal sut xeʼraj xkamsinkil. 30 Naq ebʼ li rechpaabʼanel xeʼxnaw aʼin, xeʼxkʼam Cesarea ut xeʼxtaqla Tarso.
31 Ut chixjunil ebʼ li chʼuut re Judea, Galilea ut Samaria xeʼwank saʼ tuqtuukilal ut xeʼwaklesiik xchʼool. Ut saʼ xkʼabʼaʼ naq yookebʼ roxloqʼinkil li Jehobʼa* ut xkʼojobʼankil xchʼool rikʼin li santil musiqʼej, xeʼok chi tamk.
32 Joʼkan bʼiʼ, saʼ xkʼabʼaʼ naq laj Pedro yook xbʼeninkil chixjunil li teep, kikʼubʼeek ajwiʼ chi rulaʼaninkil ebʼ li santil paabʼanel aran Lida. 33 Aran kiril jun li winq aj Eneas xkʼabʼaʼ, sik ut waqxaqibʼ chihabʼ rokik chiru chʼaat. 34 Laj Pedro kixye re: «Eneas, li Jesukriist yook aakʼirtasinkil. Waklin ut yiibʼ laachʼaat». Saʼ junpaat kiwakliik. 35 Naq xeʼril aʼin chixjunilebʼ li wankebʼ Lida ut Sarón, xeʼok xpaabʼankil li Qaawaʼ.
36 Aran Jope wank chaq jun li ixq li nataqenk re li Jesús, xTabita xkʼabʼaʼ. Chi jalbʼil ru li kʼabʼaʼej aʼin naraj xyeebʼal Dorcas.* Li ixq aʼin chaabʼil chaq xnaʼlebʼ rikʼinebʼ li junchʼol ut qʼaxal naxtenqʼahebʼ li wankebʼ saʼ rajbʼal ru. 37 Abʼan chiruhebʼ li kutan aʼan kiyajerk ut kikamk. Joʼkan naq xeʼxchʼaj ut xeʼxyokobʼ saʼ jun li naʼaj li wank taqeʼq. 38 Joʼkan bʼiʼ, li tenamit Lida wank chixkʼatq li tenamit Jope. Naq ebʼ li nekeʼtaqenk re li Jesús xeʼrabʼi naq laj Pedro wank saʼ li tenamit aʼan, xeʼxtaqla wiibʼ li winq chi xyeebʼal re: «Bʼaanu usilal, kim arin saʼ junpaat». 39 Saʼ junpaat kiwakliik laj Pedro ut xkoho chirixebʼ. Naq kiwulak, xeʼxkʼam saʼ li naʼaj li wank taqeʼq. Ut chixjunilebʼ li malkaʼan yookebʼ chi yaabʼak ut xeʼxkʼut chiru chixjunil li tʼikr li kixyiibʼ li xDorcas naq yoʼyo chaq. 40 Tojaʼ naq laj Pedro kirisi chixjunilebʼ chirix kabʼl, kixwiqʼibʼ ribʼ ut kiʼok chi tijok. Chirix chik aʼin, kixbʼalqʼusi ribʼ, kiril li kamenaq ut kixye re: «Tabita waklin!». Li xTabita kixte saʼ ru ut naq kiril laj Pedro, kichunlaak. 41 Laj Pedro kixchap chi ruqʼ ut kixtenqʼa chi wakliik. Chirix chik aʼan, kixbʼoq ebʼ li santil paabʼanel ut ebʼ li malkaʼan ut kixkʼut chiruhebʼ naq yoʼyo wiʼ chik. 42 Chixjunilebʼ li wankebʼ aran Jope xeʼrabʼi aʼin. Ut naabʼalebʼ xeʼok xpaabʼankil li Qaawaʼ. 43 Laj Pedro toj kikanaak chiru naabʼal kutan aran Jope saʼ rochoch jun li winq aj Simón xkʼabʼaʼ. Li winq aʼin naxkʼanjela li tzʼuum.