Lucas

19 Tojaʼ naq li Jesús kiʼok Jericó ut kinumeʼk saʼ tenamit. 2 Aran wank chaq jun li winq aj Zaqueo xkʼabʼaʼ. Li winq aʼin bʼihom ut aʼan jun rehebʼ li nekeʼxjolomi ebʼ li winq li nekeʼxchʼutubʼ li toj choʼq re li awabʼej. 3 Li winq aʼin yook xkʼebʼal xqʼe chi rilbʼal ani li Jesús. Abʼan saʼ xkʼabʼaʼ naq kʼajoʼ xkʼihal li tenamit ut aʼan kachʼin roq, inkʼaʼ kiruuk rilbʼal. 4 Joʼkan naq, xkoho chiʼubʼej ut kitaqeʼk saʼ xbʼeen jun li nimla cheʼ re rilbʼal li Jesús xbʼaan naq ok re chi numeʼk aran. 5 Naq kiwulak saʼ li naʼaj aʼan, li Jesús kiʼilok taqeʼq ut kixye re: «Zaqueo, kubʼen chaq saʼ junpaat xbʼaan naq saʼ laawochoch tinkanaaq hoon». 6 Saʼ junpaat kikʼubʼeek laj Zaqueo ut chi sa saʼ xchʼool kixkʼul saʼ rochoch. 7 Naq xeʼril aʼin, chixjunilebʼ xeʼok xwechʼbʼal rix: «Xkoho chi kanaak saʼ rochoch jun laj maak». 8 Abʼan laj Zaqueo kiwakliik ut kixye re li Qaawaʼ: «Il Qaawaʼ, tinkʼe xyiijachil linjunkabʼlal rehebʼ li nebʼaʼ. Ut chixjunil li xwelqʼa rehebʼ li junchʼol naq xinbʼalaqʼihebʼ, kaahibʼ sut xkʼihal naq tinqʼajtesi rehebʼ». 9 Tojaʼ naq li Jesús kixye re: «Saʼ li kutan aʼin li Yos kixkol li winq aʼin ut li xjunkabʼal xbʼaan naq ralal ajwiʼ laj Abrahán. 10 Xbʼaan naq li Ralal li Winq kichalk chi xsikʼbʼal ut chi xkolbʼal li sachenaq».

11 Naq yookebʼ rabʼinkil chixjunil aʼin, li Jesús kixye jun chik li eetalil* xbʼaan naq nachʼ wank rikʼin Jerusalén ut xbʼaan naq nekeʼxpaabʼ naq kʼulunk kʼulunk re li Xʼawabʼejilal li Yos. 12 Joʼkan naq kixye: «Jun ralal li awabʼej xkoho saʼ najtil tenamit re naq txaqabʼaaq choʼq awabʼej* ut chirix chik aʼan tsutqʼiiq chaq. 13 Kixbʼoq lajeebʼ rehebʼ li xmoos, kixkʼe rehebʼ lajeebʼ li tumin re plaat* ut kixye rehebʼ: “Yakonqex rikʼin li tumin aʼin toj reetal naq tinsutqʼiiq chaq”. 14 Abʼan xikʼ naʼileʼk xbʼaan li rechtenamit ut xeʼxtaqla jun chʼuut li winq chi xyeebʼal: “Inkʼaʼ naqaj naq li winq aʼin txaqabʼaaq choʼq awabʼej saʼ qabʼeen”.

15 »Naq ak xxaqabʼanbʼil chik choʼq awabʼej, kisutqʼiik chaq. Kixchʼutubʼ ebʼ li xmoos li kixkʼe rehebʼ li tumin* re xnawbʼal joʼnimal chik xeʼxtaw saʼ xbʼeen naq xeʼyakok chiru. 16 Kijilok li xbʼeen ut kixye re: “Qaawaʼ, rikʼin li tumin li xaakʼe we, lajeebʼ chik xintaw saʼ xbʼeen”. 17 Li awabʼej kixye re: “Qʼaxal us xaabʼaanu, at inmoos, chaabʼil aanaʼlebʼ! Saʼ xkʼabʼaʼ naq paabʼajelat usta kachʼin li xaabʼaanu, tatjolominq saʼ xbʼeen lajeebʼ chi tenamit”. 18 Tojaʼ naq li xkabʼ kixye: “Qaawaʼ, rikʼin li tumin li xaakʼe we, oobʼ chik xintaw saʼ xbʼeen”. 19 Joʼkan ajwiʼ kixye re li winq aʼin: “Tatjolominq saʼ xbʼeen oobʼ chi tenamit”. 20 Abʼan kichalk jun chik ut kixye re: “Qaawaʼ, weʼi laatumin, muqmu inbʼaan saʼ jun li sut. 21 Ninxuwa aawu xbʼaan naq kaw nakattaqlank; nakaawisi li tumin bʼarwiʼ inkʼaʼ xaakʼula ut nakaaxok ru li awimq bʼarwiʼ inkʼaʼ xat-awok”. 22 Li awabʼej kixye re: “Saʼ xkʼabʼaʼ laawaatin, tatinkʼe chi xtojbʼal aamaak, maaʼus aanaʼlebʼ! Joʼ li nakaanaw naq kaw nintaqlank, naq nawisi li tumin bʼarwiʼ inkʼaʼ xinkʼulank ut ninxok ru li awimq bʼarwiʼ inkʼaʼ xinʼawok. 23 Abʼanan, kʼaʼut naq inkʼaʼ xaakʼe lintumin* saʼ li kʼulebʼaal tumin? Ut chi joʼkan, naq tinkʼulunq, tintaw raj xral lintumin”.

24 »Ut kixye rehebʼ li wankebʼ aran: “Maqʼomaq chiru li tumin ut kʼehomaq re li winq li kixtaw lajeebʼ chik saʼ xbʼeen li tumin”. 25 Abʼan xeʼxye re: “Qaawaʼ aʼan ak wank lajeebʼ xtumin re plaat!”. 26 Li Jesús kixye rehebʼ: “Ninye eere naq li wank kʼaru re, tkʼemanq xtzʼaqobʼ re. Abʼan li maakʼaʼ kʼaru re, tmaqʼeʼq chiru usta kachʼin wank rikʼin. 27 Joʼkan ajwiʼ, kʼamomaq chaq arin ebʼ li xikʼ nekeʼilok we li inkʼaʼ xeʼraj naq tinjolominq saʼ xbʼeenebʼ ut kamsihomaqebʼ chiwu”».

28 Naq ak kixye aʼin, kixchap xbʼe ut kiʼok chi taqeʼq Jerusalén. 29 Ut naq kinachʼok Betfagué ut Betania, saʼ li tzuul li nakʼabʼaʼiik Olivo, kixtaqla wiibʼ rehebʼ li xtzolom 30 ut kixye rehebʼ: «Ayuqex saʼ li kʼalebʼaal li nekeeril aran. Naq texʼoq, teetaw chi bʼakʼbʼo jun li chʼina bʼuur li toj maajiʼ nekeʼchunlaak saʼ xbʼeen. Hitomaq* ut kʼamomaq chaq. 31 Ut wi junaq li qas qiitzʼin tixpatzʼ eere “Kʼaʼut yookex xhitbʼal?”,* laaʼex teesume “Li Qaawaʼ naʼajok re”». 32 Joʼkan naq ebʼ li tzolom li xeʼtaqlaak, xkohebʼ ut xeʼxtaw joʼ chanru kixye rehebʼ. 33 Abʼan naq yookebʼ xhitbʼal* li chʼina bʼuur, ebʼ laj echal re xeʼxpatzʼ rehebʼ: «Kʼaʼut yookex xhitbʼal* li chʼina bʼuur?». 34 «Li Qaawaʼ naʼajok re», chankebʼ re. 35 Tojaʼ naq ebʼ li qas qiitzʼin xeʼxkʼam chaq re li Jesús li chʼina bʼuur ut naq ak xeʼxkʼe li xtʼikr saʼ xbʼeen li chʼina bʼuur, xeʼxbʼaanu naq li Jesús tchunlaaq saʼ xbʼeen.

36 Naq yook chi xik li Jesús, ebʼ li qas qiitzʼin nekeʼxhel chiru bʼe ebʼ li xtʼikr li lanlokebʼ wiʼ. 37 Naq ak yook chi nachʼok saʼ li bʼe bʼarwiʼ nekeekubʼeek re xik saʼ li tzuul Olivo, chixjunilebʼ li yookebʼ chi taqenk re, qʼaxal sahebʼ saʼ xchʼool ut chi kaw xyaabʼebʼ xkux xeʼok xkʼebʼal xloqʼal li Yos xbʼaan chixjunil li sachbʼachʼoolej li xeʼril. 38 Nekeʼxye: «Osobʼtesinbʼil taxaq li nachalk joʼ Awabʼej saʼ xkʼabʼaʼ li Jehobʼa!* Chiwanq saʼ tuqtuukilal li winq rikʼin li Yos! Ut laaʼo naqakʼe xloqʼal li Yos li wank taqeʼq!». 39 Abʼan wiibʼ oxibʼ laj pariseey li wankebʼ saʼ xyanq li kʼiila tenamit xeʼxye: «At Kʼutunel qʼusebʼ laatzolom». 40 Aʼan kixye rehebʼ: «Ninye eere naq wi aʼanebʼ inkʼaʼ raj teʼaatinaq, ebʼ li pek teʼxjap raj re».

41 Naq kiwulak chixkʼatq Jerusalén ut naq kiril li tenamit aʼin, kiyaabʼak xbʼaan 42 ut kiʼok xyeebʼal: «Wi laaʼat, wi laaʼat raj xaakʼe reetal saʼ li kutan aʼin li bʼe li nakʼamok saʼ li tuqtuukilal... Abʼan xmuqmank chaawu. 43 Xbʼaan naq twulaq xkutankil naq ebʼ li xikʼ nekeʼilok aawe tateʼxsut rikʼin nimla jutzʼcheʼ, ut tateʼxpitzʼi. 44 Laaʼat ut ebʼ li qas qiitzʼin* li nekeʼnaʼajink aawikʼin texpukʼiiq ut inkʼaʼ teʼxkanabʼ aawikʼin pek saʼ xbʼeen pek xbʼaan naq inkʼaʼ xaakʼe reetal naq li Yos kichalk chi raqok aatin saʼ aabʼeen».

45 Tojaʼ naq, kiʼok saʼ rochoch li Yos ut kiʼok risinkilebʼ aran li yookebʼ chi kʼayink. 46 Kiʼok xyeebʼal rehebʼ: «Tzʼiibʼanbʼil “Li wochoch aʼanaq rochochil li tijok”, abʼan laaʼex xeekʼe choʼq rochochebʼ aj elqʼ».

47 Rajlal kutan yook chaq chi kʼutuk saʼ rochoch li Yos. Abʼan ebʼ li xbʼeenil aj tij, ebʼ laj tzʼiibʼ ut ebʼ li qas qiitzʼin li wankebʼ xwankil saʼ li tenamit xeʼxyal xkamsinkil. 48 Abʼanan, inkʼaʼ nekeʼxtaw chanru xkamsinkil xbʼaan naq ebʼ li qas qiitzʼin junelik wankebʼ rikʼin chi rabʼinkil li naxye.