2 Corintios
2 Xinkʼoxla naq inkʼaʼ chik tinrahobʼtesi leechʼool naq tinwulaq wiʼ chik eerilbʼal. 2 Xbʼaan naq, wi tinrahobʼtesi leechʼool, ani chik tsahobʼresinq re linchʼool? Ma inkʼaʼ tabʼiʼ li xinrahobʼtesihebʼ xchʼool? 3 Aʼan ajʼe naq xintzʼiibʼa aʼin, naq tinwulaq eerikʼin moko rahaq ta inchʼool chirix li naxkʼe xsahil linchʼool xbʼaan naq chʼolchʼo chiwu naq li naxkʼe xsahil inchʼool naxkʼe ajwiʼ xsahil eechʼool. 4 Naq xexintzʼiibʼa ra inchʼool, yook inkʼaʼuxl ut yookin chi yaabʼak. Abʼan inkʼaʼ xinbʼaanu aʼin re naq trahoʼq leechʼool, xinbʼaanu bʼan re naq teenaw naq qʼaxal nekexinra.
5 Joʼkan bʼiʼ, wi junaq li qas qiitzʼin kirahobʼtesink chʼool, moko laaʼin ta kixrahobʼtesi linchʼool, cheejunilex bʼan kixrahobʼtesi leechʼool. Wankebʼ qʼaxal xeʼrahobʼtesiik wiʼ chik chiʼus (inkʼaʼ nawaj xyeebʼal naabʼal chirix aʼin). 6 Tzʼaqal li qʼuseʼk kixkʼul li winq saʼ ruqʼebʼ li komonil. 7 Anaqwan tento teekuy xmaak chi anchal eechʼool ut teekʼojobʼ xchʼool re naq moko qʼaxal rahaq ta xchʼool toj reetal naq maakʼaʼ chik traj. 8 Joʼkan bʼiʼ nawaj xyeebʼal eere naq teekʼutbʼesi chiru naq qʼaxal nekeera. 9 Saʼ xkʼabʼaʼ ajwiʼ aʼin naq xexintzʼiibʼa re xnawbʼal ma yookex xpaabʼankil chixjunil. 10 Wi laaʼex nekeekuy xmaak junaq li qas qiitzʼin, laaʼin ajwiʼ ninkuy xmaak. Joʼkan ajwiʼ, wi ninkuyuk maak, xinbʼaanu re eetenqʼankil ut xinbʼaanu chiru li Kriist 11 re naq laj Tza inkʼaʼ tooxbʼalaqʼi xbʼaan naq laaʼo naqanaw chanru nabʼalaqʼik.
12 Joʼkan bʼiʼ, naq xinwulak Troas re xkʼebʼal chi naweʼk li chaabʼil esil chirix li Kriist ut kiteehonk chiwu jun li okebʼaal chirix li xkʼanjel li Qaawaʼ, 13 moko sa ta xinkanaak xbʼaan naq inkʼaʼ xintaw laj Tito, li wechpaabʼanel. Joʼkan naq xinchaqʼrabʼihebʼ ut xkohin Macedonia.
14 Abʼan naqabʼanyoxi re li Yos naq nokooxbʼeresi rochbʼeen li Kriist. Nokooxbʼeresi, joʼ nekeʼbʼeresiik ebʼ laj puubʼ li xeʼqʼaxok u saʼ li yalok. Li xnawom li Yos sununk xbʼook. Ut aʼan naroksi li qakʼanjel re xbʼaanunkil naq yalaq bʼar ebʼ li qas qiitzʼin teʼrutzʼ xbʼook. 15 Xbʼaan naq chiru li Yos chanchano li sununkil bʼook li nachalk rikʼin li Kriist li nawulak rikʼinebʼ li yookebʼ chi koleʼk ut rikʼinebʼ li yookebʼ chi kamk. 16 Ut choʼq rehebʼ li yookebʼ chi kamk, aʼin xbʼook li kamk li nakʼamok saʼ li kamk. Abʼan, choʼq rehebʼ li yookebʼ chi koleʼk, aʼin xbʼook li yuʼam li nakʼamok saʼ li yuʼam. Ut ani kawresinbʼil re xbʼaanunkil chixjunil aʼin? 17 Laaʼo, xbʼaan naq inkʼaʼ nokooyakok rikʼin* li raatin li Yos joʼ nekeʼxbʼaanu naabʼalebʼ li qas qiitzʼin. Naqaye li yaal naq naqakʼe chi naweʼk li chaabʼil esil. Laaʼo xtzolom li Kriist li taqlanbʼilo xbʼaan li Yos re naq tqabʼaanu li kʼanjel aʼin ut naqaqʼaxtesi li qabʼaanuhom chiru li Yos.