1 Corintios
2 Joʼkan bʼiʼ, naq xinwulak bʼarwiʼ wankex, ex wechpaabʼanel, inkʼaʼ xinkʼe cheenaw li xmuqmukil naʼlebʼ li Yos rikʼin xninqal ru aatin chi moko xinkʼutbʼesi naq wank innawom. 2 Naq xinwank chaq eerikʼin, xinkʼoxla naq kaʼajwiʼ chirix li Jesukriist tinkʼe inchʼool ut naq kitʼuyubʼaak chiru cheʼ. 3 Naq xinwulak eerikʼin xwekʼa naq maakʼaʼ inmetzʼew ut ninsiksotk xbʼaan inxiw. 4 Ut naq xexwaatina ut xinkʼe cheenaw li chaabʼil esil inkʼaʼ xinbʼaanu joʼ nekeʼaatinak li wankebʼ xnaʼlebʼ, xinkʼutbʼesi bʼan naq wank wikʼin li santil musiqʼej* 5 re naq inkʼaʼ teekʼojobʼ eechʼool chirix li xnawomebʼ li winq, teekʼojobʼ bʼan eechʼool chirix li xwankil li Yos.
6 Joʼkan bʼiʼ, laaʼo nokooʼaatinak chirix li naʼlebʼ saʼ xyanqebʼ li kawebʼ xpaabʼal ut maawaʼ chirix li xnaʼlebʼ li ruuchichʼochʼ* aʼin chi moko chirixebʼ li xnaʼlebʼebʼ li awabʼej li teʼosoʼq. 7 Laaʼo nokooʼaatinak chirix li muqmukil naʼlebʼ li nachalk rikʼin li Yos, aʼin naraj xyeebʼal, li xnaʼlebʼ li Yos li wank chi muqmu ut ak wank rubʼelaj naq toj maakʼaʼ chaq li ruuchichʼochʼ* re xkʼebʼal qaloqʼal. 8 Maaʼani rehebʼ li nekeʼjolomink re li ruuchichʼochʼ* aʼin xeʼxnaw chirix li nawom aʼin, wi nekeʼxnaw raj inkʼaʼ raj xeʼxtʼuyubʼ chiru cheʼ li Qaawaʼ li wank xloqʼal. 9 Abʼan joʼ chanru tzʼiibʼanbʼil: «Maaʼani ak rilom ut maaʼani ak rabʼihom chi moko wank ta junaq li qas qiitzʼin li ak xkʼoxla rix li kixkawresi li Yos choʼq rehebʼ li nekeʼrahok re». 10 Li Yos ak xkʼut chiqu li naʼlebʼ aʼin saʼ xkʼabʼaʼ li xsantil musiqʼej, xbʼaan naq li santil musiqʼej naxtzʼil rix chixjunil, joʼ ajwiʼ li xchamal xnawom li Yos.
11 Ma wank tabʼiʼ junaq li winq li naxnaw li naxkʼoxla li rechwinqilal? Li winq aʼin kaʼajwiʼ naxnaw li wank saʼ xchʼool. Joʼkan ajwiʼ maaʼani naxnaw li naxkʼoxla li Yos kaʼajwiʼ li xsantil musiqʼej li Yos. 12 Joʼkan bʼiʼ, laaʼo bʼeresinbʼilo rikʼin li xwankilal li Yos ut inkʼaʼ rikʼin li xkʼaʼuxl ut li xbʼe li ruuchichʼochʼ aʼin re naq tqanaw li naʼlebʼ li kixkʼe qe li Yos chi anchal xchʼool. 13 Laaʼo ajwiʼ nokooʼaatinak chirix aʼin, abʼan inkʼaʼ naqoksi li aatin li naxkʼut xnaʼlebʼ li winq, naqoksi bʼan li aatin li naxkʼut li santil musiqʼej re xchʼolobʼankil li yaal li nachalk rikʼin li Yos.
14 Abʼan li qas qiitzʼin li bʼeresinbʼil rikʼin xkʼaʼuxl li winq inkʼaʼ naxkʼulubʼa* li naʼlebʼ li nachalk rikʼin li xsantil musiqʼej li Yos; naxkʼoxla naq li naʼlebʼ aʼin maakʼaʼ naʼok wiʼ. Ut inkʼaʼ naxtaw ru li naʼlebʼ aʼin xbʼaan naq tento tixtzʼil rix rikʼin li xsantil musiqʼej li Yos. 15 Abʼanan, li qas qiitzʼin li bʼeresinbʼil xbʼaan li santil musiqʼej naxtzʼil rix chixjunil, abʼan maaʼani naru xtzʼilbʼal rix li winq aʼin. 16 Xbʼaan naq, «ani ak xnawom chanru nakʼoxlak li Jehobʼa* re naq truuq xkʼebʼal xnaʼlebʼ?». Abʼan li xkʼaʼuxl li Kriist wank qikʼin.