Hechos
14 Joʼkan bʼiʼ, aran Iconio laj Pablo ut laj Bernabé xeʼok saʼ li naʼaj bʼarwiʼ nekeʼloqʼonink ebʼ laj judiiy. Ut saʼ xkʼabʼaʼ naq qʼaxal chaabʼil xeʼaatinak, naabʼalebʼ laj judiiy ut ebʼ laj griego xeʼok chi paabʼank. 2 Abʼan ebʼ laj judiiy li inkʼaʼ xeʼok chi paabʼank xeʼxbʼaanu naq teʼxpoqoqi ribʼ* li maawaʼebʼ aj judiiy ut xeʼxtakchiʼi ebʼ li qas qiitzʼin re naq xikʼ teʼril ebʼ laj paabʼanel. 3 Joʼkan naq chiru naabʼal xamaan xeʼkanaak aran ut li Jehobʼa* kixkʼehebʼ xwankil re naq teʼaatinaq chi maakʼaʼebʼ xxiw. Ut re xkʼutbʼesinkil naq naxkʼulubʼa li esil li nekeʼxkʼe chi naweʼk chirix li xnimal rusilal kiroksi li ruqʼebʼ re naq teʼxbʼaanu ebʼ li sachbʼachʼoolej ut ebʼ li xninqal ru naʼlebʼ. 4 Abʼanan, li wankebʼ saʼ li tenamit aʼan xeʼxjach ribʼ: wankebʼ xeʼokenk chirixebʼ laj judiiy ut jalanebʼ chik xeʼokenk chirixebʼ li apóstol. 5 Ebʼ li qas qiitzʼin li maawaʼebʼ aj judiiy xeʼxkʼe ribʼ saʼ aatin rikʼinebʼ laj judiiy ut laj jolominel re xrahobʼtesinkil ut xteninkil chi pek laj Pablo ut laj Bernabé. 6 Abʼan, naq xeʼxnaw aʼin xkohebʼ saʼebʼ li tenamit Listra ut Derbe li wank Licaonia, ut saʼebʼ li kʼalebʼaal li wankebʼ chixkʼatq ebʼ li tenamit aʼin. 7 Ut aran ajwiʼ xeʼok xkʼebʼal chi naweʼk li chaabʼil esil.
8 Aran Listra chunchu chaq jun li winq sik li roq. Saʼ xkʼabʼaʼ naq joʼkan kiyoʼlaak, maajunwa kibʼeek. 9 Li winq aʼin yook rabʼinkil li yook xyeebʼal laj Pablo. Tojaʼ naq laj Pablo kikanaak xkaʼyankil ut saʼ xkʼabʼaʼ naq kiril naq li winq naxpaabʼ naq truuq chi kʼiraak, 10 kixye re chi kaw xyaabʼ xkux: «Xaqlin». Ut li winq saʼ junpaat kixaqli ut kiʼok chi bʼeek. 11 Naq ebʼ li qas qiitzʼin xeʼril li kixbʼaanu laj Pablo, aʼanebʼ xeʼxjap re chi kaw saʼ raatinobʼaalebʼ laj Licaonia ut xeʼxye: «Ebʼ li yos xeʼsutqʼiik choʼq winq ut xeʼkubʼeek bʼarwiʼ wanko laaʼo!». 12 Joʼkan naq xeʼok xkʼabʼaʼinkil laj Bernabé joʼ Zeus ut laj Pablo joʼ Hermes xbʼaan naq aʼan xbʼeenwa naʼaatinak chiru laj Bernabé. 13 Li rochoch li yos Zeus wank saʼ rokebʼaal li tenamit. Laj tij li nakʼanjelak chiru li yos Zeus kixkʼam chaq saʼ li okebʼaal ebʼ li teelom wakax ut ebʼ li koroon. Laj tij ut ebʼ li qas qiitzʼin xeʼraj xmayejankil ebʼ li xul choʼq re laj Pablo ut laj Bernabé.
14 Naq li apóstol Pablo ut laj Bernabé xeʼxnaw aʼin xeʼxqʼich li xtʼikrebʼ, xeʼxchʼik ribʼ saʼ aanil saʼ xyanq li kʼiila tenamit, ut chi kaw xyaabʼebʼ xkux xeʼxye: 15 «Ex qas qiitzʼin, kʼaʼut nekeebʼaanu aʼin? Laaʼo ajwiʼ winqo joʼ laaʼex ut naqakʼul ebʼ li rahilal li nekeekʼul. Yooko xkʼebʼal chi naweʼk li chaabʼil esil eere re naq teekanabʼ xbʼaanunkil ebʼ li naʼlebʼ li maakʼaʼ nekeʼok wiʼ ut texsutqʼiiq rikʼin li yoʼyokil Yos li kibʼaanunk re li choxa, li ruuchichʼochʼ, li palaw ut chixjunil li wank chisaʼ. 16 Junxil kixkanabʼ naq li junjunq chi tenamit tixbʼaanu li naraj, 17 ut rikʼin xbʼaanunkil li us kixkʼut cheeru ani aʼan. Joʼkan naq kixkʼe eere li habʼ ut naabʼal li awimq, naabʼal eetzekemq ut xsahil eechʼool». 18 Usta xeʼxye chixjunil aʼin rehebʼ li qas qiitzʼin, raachisa xeʼruuk xrambʼal chiruhebʼ re naq inkʼaʼ chik teʼmayejaq.
19 Joʼkan bʼiʼ, xeʼwulak wiibʼ oxibʼ laj judiiy re Antioquía ut re Iconio ut xeʼxtakchiʼi ebʼ li qas qiitzʼin re naq xikʼ teʼril laj Pablo. Joʼkan naq xeʼxteni chi pek ut xeʼxjukuki chirix li tenamit, xeʼxkʼoxla naq kamenaq chik. 20 Abʼanan, naq li nekeʼtaqenk re li Jesús xeʼxchʼutubʼ ribʼ chi xsutam, laj Pablo kiwakliik ut xʼok saʼ li tenamit. Wulajaq chik, xkoho rochbʼeen laj Bernabé aran Derbe. 21 Naq ak xeʼxkʼe chi naweʼk li chaabʼil esil saʼ li tenamit aʼan ut naq ak xeʼxtenqʼa naabʼalebʼ li qas qiitzʼin chi xtaqenkil li Jesús, xeʼsutqʼiik Listra, Iconio ut Antioquía. 22 Aran xeʼxwaklesi xchʼool ebʼ li nekeʼtaqenk re li Jesús re naq junelik kawaqebʼ xpaabʼal ut xeʼxye rehebʼ: «Tento tqanumsi naabʼal li rahilal re naq tooruuq chi ok saʼ li Xʼawabʼejilal li Yos». 23 Saʼ li junjunq chi chʼuut xeʼxxaqabʼ ebʼ li cheekel winq rikʼin tijok ut ayuunik* ut xeʼxkanabʼ saʼ ruqʼ li Jehobʼa* li xeʼok xpaabʼankil.
24 Chirix chik aʼan xeʼnumeʼk Pisidia ut xeʼok Panfilia; 25 ut naq ak xeʼxye resil li raatin li Yos aran Perga, xeʼkubʼeek Atalia. 26 Aran xeʼtaqeʼk saʼ jun li jukubʼ ut xkohebʼ Antioquía bʼarwiʼ xeʼkanabʼaak saʼ ruqʼ li Yos re naq aʼan tixkʼut chiruhebʼ li xnimal rusilal ut chi joʼkan xeʼxbʼaanu li kʼanjel li tojaʼ xeʼxchoy.
27 Naq xeʼwulak ut xeʼxchʼutubʼ li chʼuut, xeʼxseeraqʼi rehebʼ chixjunil li kixbʼaanu li Yos saʼ xkʼabʼaʼebʼ. Xeʼxseeraqʼi ajwiʼ rehebʼ naq li Yos kixte li okebʼaal chiruhebʼ li maawaʼebʼ aj judiiy re naq teʼoq chi paabʼank. 28 Joʼkan naq laj Pablo ut laj Bernabé naabʼal kutan xeʼkanaak rikʼinebʼ li nekeʼtaqenk re li Jesús.