Romanos
14 Kʼulumaq chiʼus li inkʼaʼ kaw xpaabʼal, ut meewechʼ rixebʼ li jalan nekeʼkʼoxlak cheeru laaʼex. 2 Li kaw xpaabʼal naxtzeka yalaq kʼaru chi tzekemq, abʼan li inkʼaʼ kaw xpaabʼal junes ichaj naxwaʼ. 3 Li nawaʼak mixtzʼeqtaana li inkʼaʼ nawaʼak, ut li inkʼaʼ nawaʼak mixwechʼ rix li nawaʼak. Xbʼaan naq ak xkʼulubʼaak xbʼaan li Yos. 4 Anihat laaʼat re naq tatraqoq aatin saʼ xbʼeen li xmoos jalan chik? Laj echal re bʼan yaal re ma us wank malaj inkʼaʼ. Saʼ xkʼabʼaʼ naq li Jehobʼa* natenqʼank re aʼan naru nawank chiʼus chiru.
5 Wankebʼ nekeʼxkʼoxla naq jun li kutan qʼaxal wank xwankil chiru ebʼ li junchʼol chi kutan, ut jalanebʼ chik nekeʼxkʼoxla naq juntaqʼeet chixjunil ebʼ li kutan. Chʼolchʼooq chiru li junjunq naq us li naxkʼoxla. 6 Li nekeʼxnima jun li kutan, nekeʼxbʼaanu re roxloqʼinkil li Jehobʼa.* Li nekeʼxwaʼ li jalan jalanq chi tzekemq, nekeʼxbʼaanu re roxloqʼinkil li Jehobʼa* ut nekeʼxbʼanyoxi re li tzekemq. Ut li inkʼaʼ nekeʼwaʼak nekeʼroxloqʼi ajwiʼ li Jehobʼa* ut nekeʼxbʼanyoxi re. 7 Joʼkan ajwiʼ, maaʼani qe wank xyuʼam choʼq re xjunes ut maaʼani nakamk choʼq re xjunes. 8 Xbʼaan naq wi yoʼyoko, yoʼyoko choʼq re li Jehobʼa,* ut wi kamenaqo, kamenaqo choʼq re li Jehobʼa.* Joʼkan naq, wi yoʼyoko malaj kamenaqo, reho li Jehobʼa.* 9 Aʼin xyaalal naq kikamk ut kiwaklesiik chi yoʼyo li Kriist: re naq aʼanaq li Qaawaʼ choʼq rehebʼ li kamenaq ut choʼq rehebʼ li yoʼyo.
10 Abʼan, kʼaʼut nakatraqoq aatin saʼ xbʼeen laawas aawiitzʼin? Kʼaʼut nakaatzʼeqtaana laawas aawiitzʼin? Chiqajunilo xaqxoqo chiru li xraqlebʼaal aatin li Yos. 11 Xbʼaan naq tzʼiibʼanbʼil: «Relik chi yaal naq yoʼyokin (chan li Jehobʼa)* chixjunilebʼ teʼxwiqʼibʼ ribʼ chiwu ut chixjunilebʼ teʼxye chiruhebʼ li junchʼol naq laaʼin li Yos». 12 Tojaʼ naq li Yos traqoq aatin saʼ xbʼeen li junjunq aʼ yaal chanru xbʼaanuhom.
13 Joʼkan bʼiʼ, qakanabʼaq xwechʼbʼal qibʼ chiqibʼil qibʼ. Chʼolchʼooq bʼan cheeru naq inkʼaʼ teekʼe chi tichkʼok chi moko teekʼe junaq li ramlebʼ chiru leeras eeriitzʼin. 14 Ninnaw ut chʼolchʼo chiwu saʼ xkʼabʼaʼ li Qaawaʼ Jesús naq moko tzʼaj ta chixjunil li naqawaʼ. Abʼan wi junaq li qas qiitzʼin naxkʼoxla naq tzʼaj ru li tzekemq, tzʼajaq li tzekemq choʼq re. 15 Joʼkan naq, wi nachʼinaak xchʼool laawas aawiitzʼin saʼ xkʼabʼaʼ li nakaawaʼ, inkʼaʼ yookat xkʼutbʼesinkil naq nakaara. Li Kriist kixkʼe li xyuʼam chirix li qas qiitzʼin aʼin. Maasach li xpaabʼal saʼ xkʼabʼa li nakaawaʼ. 16 Joʼkan naq, meebʼaanu junaq li naʼlebʼ re naq ebʼ li junchʼol inkʼaʼ teʼxye li inkʼaʼ us chirix li xchaabʼilal ru leebʼaanuhom. 17 Xbʼaan naq li Xʼawabʼejilal li Yos inkʼaʼ naxchap ribʼ rikʼin li waʼak ut li ukʼak, naxchap bʼan ribʼ rikʼin li tiikilal, li tuqtuukilal ut li sahil chʼoolejil saʼ xkʼabʼaʼ li santil musiqʼej. 18 Li nakʼanjelak chi joʼkaʼin chiru li Kriist kʼulubʼanbʼil xbʼaan li Yos ut kʼulubʼanbʼil ajwiʼ xbʼaanebʼ li qas qiitzʼin.
19 Joʼkan bʼiʼ, inkʼaʼ tqakanabʼ xsikʼbʼal chixjunil li nokooxtenqʼa chi wank saʼ tuqtuukilal rikʼinebʼ li junchʼol ut inkʼaʼ tqakanabʼ xsikʼbʼal chixjunil li nokooxtenqʼa chi xkawresinkil qibʼ chiqibʼil qibʼ. 20 Kanabʼ xjukʼbʼal xkʼanjel li Yos saʼ xkʼabʼaʼ li tzekemq. Yaal naq chixjunil li tzekemq naru xwaʼbʼal, abʼan moko us ta xwaʼbʼal wi aʼin naxkʼe chi tichkʼok junaq li qas qiitzʼin. 21 Qʼaxal us naq inkʼaʼ twaʼmanq li tibʼ chi moko t-ukʼmanq li bʼiin chi moko tbʼaanumanq junaq li naʼlebʼ li tixkʼe chi tichkʼok laawas aawiitzʼin. 22 Li nakaapaabʼ kʼula choʼq aawe chiru li Yos. Sahaq saʼ aachʼool wi nakaakʼoxla naq xaabʼaanu li us ut maakʼaʼ li maak saʼ aabʼeen. 23 Abʼan, wi junaq li qas qiitzʼin nawiibʼank xchʼool ut nawaʼak, ak wank li maak saʼ xbʼeen xbʼaan naq inkʼaʼ nawaʼak saʼ xkʼabʼaʼ li naxpaabʼ. Joʼkan bʼiʼ, maakʼaʼ naxye kʼaru tixbʼaanu, abʼan wi aʼin, inkʼaʼ naxchap ribʼ rikʼin xpaabʼankil li Yos, wank maak saʼ xbʼeen.