1 Timoteo
6 Ebʼ li moos tento teʼroxloqʼi ebʼ li xpatron re naq maajunwa tyeemanq li inkʼaʼ us chirix li xkʼabʼaʼ li Yos chi moko chirix li xkʼutum. 2 Ut wi ebʼ li xpatron rechpaabʼanelebʼ, tento teʼroxloqʼi xbʼaan naq rechpaabʼanelebʼ. Abʼan qʼaxal us teʼkʼanjelaq chiruhebʼ xbʼaan naq rechpaabʼanelebʼ ut qʼaxal nekeʼxra.
Ut laaʼat maakanabʼ xkʼutbʼal ut xkʼebʼal li naʼlebʼ aʼin. 3 Wi junaq li winq naxkʼut li bʼalaqʼil kʼutum ut inkʼaʼ naxkʼulubʼa li kʼutum li qʼaxal chaabʼil* li nachalk rikʼin li Qaawaʼ Jesukriist chi moko naxkʼulubʼa ta li kʼutum li naxkʼut chanru xloqʼoninkil li Yos, 4 li winq aʼin numtajenaq xqʼetqʼetil ut maakʼaʼ naxtaw ru. Qʼaxal nawulak chiru choqink ut pleetik chirix aatin. Aʼin naxbʼaanu naq ebʼ li qas qiitzʼin teʼkaqalinq, teʼpleetiq, teʼxhobʼ ebʼ li junchʼol, inkʼaʼ teʼxpaabʼ ebʼ li junchʼol 5 ut ebʼ li winq li tzʼajebʼ ru xkʼaʼuxl, inkʼaʼ chik teʼxtaw ru li yaal ut junelik teʼxchoqi ribʼ chirix li naʼlebʼ li maakʼaʼ xwankil. Nekeʼxkʼoxla naq wank teʼxtaw rikʼin xloqʼoninkil li Yos. 6 Ut yaal aʼan, wi naqaloqʼoni li Yos chi anchal qachʼool ut sa qachʼool rikʼin li kʼaru wank qe tqataw naabʼal li osobʼtesink. 7 Xbʼaan naq maakʼaʼ naqakʼam chaq naq nokooyoʼlaak ut maakʼaʼ ajwiʼ naqakʼam naq nokookamk. 8 Joʼkan bʼiʼ, wi wank qatzekemq ut qatʼikr, sahaq qachʼool rikʼin aʼin.
9 Abʼanan, li nekeʼxsikʼ li bʼihomal nekeʼtʼaneʼk saʼebʼ li aaleek ut saʼebʼ li raʼal ut saʼ naabʼal li rahobʼtesiik ut saʼ xkʼabʼaʼ aʼin nekeʼxkʼul li chʼaʼajkilal ut li kamk. 10 Xbʼaan naq li xrahinkil ru li tumin aʼan xxeʼil li jalan jalanq chi chʼaʼajkilal. Ut xbʼaan xrahinkil ru aʼin, wankebʼ xeʼxtzʼeqtaana li xpaabʼal ut xeʼxtaw naabʼal li rahilal.
11 Abʼan laaʼat, li nakatkʼanjelak chiru li Yos, elelin chiru chixjunil aʼin. Sikʼ bʼan li tiikilal, loqʼoni li Yos chi anchal laachʼool, kʼutbʼesi li paabʼank, li rahok, li kuyum ut li tuulanil. 12 Yalon chi anchal aachʼool re xkolbʼal li xkʼutum li Yos. Chap chi kaw li junelik yuʼam. Li Yos xatxbʼoq re naq taakʼul li yuʼam aʼin ut xaakʼe chi naweʼk chiru naabʼalebʼ li qas qiitzʼin.
13 Chiru li Yos li naxkʼe xyuʼam chixjunil ut chiru li Kristo Jesús li kixkʼe chi naweʼk chiʼus chiru laj Poncio Pilato, ninye aawe 14 naq taapaabʼ li taql chi maakʼaʼ aapaltil ut maaʼani tqʼabʼanq aawe toj reetal naq tixkʼut li xwankil li Qaawaʼ Jesukriist, 15 li sa saʼ xchʼool ut li Wank Xwankil, tixkʼut li xloqʼal saʼ li hoonal li xaqabʼanbʼil. Aʼan Awabʼej saʼ xbʼeenebʼ li nekeʼjolomink joʼ awabʼej ut aʼan Qaawaʼ saʼ xbʼeenebʼ li nekeʼjolomink joʼ qaawaʼ. 16 Ut kaʼajwiʼ aʼan inkʼaʼ nakamk, wank saʼ jun li naʼaj li nalemtzʼunk ut wank xloqʼal li maaʼani naru nawulak aran, maaʼani ak rilom ru chi moko naru rilbʼal. Re taxaq li loqʼal ut li wankilal chi junelik. Joʼkan taxaq.
17 Kʼe li naʼlebʼ aʼin rehebʼ li bʼihom li wankebʼ saʼ li ruuchichʼochʼ* aʼin: inkʼaʼ teʼxkʼoxla naq nimebʼ xwankil chi moko teʼxkʼojobʼ xchʼool chirix li bʼihomal li naʼosoʼk, teʼxkʼojobʼ bʼan xchʼool chirix li Yos, li naxkʼe qe chi yoʼon chixjunil li naqayal xsahil. 18 Ye rehebʼ naq teʼnaʼlebʼaq chiʼus, naq teʼxbʼaanu li us, naq teʼkʼehoq chi yoʼon ut naq t-alaaq saʼ xchʼoolebʼ wotzok 19 ut chi joʼkan, chanchan tawiʼ yookebʼ xchʼutubʼankil li bʼihomal li nachalk rikʼin li Yos. Aʼin naraj xyeebʼal naq yookebʼ xkʼebʼal li chaabʼil rubʼelankil choʼq re li kutan chalk re, re naq teʼxchap ribʼ chi kaw rikʼin li tzʼaqal yuʼam.
20 At Timoteo, il chiʼus li xkʼemank aawe, maawabʼi ebʼ li aatin li inkʼaʼ naxkʼulubʼa li Yos ut ebʼ li naʼlebʼ li nachalk rikʼinebʼ li qas qiitzʼin li nekeʼxkʼoxla naq wankebʼ xnawom. Abʼan li xnawomebʼ inkʼaʼ naxchap ribʼ rikʼin li yaal. 21 Saʼ xkʼabʼaʼ naq nekeʼxnima ribʼ chirix li nawom aʼin, wankebʼ xeʼxtzʼeqtaana li paabʼank.
Aʼ taxaq li xnimal rusilal li Yos chiwanq eerikʼin.