2 Corintios
10 Laaʼin laj Pablo nintzʼaama cheeru naq inkʼaʼ teekanabʼ xbʼaanunkil li ninye. Naq nekexwaatina yookin xkʼambʼal we rikʼin li Kriist xbʼaan naq aʼan tuulan ut naxkubʼsi ribʼ. Wiibʼ oxibʼ eere nekeʼxye naq inkʼaʼ ninxuwak cheetzʼiibʼankil, abʼan nikineʼril chanchan tawiʼ maakʼaʼ ninʼok wiʼ naq wankin saʼ eeyanq. 2 Naq tinwulaq, nawoybʼeni naq ak xeʼxjal xnaʼlebʼ li nekeʼxkʼoxla naq laaʼo naqabʼeresi qibʼ joʼ naxbʼeresi ribʼ li ruuchichʼochʼ ut chi joʼkan inkʼaʼ tinqʼusebʼ chi kaw. 3 Xbʼaan naq, usta wanko saʼ li ruuchichʼochʼ aʼin, inkʼaʼ nokooyalok joʼ nekeʼyalok ebʼ li qas qiitzʼin re li ruuchichʼochʼ. 4 Laaʼo inkʼaʼ nokooyalok joʼ nekeʼyalok ebʼ li soldaad, abʼan li naxkʼe qe li Yos kʼajoʼ xkawil ut nakʼanjelak re xjukʼbʼal li xeʼinbʼil chiʼus. 5 Xbʼaan naq yooko xjukʼbʼal ebʼ li bʼalaqʼil naʼlebʼ ut chixjunil li naramok chiruhebʼ li qas qiitzʼin xnawbʼal ru li Yos. Ut yooko xchapbʼal li junjunq chi kʼaʼuxej joʼ jun laj preex re naq t-abʼinq chiru li Kriist. 6 Ut yooko xkawresinkil qibʼ re xkʼebʼal chi xtojbʼal xmaak li inkʼaʼ naʼabʼink, ut tqabʼaanu aʼin naq ak xeekʼutbʼesi chi tzʼaqal re ru naq nekexʼabʼink.
7 Laaʼex nekeʼxraqok aatin saʼ xkʼabʼaʼ li nekeeril, wi junaq li qas qiitzʼin chʼolchʼo chiru naq re li Kriist, chixkʼehaq xchʼool chi xkʼoxlankil wiʼ chik li naʼlebʼ aʼin. Joʼ naq aʼan re li Kriist, laaʼo ajwiʼ. 8 Li Qaawaʼ kixkʼe qawankil re xkawresinkil leepaabʼal ut inkʼaʼ re eejukʼbʼal, usta tinnima wibʼ bʼayaq xbʼaan li wankil li xqakʼul inkʼaʼ raj tinxutaanaq. 9 Abʼan inkʼaʼ nawaj naq teekʼoxla naq nawaj eesebʼesinkil rikʼin li hu li nintzʼiibʼa eere. 10 Wankebʼ nekeʼxye: «Li esilhu li naxtzʼiibʼa wank xwankil ut wank xyaalal, abʼan naq wank saʼ qayanq inkʼaʼ nakʼutunk naq wank xwankil ut maakʼaʼ naʼok wiʼ li raatin». 11 Li nayeehok re aʼin, chiwanq saʼ xchʼool naq li naqaye saʼebʼ li esilhu naq moko wanko ta saʼ xyanqebʼ, aʼan ajwiʼ tqabʼaanu naq wanqo chiruhebʼ. 12 Laaʼo inkʼaʼ naru naqaye naq juntaqʼeeto rikʼinebʼ li nekeʼxnima ribʼ ut inkʼaʼ naqabʼis qibʼ rikʼin li nekeʼxbʼaanu. Aʼanebʼ nekeʼxbʼis ribʼ rikʼin li nekeʼxkʼoxla naq us. Aʼin naxkʼutbʼesi naq maakʼaʼ nekeʼxtaw ru.
13 Laaʼo inkʼaʼ tqanima qibʼ rikʼin li kʼanjel li inkʼaʼ xqabʼaanu. Abʼan tqanima qibʼ rikʼin li kʼanjel li xqakʼul rikʼin li Yos. Ut saʼ li kʼanjel aʼin wankex ajwiʼ laaʼex. 14 Naq xoowulak eerikʼin, inkʼaʼ xqabʼaanu junaq li kʼanjel li inkʼaʼ kʼebʼil qe xbʼaan li Yos. Abʼan laaʼo xbʼeenwa xqakʼe cheenaw li chaabʼil esil chirix li Kriist. 15 Inkʼaʼ, moko yooko ta xnimankil qibʼ rikʼin li kʼanjel li inkʼaʼ xqabʼaanu, aʼin naraj xyeebʼal, li xkʼanjelebʼ li junchʼol. Naqoybʼeni bʼan naq tkʼiiq leepaabʼal ut chi joʼkan li kʼanjel li xqabʼaanu chaq inkʼaʼ tixkanabʼ kʼiik saʼ eeyanq. Kaʼajwiʼ chi joʼkan tooruuq xkʼebʼal xtzʼaqobʼ li qakʼanjel. 16 Laaʼo naqaj xkʼebʼal chi naweʼk li chaabʼil esil saʼebʼ li teep li najt wank eerikʼin re naq inkʼaʼ tqanima qibʼ chirix li xkʼanjelebʼ li junchʼol. 17 «Abʼan li naxnima ribʼ, chixnimaq ribʼ saʼ xkʼabʼaʼ li Jehobʼa».* 18 Xbʼaan naq li nakʼulubʼaak maawaʼ li naxnima ribʼ xjunes, li nakʼulubʼaak bʼan aʼan li nanimaak ru xbʼaan li Jehobʼa.*