1 Corintios
6 Wi wank eechʼaʼajkilal rikʼin leerechpaabʼanel, kʼaʼut nekexxik saʼebʼ li raqlebʼaal aatin rikʼinebʼ li inkʼaʼ nekeʼpaabʼank ut inkʼaʼ nekexxik rikʼinebʼ li santil paabʼanel? 2 Ma inkʼaʼ nekeenaw naq ebʼ li santil paabʼanel teʼraqoq aatin saʼ xbʼeen li ruuchichʼochʼ? Ut wi laaʼex texraqoq aatin saʼ xbʼeen li ruuchichʼochʼ, kʼaʼut inkʼaʼ nekexruuk xtuqubʼankil ru ebʼ li chʼaʼajkilal li moko nim ta ru? 3 Ma inkʼaʼ nekeenaw naq tooraqoq aatin saʼ xbʼeenebʼ li ánjel? Wi joʼkan, kʼaʼut inkʼaʼ nekeenaw xtuqubʼankil ru ebʼ li chʼaʼajkilal li moko nim ta ru? 4 Joʼkan naq wi tento teetuqubʼ leechʼaʼajkilal, kʼaʼut nekexxik rikʼinebʼ laj raqol aatin li moko wankebʼ ta saʼ li chʼuut? 5 Ninye eere aʼin re naq tchalq eexutaan. Ma maakʼaʼ tabʼiʼ saʼ eeyanq jun li winq li wank xnaʼlebʼ li truuq xtuqubʼankil ru ebʼ li xchʼaʼajkilal li rechpaabʼanel? 6 Abʼanan, jun laj paabʼanel naxkʼam li rechpaabʼanel saʼ li raqlebʼaal aatin re naq li maawaʼebʼ aj paabʼanel teʼraqoq aatin saʼ xbʼeenebʼ.
7 Naq nekeekʼam leeras eeriitzʼin saʼ li raqlebʼaal aatin, nekeekʼe eeribʼ saʼ xutaan. Kʼaʼut inkʼaʼ nekeekuy naq leerechpaabʼanel nekeʼmaakobʼk cheeru? Us raj naq teʼkanaaq rikʼin li kʼaru eere. 8 Laaʼex bʼan nekeebʼaanu li maaʼusilal rehebʼ leerechpaabʼanelil ut nekeekʼam li kʼaru rehebʼ.
9 Ma inkʼaʼ nekeenaw naq li nekeʼxbʼaanu li inkʼaʼ us inkʼaʼ teʼrechani li Xʼawabʼejilal li Yos? Meebʼalaqʼi eeribʼ!* Ebʼ li qas qiitzʼin li nekeʼxmux ribʼ,* li nekeʼxloqʼoni li pechʼbʼil yos,* li nekeʼmuxuk sumlaak,* ebʼ li winq li nekeʼxkʼayi ribʼ,* ebʼ li winq li nekeʼwank rikʼin rechwinqilal* 10 ebʼ li nekeʼelqʼak, ebʼ li nekeʼxrahi ru li inkʼaʼ us, ebʼ li nekeʼkalaak, ebʼ li nekeʼhobʼok, ebʼ li nekeʼxbʼalaqʼi li junchʼol inkʼaʼ teʼrechani li Xʼawabʼejilal li Yos. 11 Abʼanan, wiibʼ oxibʼ eere joʼkan xexnaʼlebʼak chaq. Abʼan anaqwan xexchʼajobʼresiik ut xexsantobʼresiik, xyeemank naq tiik leechʼool saʼ xkʼabʼaʼ li Qaawaʼ Jesukriist ut saʼ xkʼabʼaʼ li xsantil musiqʼej li Qayos.
12 Chixjunil naru ninbʼaanu, abʼan moko chixjunil ta chaabʼil. Chixjunil naru ninbʼaanu, abʼan moko tinkanabʼ ta naq aʼin ttaqlanq saʼ inbʼeen. 13 Li tzekemq choʼq re li saʼej ut li saʼej choʼq re li tzekemq. Abʼan li Yos tixsach li tzekemq ut li saʼej. Ut li tibʼelej maawaʼ choʼq re li muxuk ibʼ* re bʼan li Qaawaʼ, ut li Qaawaʼ re li tibʼelej. 14 Abʼan li Yos kixwaklesi chi yoʼyo li Qaawaʼ ut tooxwaklesi chi yoʼyo laaʼo saʼ xyanqebʼ li kamenaq rikʼin li xwankilal.
15 Ma inkʼaʼ nekeenaw naq leetibʼel aʼan xchaʼal li xtibʼel li Kriist? Ma us naq tinmaqʼ ebʼ li xchaʼal li xtibʼel li Kriist ut tinjunaji rikʼin jun li ixq li naxkʼayi ribʼ? Chʼolchʼo naq inkʼaʼ! 16 Ma inkʼaʼ nekeenaw naq li naxmux ribʼ rikʼin jun li ixq li naxkʼayi ribʼ junebʼ chik chi tibʼelej nekeʼkanaak? Xbʼaan naq li Yos naxye: «Saʼ kabʼichal junajaqebʼ chik chi tibʼelej». 17 Abʼan li naxjunaji ribʼ rikʼin li Qaawaʼ, junaj ru li xkʼaʼuxl rikʼin. 18 Elelinqex chiru li muxuk ibʼ!* Li qas qiitzʼin li naxbʼaanu junaq chik li maak inkʼaʼ namaakobʼk chiru li xtibʼel. Abʼan li naxyuʼami li muxuk ibʼ* namaakobʼk chiru li xtibʼel. 19 Ma inkʼaʼ nekeenaw naq leetibʼel aʼan rochoch li santil musiqʼej li wank eerikʼin ut kʼebʼil eere xbʼaan li Yos? Joʼkan ajwiʼ, moko eere ta leetibʼel 20 xbʼaan naq li Yos xexloqʼ ut terto kitojok cheerix. Joʼkan bʼiʼ, oksimaq leetibʼel re xkʼebʼal xloqʼal li Yos.