Juan

7 Chirix chik aʼin, li Jesús kikanaak saʼ xteepal Galilea ut inkʼaʼ kiraj xik saʼ xteepal Judea xbʼaan naq ebʼ laj judiiy yookebʼ xsikʼbʼal chanru teʼxkamsi. 2 Joʼkan bʼiʼ, yook chaq chi nachʼok li ninqʼe li nekeʼxbʼaanu chaq ebʼ laj judiiy saʼebʼ li Kokʼ Ochoch. 3 Joʼkan naq ebʼ li riitzʼin xeʼxye re: «Elen arin ut ayu Judea re naq li nekeʼtaqenk aawe teʼril ajwiʼ li nakaabʼaanu. 4 Naq junaq li qas qiitzʼin naraj naq chixjunilebʼ teʼxnaw ru, maakʼaʼ naxbʼaanu saʼ muqmu. Wi nakaabʼaanu aʼin, bʼaanu chiru chixjunilebʼ li qas qiitzʼin». 5 Relik chi yaal naq ebʼ li riitzʼin moko nekeʼxpaabʼ ta. 6 Tojaʼ naq li Jesús kixye rehebʼ: «Linhoonal toj maajiʼ nawulak, abʼan laaʼex naru nekeebʼaanu aʼin yalaq joqʼe. 7 Maakʼaʼ xyaalal naq li ruuchichʼochʼ xikʼ texril, abʼan laaʼin xikʼ nikinril xbʼaan naq ninkʼe chi naweʼk li maaʼusilal li naxbʼaanu. 8 Taqenqex saʼ li ninqʼe. Laaʼin toj maajiʼ tintaqeʼq saʼ li ninqʼe aʼin xbʼaan naq toj maajiʼ nawulak linhoonal». 9 Kixye aʼin rehebʼ ut kikanaak Galilea.

10 Abʼanan, naq ak xeʼtaqeʼk ebʼ li riitzʼin saʼ li ninqʼe, kitaqeʼk ajwiʼ aʼan, abʼan maaʼani kiʼilok re xbʼaan naq kixbʼaanu saʼ muqmu. 11 Joʼkan naq ebʼ laj judiiy xeʼok xsikʼbʼal saʼ li ninqʼe ut xeʼxye: «Bʼar wank li winq?». 12 Saʼ xyanq li kʼiila tenamit naabʼalebʼ nekeʼjasjotk chirix. Wankebʼ nekeʼxye: «Aʼan chaabʼil winq». Jalanebʼ chik xeʼxye: «Moko chaabʼil winq ta. Xbʼalaqʼinkilebʼ li qas qiitzʼin naxbʼaanu». 13 Abʼan, maaʼani naʼaatinak chirix chiruhebʼ li qas qiitzʼin xbʼaan naq nekeʼxxuwa ebʼ laj judiiy.

14 Naq ak yook li ninqʼe, li Jesús kitaqeʼk saʼ rochoch li Yos ut kiʼok chi kʼutuk. 15 Sachsokebʼ xchʼool xeʼkanaak ebʼ laj judiiy ut xeʼok xyeebʼal: «Chanru naxnaw naabʼal chirix li Raatin li Yos li winq aʼin wi moko xwank ta saʼebʼ li tzolebʼaal?».* 16 Tojaʼ naq li Jesús kixye rehebʼ: «Li ninkʼut moko we ta, re bʼan li kitaqlank chaq we. 17 Wi junaq naraj xbʼaanunkil li rajom li Yos, tixnaw ma rikʼin li Yos chalenaq li ninkʼut malaj chalenaq saʼ linkʼaʼuxl. 18 Wi junaq li qas qiitzʼin naxkʼut li wank saʼ xkʼaʼuxl naxsikʼ xloqʼal xjunes, abʼan li naxsikʼ li loqʼal choʼq re li kitaqlank chaq re naxye li yaal ut chixjunil naxbʼaanu saʼ tiikilal. 19 Peʼyaal naq laj Moisés kixkʼe eere li Chaqʼrabʼ? Abʼan maaʼani eere naxpaabʼ li Chaqʼrabʼ. Kʼaʼut nekeeraj inkamsinkil?». 20 Li kʼiila tenamit kixye re: «Maaʼus aj musiqʼej wank aawikʼin! Ani naraj aakamsinkil?». 21 Tojaʼ naq li Jesús kixye rehebʼ: «Jun ajwiʼ li naʼlebʼ xinbʼaanu ut sachso eechʼool xexkana. 22 Kʼoxlamaq aʼin: laj Moisés kixye naq teeset xtzʼuumal xtzʼejwal junaq li qas qiitzʼin (usta yaal naq li naʼlebʼ aʼin moko chalenaq ta rikʼin laj Moisés, chalenaq bʼan rikʼinebʼ leexeʼtoon) ut laaʼex nekeeset xtzʼuumal xtzʼejwal junaq li winq saʼ sábado.* 23 Wi nekeebʼaanu aʼin saʼ sábado* re naq inkʼaʼ teeqʼet Xchaqʼrabʼ laj Moisés, kʼaʼut qʼaxal nekexjosqʼoʼk wikʼin naq ninkʼirtasi li xtibʼel jun li winq saʼ sábado?* 24 Kanabʼomaq raqok aatin xbʼaan li nekeeril: texraqoq bʼan aatin saʼ tiikilal».

25 Tojaʼ naq wiibʼ oxibʼ aj Jerusalén xeʼok xyeebʼal: «Ma maawaʼ tabʼiʼ aʼin li winq li nekeʼraj xkamsinkil? 26 Abʼan, kʼehomaq reetal, yook chi aatinak chiru chixjunilebʼ ut maakʼaʼ nekeʼxye re. Ma ak xeʼxkʼulubʼa li nekeʼjolomink qe naq aʼan li Kriist? 27 Abʼan laaʼo inkʼaʼ tqakʼulubʼa, laaʼo naqanaw bʼar chalenaq li winq aʼin ut naq tchalq li Kriist maaʼani tnawoq re bʼar chalenaq». 28 Naq li Jesús yook chi kʼutuk saʼ li rochoch li Yos, kixye chi kaw xyaabʼ xkux: «Laaʼex nekeenaw wu ut nekeenaw bʼar chalenaqin. Abʼan moko xintaqla ta chaq wibʼ injunes. Relik chi yaal naq yoʼyo li kitaqlank chaq we, ut laaʼex inkʼaʼ nekeenaw ru. 29 Laaʼin ninnaw ru xbʼaan naq xinchalk joʼ ruuchil ut aʼan kitaqlank chaq we». 30 Joʼkan naq xeʼok xsikʼbʼal chanru teʼxchap, abʼan maaʼani kiruuk xbʼaanunkil aʼin xbʼaan naq toj maajiʼ nawulak xhoonalil. 31 Usta joʼkan, naabʼalebʼ li wankebʼ aran xeʼok xpaabʼankil ut xeʼxye: «Naq tchalq li Kriist, peʼyaal naq aʼan inkʼaʼ tixbʼaanu naabʼal chik li sachbʼachʼoolej chiru li kixbʼaanu li winq aʼin?».

32 Ebʼ laj pariseey xeʼrabʼi naq li tenamit nekeʼjasjotk chirix li Jesús. Joʼkan naq ebʼ laj pariseey ut ebʼ li xbʼeenil aj tij xeʼxtaqla ebʼ laj kʼaakʼalenel chi xchapbʼal. 33 Tojaʼ naq li Jesús kixye rehebʼ li qas qiitzʼin: «Toj tinwanq jun kʼamokaq chik eerikʼin, tojaʼ naq tinxik rikʼin li kitaqlank chaq we. 34 Laaʼex tineesikʼ abʼan inkʼaʼ tineetaw. Laaʼex inkʼaʼ texruuq chi xik bʼarwiʼ wanqin». 35 Tojaʼ naq ebʼ laj judiiy xeʼok xyeebʼal chiribʼilebʼ ribʼ: «Bʼar naxkʼoxla xik li winq aʼin re naq inkʼaʼ tooruuq xtawbʼal? Ma inkʼaʼ tawiʼ yook xkʼoxlankil xik rikʼinebʼ laj judiiy li wankebʼ saʼ xyanqebʼ laj griego ut xtzolbʼalebʼ laj griego? 36 Kʼaru kiraj xyeebʼal naq kixye “Laaʼex tineesikʼ abʼan inkʼaʼ tineetaw. Laaʼex inkʼaʼ texruuq chi xik bʼarwiʼ wanqin”?».

37 Saʼ xraqik li ninqʼe, saʼ xnimal xkutankil li ninqʼe, kixaqli li Jesús ut chi kaw xyaabʼ xkux kixye: «Wi junaq tchaqiq re, chalqaq wikʼin ut chiʼukʼaq. 38 Wi junaq nikinxpaabʼ, “t-elq chaq saʼ xchamal xchʼool naabʼal li haʼ li nakʼehok yuʼam”, joʼ naxye li Raatin li Yos». 39 Naq kixye aʼin, yook chi aatinak chirix li santil musiqʼej li teʼxkʼul li teepaabʼanq re. Saʼ li kutan aʼan toj maajiʼ nekeʼxkʼul li santil musiqʼej xbʼaan naq toj maajiʼ naxkʼul xloqʼal li Jesús. 40 Naq xeʼrabʼi ebʼ li aatin aʼin, wiibʼ oxibʼ rehebʼ li qas qiitzʼin xeʼok xyeebʼal: «Chʼolchʼo tzʼaqal naq aʼin li Propeet». 41 Wankebʼ xeʼxye: «Aʼin li Kriist». Abʼan jalanebʼ chik xeʼxye: «Li Kriist inkʼaʼ naru nachalk Galilea, peʼyaal? 42 Ma inkʼaʼ tabʼiʼ naxye li Raatin li Yos naq li Kriist t-elq chaq saʼ li xjunkabʼal laj David ut tchalq Belén saʼ xkʼalebʼaal laj David?». 43 Joʼkan naq ebʼ li qas qiitzʼin inkʼaʼ chik nekeʼxkʼe ribʼ saʼ aatin saʼ xkʼabʼaʼ aʼan. 44 Ut wankebʼ xeʼraj xchapbʼal abʼan maaʼani kiruuk xbʼaanunkil.

45 Tojaʼ naq ebʼ laj kʼaakʼalenel xeʼsutqʼiik rikʼinebʼ li xbʼeenil aj tij ut rikʼinebʼ laj pariseey. Ut ebʼ laj pariseey xeʼxpatzʼ rehebʼ: «Kʼaʼut inkʼaʼ xeekʼam chaq?». 46 Ebʼ laj kʼaakʼalenel xeʼxye: «Maajunwa kiʼaatinak junaq winq joʼ aʼan». 47 Abʼan ebʼ laj pariseey xeʼxye rehebʼ: «Ma inkʼaʼ tawiʼ xexbʼalaqʼiik ajwiʼ laaʼex? 48 Ma wank tabʼiʼ junaq rehebʼ li nekeʼjolomink qe malaj junaq rehebʼ laj pariseey li ak xeʼok xpaabʼankil? 49 Abʼan li Yos moko sa ta saʼ xchʼool rikʼinebʼ li qas qiitzʼin aʼin li inkʼaʼ nekeʼxnaw li Chaqʼrabʼ». 50 Li winq li kiwulak rubʼelaj chi rilbʼal li Jesús aj Nicodemo xkʼabʼaʼ ut natzʼakonk saʼ xyanqebʼ, kixye rehebʼ: 51 «Joʼ naxye li Qachaqʼrabʼ, inkʼaʼ naru naraqmank aatin saʼ xbʼeen junaq li qas qiitzʼin wi toj maajiʼ naʼabʼiik ut nanawmank chiʼus li yook xbʼaanunkil, peʼyaal?». 52 Naq xeʼrabʼi aʼin xeʼxye re: «Maawaʼat ajwiʼ aj Galilea, peʼyaal? Tzʼil rix ut taakʼe reetal naq aran Galilea inkʼaʼ naru naʼelk chaq junaq li propeet».*