Juan
20 Saʼ li xbʼeen kutan re li xamaan li xMaría Magdalena xkoho eqʼla saʼ li muqlebʼaal, naq toj qʼoqyink ajwiʼ, ut kiril naq isinbʼil li pek chire li muqlebʼaal kamenaq. 2 Joʼkan naq xkoho saʼ aanil chi rilbʼal laj Simón Pedro ut li jun chik tzolom, li naraheʼk chaq xbʼaan li Jesús, ut kixye rehebʼ: «Xeʼrisi Linqaawaʼ saʼ li muqlebʼaal kamenaq ut xeʼxkʼam, ut inkʼaʼ naqanaw bʼar xeʼxkʼe!».
3 Tojaʼ naq laj Pedro ut li jun chik tzolom xkohebʼ saʼ li muqlebʼaal. 4 Saʼ wiibʼal xkohebʼ saʼ aanil. Abʼan li jun chik tzolom qʼaxal kaw wiʼ chik kiʼaanilak chiru laj Pedro ut aʼan li kiwulak xbʼeenwa saʼ li muqlebʼaal kamenaq. 5 Naq kixkʼutzʼubʼ ribʼ re rilbʼal chisaʼ li muqlebʼaal kamenaq kiril aran li tʼikr re liin, abʼan inkʼaʼ kiʼok. 6 Tojaʼ naq laj Simón Pedro, li yook chaq chirix, kiwulak ajwiʼ ut kiʼok saʼ li muqlebʼaal. Ut aran kiril li tʼikr re liin. 7 Li tʼikr li xeʼxlan wiʼ xjolom li Jesús moko wank ta chik saʼ xyanq li peraasinbʼil tʼikr, qʼochinbʼil bʼan ut kʼebʼil saʼ jalan chik naʼaj. 8 Chirix chik aʼan kiʼok ajwiʼ li jun chik tzolom, li kiwulak xbʼeenwa saʼ li muqlebʼaal kamenaq, kiril ut kixpaabʼ. 9 Abʼan toj maajiʼ nekeʼxtaw ru li xraqal li Raatin li Yos li naxye naq tento twaklesiiq chi yoʼyo saʼ xyanqebʼ li kamenaq. 10 Joʼkan naq ebʼ li xtzolom li Jesús xeʼsutqʼiik wiʼ chik saʼ rochochebʼ.
11 Abʼan li xMaría xaqxo kikanaak chirix li muqlebʼaal, yook chi yaabʼak chixkʼatq li muqlebʼaal. Naq yook chi yaabʼak kixkʼutzʼubʼ ribʼ re rilbʼal xsaʼ li muqlebʼaal kamenaq 12 ut kiril wiibʼ li ánjel, tiqtokebʼ rikʼin saqi tʼikr, chunchukebʼ bʼarwiʼ kijilibʼaak li Jesús, jun chi xjolom ut jun chi roq. 13 Ebʼ aʼan xeʼxpatzʼ re: «At ixq, kʼaʼut yookat chi yaabʼak?». Kichaqʼok ut kixye: «Xbʼaan naq xeʼxkʼam Linqaawaʼ ut inkʼaʼ ninnaw bʼar xeʼxkʼe». 14 Naq ak kixye aʼin kixbʼalqʼusi ribʼ ut kiril naq aran xaqxo li Jesús abʼan inkʼaʼ kixnaw ru naq aʼan. 15 Li Jesús kixpatzʼ re: «At ixq, kʼaʼut yookat chi yaabʼak? Ani nakaasikʼ?» Saʼ xchʼool li xMaría naq aʼan laj ilol uutzʼuʼuj joʼkan naq kixye re: «Qaawaʼ, wi laaʼat xatkʼamok re, ye we bʼar xaakʼe ut laaʼin tinkʼam». 16 «María!», chan li Jesús re. Aʼan kixbʼalqʼusi ribʼ ut kixye re saʼ hebreo: «Rabbóni!» (li naraj xyeebʼal «kʼutunel»). 17 Li Jesús kixye re: «Kanabʼ xchapbʼal aawibʼ wikʼin xbʼaan naq toj maajiʼ nintaqeʼk rikʼin li Yuwaʼbʼej. Ayu bʼarwiʼ wankebʼ li wiitzʼin ut ye rehebʼ: “Tintaqeʼq rikʼin Linyuwaʼ ut Leeyuwaʼ, Linyos ut Leeyos”». 18 Li xMaría Magdalena xkoho rikʼinebʼ li xtzolom li Jesús ut kixye rehebʼ: «Xwil ru li Qaawaʼ!». Ut kixye rehebʼ chixjunil li kiyeeheʼk re xbʼaan li Jesús.
19 Ak xʼewuuk chik saʼ li kutan aʼan ut xbʼeen kutan re li xamaan. Saʼ xkʼabʼaʼ naq ebʼ li tzolom nekeʼxxuwa ebʼ laj judiiy xeʼxtzʼap rikʼin laaw li okebʼaal bʼarwiʼ chʼutchʼukebʼ. Tojaʼ naq li Jesús kutamil saʼ xyanqebʼ ut kixye rehebʼ: «Nawoybʼeni naq us wankex».* 20 Naq ak kixye aʼin, kixkʼut chiruhebʼ xkabʼichal li ruqʼ ut chixkʼatq xsaʼ. Ut ebʼ li xtzolom qʼaxal xeʼsahoʼk xchʼool naq xeʼril li Qaawaʼ. 21 Li Jesús kixye wiʼ chik rehebʼ: «Nawoybʼeni naq us wankex.* Joʼ naq li Yuwaʼbʼej xinxtaqla chaq joʼkan ajwiʼ texintaqla laaʼin». 22 Naq ak kixye aʼin kiʼapunk saʼ xbʼeenebʼ ut kixye rehebʼ: «Kʼulumaq li santil musiqʼej. 23 Wi laaʼex nekeekuy xmaak junaq li qas qiitzʼin, kuybʼilaq li xmaak; abʼan wi inkʼaʼ nekeekuy xmaak, inkʼaʼ kuybʼilaq li xmaak».
24 Abʼan jun rehebʼ li Kabʼlaju aʼ laj Tomás, li nekeʼxye Lut re, moko wank ta saʼ xyanqebʼ naq kiwulak li Jesús. 25 Joʼkan naq ebʼ li junchʼol chi tzolom xeʼxye re: «Xqil li Qaawaʼ!». Aʼan kixye rehebʼ: «Re naq tinpaabʼ, nawaj rilbʼal li reetalil li klawx saʼ ruqʼ ut tinchʼik li ruʼuj wuqʼ saʼ xkʼobʼolal li klawx ut tinchʼik li wuqʼ chixkʼatq xsaʼ. Wi inkʼaʼ, moko tinpaabʼ ta».
26 Joʼkan bʼiʼ, naq xnumeʼk waqxaqibʼ kutan, ebʼ li xtzolom chʼutchʼukebʼ wiʼ chik saʼ ochoch, ut laj Tomás wank rikʼinebʼ. Usta wank saʼ laaw li okebʼaal, kutamil li Jesús saʼ xyanqebʼ ut kixye rehebʼ: «Nawoybʼeni naq us wankex».* 27 Chirix chik aʼan kixye re laj Tomás: «Kʼe laawuqʼ arin ut il li wuqʼ; kʼam chaq laawuqʼ ut chʼik chixkʼatq linsaʼ. Paabʼ naq xinwaklesiik chi yoʼyo. Kʼaʼut inkʼaʼ nakaapaabʼ aʼin?». 28 Tojaʼ naq laj Tomás kixye re: «At Inqaawaʼ, at Inyos». 29 Li Jesús kixye: «Ma xaapaabʼ xbʼaan naq xinʼaawil? Sahebʼ saʼ xchʼool li nekeʼxpaabʼ usta inkʼaʼ xeʼril».
30 Joʼkan ajwiʼ li Jesús kixbʼaanu naabʼal chik li sachbʼachʼoolej chiruhebʼ li xtzolom li moko tzʼiibʼanbʼil ta saʼ li bʼotbʼilhu aʼin. 31 Abʼan kitzʼiibʼamank aʼin re naq teepaabʼ naq li Jesús aʼan li Kriist, li Ralal li Yos ut xbʼaan naq nekeepaabʼ twanq eeyuʼam chi junelik.