Hebreos
7 Xbʼaan naq laj Melquisedec aʼin, awabʼej re Salem ut aj tij chiru li Nimajwal Yos, kiʼelk chaq chi xkʼulbʼal laj Abrahán naq yook chaq chi sutqʼiik chi xkamsinkilebʼ li awabʼej; laj Melquisedec kirosobʼtesi 2 ut laj Abrahán kixkʼe* re li xlajeetqil chixjunil li kʼaru re. Li kʼabʼaʼej Melquisedec najalmank ru joʼ «xʼawabʼej li tiikilal»; aʼan ajwiʼ awabʼej re Salem, aʼin naraj xyeebʼal «xʼawabʼej li tuqtuukilal». 3 Inkʼaʼ nanawmank ani li xnaʼ ut li xyuwaʼ chi moko nanawmank ta li kitzʼiibʼamank chirix li xkʼabʼaʼ ebʼ li xxeʼtoon, joqʼe kiyoʼlaak ut joqʼe kikamk. Saʼ xkʼabʼaʼ aʼin chanchan Ralal li Yos ut aʼan junelik twanq choʼq aj tij.
4 Qʼaxal wank chaq xwankil li winq aʼin! Joʼkan naq laj Abrahán, li qaxeʼtoon,* kixkʼe re li winq aʼin li xchaabʼilal ru li xlajeetqil li kʼaʼaq re ru li kirechani saʼ li yalok. 5 Yaal naq ebʼ li ralal xkʼajol laj Leví nekeʼxaqabʼaak choʼq aj tij, li Chaqʼrabʼ naxye naq tento teʼxpatzʼ li xlajeetqil li kʼaʼaq re ru re li tenamit, aʼin naraj xyeebʼal ebʼ li riitzʼin, usta ebʼ aʼin ralal xkʼajol laj Abrahán. 6 Abʼan li winq aʼin li inkʼaʼ chalenaq rikʼin ralal xkʼajol laj Leví, kixkʼul li xlajeetqil li kʼaru re laj Abrahán ut kirosobʼtesi li kikʼemank re li yeechiʼom. 7 Ut maaʼani naru naxye naq tikʼtiʼ naq li asbʼej kirosobʼtesi li iitzʼinbʼej. 8 Joʼkan ajwiʼ, ebʼ laj Leví li nekeʼkʼuluk re li xlajeetqil li kʼaʼaq re ru yal winqebʼ ut nekeʼkamk, abʼanan li raatin li Yos naxkʼe chi naweʼk naq li jun chik winq li kixkʼul li xlajeetqil li kʼaʼaq re ru yoʼyo. 9 Ut naru nayeemank ajwiʼ naq laj Leví, li nakʼuluk re li xlajeetqil li kʼaʼaq re ru, ak xtoj li xlajeetqil li kʼaʼaq re ru saʼ xkʼabʼaʼ laj Abrahán 10 xbʼaan naq laj Leví toj maajiʼ nayoʼlaak rikʼin li xxeʼtoon naq laj Melquisedec kiʼelk chaq chi xkʼulbʼal laj Abrahán.
11 Li kʼanjel li nekeʼxbʼaanu ebʼ laj tij, li chalenaqebʼ saʼ xjunkabʼal laj Leví, wank chaq saʼ xyanq li Xchaqʼrabʼ laj Moisés li kikʼemank rehebʼ laj Israel. Wi teʼruuq raj ebʼ laj tij aʼin xbʼaanunkil naq tzʼaqalaq re ru li xyuʼamebʼ li qas qiitzʼin, ma kiʼajmank raj chiqu jun laj tij joʼ laj Melquisedec?, ma inkʼaʼ raj tzʼaqal rikʼin jun laj tij joʼ laj Aarón? 12 Saʼ xkʼabʼaʼ naq yook chi jalaak li xkʼanjelebʼ laj tij, naʼajmank ajwiʼ xjalbʼal li Chaqʼrabʼ. 13 Xbʼaan naq li winq li yooko wiʼ chi aatinak chalenaq saʼ jalan chik li teep ut maajun li qas qiitzʼin re li teep aʼin ak xkʼanjelak saʼ xnaʼaj li mayej.* 14 Ut chʼolchʼo naq li Qaawaʼ aʼan chaq jun rehebʼ li ralal xkʼajol laj Judá. Ut laj Moisés inkʼaʼ kixye naq teʼwanq ebʼ aj tij saʼ li teep aʼin.
15 Ut nachʼolaak chiʼus aʼin naq nawank jun chik laj tij joʼ laj Melquisedec, 16 li nakʼanjelak choʼq aj tij, abʼan moko xbʼaan ta naq chalenaq saʼ li teep li tenebʼanbʼil saʼ li chaqʼrabʼ, wank bʼan choʼq aj tij xbʼaan naq rikʼin wank li wankil li naxbʼaanu naq inkʼaʼ t-osoʼq li xyuʼam. 17 Saʼ jun xtasal li raatin li Yos kiyeemank: «Laaʼat aj tij joʼ laj Melquisedec ut junelik tatwanq choʼq aj tij».
18 Li Yos kixsach xwankil li taql li xwank rubʼelaj xbʼaan naq wank wiibʼ oxibʼ li naʼlebʼ li inkʼaʼ naru xbʼaanunkil ut inkʼaʼ naru qatenqʼankil. 19 Xbʼaan naq li Chaqʼrabʼ inkʼaʼ kixaqabʼamank re risinkil chi junajwa li maak, abʼan li naxkʼam chaq li Yos qʼaxal us ut aʼin li yooko roybʼeninkil, naxbʼaanu naq chixjunil tzʼaqalaq re ru ut saʼ xkʼabʼaʼ aʼin nokoojilok chixkʼatq li Yos. 20 Joʼkan ajwiʼ, li Yos kixkʼe li raatin naq kixbʼaanu aʼin 21 (xbʼaan naq wankebʼ winq li xeʼok choʼq aj tij ut li Yos inkʼaʼ kixkʼe li raatin chirixebʼ, abʼan li Yos kixkʼe li raatin chirix jun li winq li xʼok choʼq aj tij naq kixye «Li Jehobʼa* kixkʼe li raatin ut inkʼaʼ tixjal ru li kixye: “Laaʼat junelik tatwanq choʼq aj tij”»). 22 Li Jesús aʼan li eetalil li nakʼutbʼesink re, naq jun li sumwank li qʼaxal chaabʼil ttzʼaqloq ru. 23 Joʼkan ajwiʼ, saʼ xkʼabʼaʼ naq li kamk naramok rehebʼ laj tij chi xbʼaanunkil li kʼanjel, kiʼajmank naabʼalebʼ laj tij li teʼkanaaq saʼ xnaʼaj li yookebʼ chi kamk. 24 Abʼan, saʼ xkʼabʼaʼ naq aʼan maajunwa tkamq, maaʼani t-oq choʼq reqaj saʼ li xkʼanjel joʼ aj tij. 25 Joʼkan naq aʼan kawresinbʼil ajwiʼ re xkolbʼalebʼ chi tzʼaqal re ru li nekeʼjilok chixkʼatq li Yos saʼ xkʼabʼaʼ aʼan xbʼaan naq junelik yoʼyo re naq ttzʼaamanq chirixebʼ chiru li Yos.
26 Xbʼaan naq naqaj jun xyuwaʼil aj tij joʼ aʼan: naxloqʼoni li Yos chi anchal xchʼool, maajunwa naxbʼaanu li inkʼaʼ us, maakʼaʼ xtzʼajnil, moko joʼ ta ebʼ laj maak ut taqsinbʼil xwankil saʼ xbʼeen li choxa. 27 Ebʼ li xyuwaʼil aj tij nekeʼxyeechiʼi li mayejanbʼil xul wulaj wulaj, xbʼeenwa chirixebʼ li xmaak ut chirix chik aʼan chirix li xmaak li tenamit, abʼan li Jesús moko joʼ ta aʼanebʼ xbʼaan naq jun sut ajwiʼ ut maajunwa chik kixbʼaanu aʼin naq kixmayeja ribʼ. Ut li mayej aʼin nakʼanjelak re xtenqʼankilebʼ li qas qiitzʼin chi junelik. 28 Li nekeʼxaqabʼaak choʼq xyuwaʼil aj tij joʼ naxye li Chaqʼrabʼ nekeʼmaakobʼk, abʼan naq ak kixkʼe qe li Yos li Chaqʼrabʼ aʼin, kixkʼe li raatin naq tixxaqabʼ li Ralal choʼq xyuwaʼil aj tij aʼ li kitzʼaqobʼresiik chi junajwa.