Hebreos
4 Joʼkan bʼiʼ, saʼ xkʼabʼaʼ naq li Yos naxye naq toj tooruuq chi ok saʼ li xhilobʼaal, weent tqabʼaanu re naq inkʼaʼ tqatzʼeq li yeechiʼom aʼin. 2 Xbʼaan naq laaʼo ajwiʼ xeʼxkʼe chiqanaw li chaabʼil esil joʼ aʼanebʼ, abʼan aʼanebʼ moko xeʼxtaw ta rusilal li esil li xeʼrabʼi xbʼaan naq moko junaqik ta xpaabʼalebʼ rikʼinebʼ li xeʼabʼink. 3 Abʼan laaʼo li xqakʼutbʼesi li qapaabʼal, xooʼok saʼ li hilobʼaal li kiʼaatinak wiʼ naq kixye «Tojaʼ naq xinye chi chʼolchʼo ru xbʼaan linjosqʼil: “Inkʼaʼ teʼoq saʼ linhilobʼaal”», usta ak choybʼil chik li xkʼanjel chalen chaq saʼ xtiklajik li ruuchichʼochʼ. 4 Xbʼaan naq saʼ jun xraqal li raatin li Yos aʼan kixye chirix li xwuq kutan: «Ut li Yos kihilank saʼ li xwuq kutan chirix chixjunil li xbʼaanuhom». 5 Ut kixye ajwiʼ: «Inkʼaʼ teʼoq saʼ linhilobʼaal».
6 Joʼkan bʼiʼ, saʼ xkʼabʼaʼ naq toj maajiʼ nekeʼok wiibʼ oxibʼ saʼ li hilobʼaal aʼin ut li xeʼrabʼi xbʼeenwa li chaabʼil esil inkʼaʼ xeʼok saʼ xkʼabʼaʼ naq inkʼaʼ xeʼabʼink, 7 aʼan kixxaqabʼ wiʼ chik jun chik li kutan naq naxye «anaqwan» ut saʼ xkʼabʼaʼ aʼin li Yos kixye chaq junxil saʼ jun rehebʼ li xsalmo laj David li tojaʼ tyeemanq: «Wi nekeerabʼi anaqwan li xyaabʼ xkux, meekanabʼ naq leechʼool tixqʼet ribʼ». 8 Xbʼaan naq wi laj Josué kixkʼamebʼ raj saʼ jun li naʼaj re hilank, li Yos inkʼaʼ raj kiʼaatinak moqon chirix jun chik li kutan. 9 Joʼkan bʼiʼ, toj wank jun li hilobʼaal kutan joʼ li nawank chiru li sábado* choʼq re li xtenamit li Yos. 10 Xbʼaan naq li winq li xʼok saʼ xhilobʼaal li Yos ak xhilank ajwiʼ chirix li xbʼaanuhom joʼ naq li Yos kihilank naq xraqeʼk xbʼaanunkil li xkʼanjel.
11 Joʼkan naq qabʼaanuhaq chixjunil li wank saʼ quqʼ re naq tooʼoq saʼ li hilobʼaal aʼin ut re naq maaʼani t-oq chi naʼlebʼak joʼebʼ li inkʼaʼ xeʼabʼink chaq. 12 Xbʼaan naq yoʼyo li raatin li Yos ut qʼaxal wank xwankil. Qʼaxal qʼes chiru li jutzʼchʼiichʼ li kaʼpakʼal xqʼesnal. Naʼok toj saʼ xchamal xchʼool li winq re xnawbʼal kʼaru tzʼaqal wank saʼ li xchʼool ut chanru li winq chi kutankil. Nawulak saʼ xbʼaqel ut toj saʼ xchamal li xbʼaqel ut naru risinkil chi kutankil li naxkʼoxla ut li naxrahi ru li xchʼool. 13 Ut maakʼaʼ junaq li yobʼtesihom li muqmu chiru li Yos, chixjunil bʼan tʼustʼu chiru ut kutan saqenk chiru li traqoq aatin saʼ qabʼeen aʼ yaal chanru li qabʼaanuhom.
14 Li xnimal ru xyuwaʼil aj tij aʼan li Jesús, li Ralal li Yos, ut aʼan ak xʼok saʼ choxa joʼkan naq miqakanabʼ xkʼebʼal chi naweʼk chiru li komonil naq naqapaabʼ. 15 Xbʼaan naq qikʼin wank jun xyuwaʼil aj tij, li naxtaw qu naq nokoopaltoʼk, ut joʼ laaʼo, ak xyaleʼk rix saʼ chixjunil, abʼan maakʼaʼ xmaak. 16 Joʼkan bʼiʼ, choojiloq chi maakʼaʼ qaxiw chixkʼatq li xkʼojaribʼaal li Yos aʼ li naxkʼutbʼesi li xnimal rusilal re naq t-uxtaanaaq qu* ut tqakʼul qatenqʼankil saʼ xhoonalil saʼ xkʼabʼaʼ li xnimal rusilal.