1 Corintios
16 Joʼkan ajwiʼ, chirix li kubʼsiil li xqachʼutubʼ choʼq rehebʼ li santil paabʼanel, junelik teebʼaanu joʼ chanru xinye rehebʼ li chʼuut re Galacia. 2 Saʼ li xbʼeen kutan re li junjunq chi xamaan, teexok bʼayaq li kubʼsiil joʼ chanru naxkʼe ribʼ cheeru re naq moko toj tchʼutubʼamanq ta naq tinwulaq. 3 Ut naq tinwulaq aran, tintaqla Jerusalén ebʼ li winq li xexʼaatinak chirixebʼ saʼ li esilhu re naq teʼxkʼam li maatan li xeekʼe chi anchal eechʼool. 4 Abʼanan, wi naʼajmank naq tinxik ajwiʼ laaʼin, teʼxik chiwix.
5 Tinwulaq eerilbʼal naq ak xinnumeʼk Macedonia xbʼaan naq tinnumeʼq Macedonia, 6 ut maare tinkanaaq wiibʼ oxibʼ kutan malaj tinnumsi li habʼalqʼe eerikʼin, ut chi joʼkan tineekanabʼ chaq saʼ bʼe naq tinxik saʼ jalan chik naʼaj. 7 Xbʼaan naq moko nawaj ta rilbʼal eeru jun chʼina kʼamok ajwiʼ, wi li Jehobʼa* naraj, tinkanaaq eerikʼin wiibʼ oxibʼ kutan. 8 Abʼan, tinkanaaq aran Éfeso toj reetal twulaq li Ninqʼe chirix li Pentecostés 9 xbʼaan naq xteemank chiwu jun li nimla okebʼaal re xbʼaanunkil naabʼal chik linkʼanjel, abʼan naabʼalebʼ xikʼ nikineʼril.
10 Joʼkan bʼiʼ, wi twulaq laj Timoteo, teekʼe eechʼool chirix re naq inkʼaʼ txuwaq naq wanq saʼ eeyanq xbʼaan naq aʼan yook chi kʼanjelak chiru li Jehobʼa* joʼ laaʼin. 11 Joʼkan bʼiʼ, maaʼani chitzʼeqtaananq re. Kanabʼomaq chaq saʼ bʼe re naq maakʼaʼ tixkʼul ut chi joʼkan truuq chi kʼulunk wikʼin xbʼaan naq ebʼ li qechpaabʼanel ut laaʼin yooko roybʼeninkil.
12 Ut chirix laj Apolos, li qechpaabʼanel, naabʼal sut xwelaji ru re naq txik eerulaʼaninkil rochbʼeenebʼ li qechpaabʼanel. Aʼan moko yook ta xkʼoxlankil xik anaqwan, abʼan txik naq tixkʼe ribʼ chiru.
13 Junelik ajʼooq eeru, junelik kaw xaqxokex saʼ leepaabʼal, mexxuwak,* kawaq eechʼool. 14 Bʼaanumaq chixjunil rikʼin rahok.
15 Anaqwan tento tintzʼaama cheeru jun li naʼlebʼ, ex wechpaabʼanel. Laaʼex nekeenaw naq li wankebʼ saʼ rochoch laj Estéfanas aʼanebʼ li xbʼeen ru li awimq li wankebʼ Acaya ut xeʼxkʼe xchʼool chi kʼanjelak choʼq rehebʼ li santil paabʼanel. 16 Laaʼex ajwiʼ kʼehomaq eeribʼ rubʼel xwankil ebʼ li qas qiitzʼin joʼebʼ aʼin ut chixjunilebʼ li nekeʼtenqʼank ut nekeʼkʼanjelak chi kaw. 17 Nasahoʼk inchʼool naq wank arin laj Estéfanas, laj Fortunato ut laj Acaico xbʼaan naq kʼajoʼ xineʼxtenqʼa chalen naq xkohex. 18 Ebʼ aʼan xeʼxwaklesi linchʼool ut leechʼool. Joʼkan naq, kʼutbʼesimaq naq oxloqʼ cheeru ebʼ li winq joʼebʼ aʼin.
19 Ebʼ li chʼuut li wankebʼ Asia nekeʼxtaqla xsahil leechʼool. Laj Áquila ut li xPrisca joʼ ajwiʼ li chʼuut li wank saʼ rochoch, nekeʼxtaqla xsahil leechʼool joʼ li nekeʼtaqenk re li Qaawaʼ. 20 Chixjunilebʼ li qechpaabʼanel nekeʼxtaqla xsahil leechʼool. Naq teekʼe xsahil eechʼool cheeribʼil eeribʼ, teetzʼubʼ eeru.
21 Laaʼin laj Pablo, nintzʼiibʼa li sahil chʼoolejil aʼin rikʼin wuqʼ.
22 Wi junaq li qas qiitzʼin inkʼaʼ naxra li Qaawaʼ, xkʼulubʼ naq tchalq li rahilal saʼ xbʼeen. At Qaawaʼ, kim! 23 Aʼ taxaq li xnimal rusilal li Qaawaʼ Jesús chiwanq eerikʼin. 24 Kʼajoʼ nekexinra xbʼaan naq laaʼex xtzolom li Kristo Jesús.