Lucas

18 Tojaʼ naq kixkʼe jun li eetalil* re xyeebʼal rehebʼ naq aajel ru naq junelik teʼtijoq ut inkʼaʼ teʼxkanabʼ tzʼaamank. 2 Kixye rehebʼ: «Saʼ jun li tenamit wank chaq jun laj raqol aatin li inkʼaʼ naxkʼe xloqʼal li Yos chi moko naroxloqʼi ebʼ li qas qiitzʼin. 3 Ut saʼ li tenamit aʼan wank chaq ajwiʼ jun li malkaʼan li kokʼaj xsaʼ nawulak chi rilbʼal laj raqol aatin ut naxye chaq re: “Wank inchʼaʼajkilal rikʼin jun li qas qiitzʼin. Bʼaanu usilal, tenqʼaʼin, re naq us traqmanq aatin saʼ inbʼeen”. 4 Abʼanan, chiru naabʼal kutan inkʼaʼ kiraj xtenqʼankil li malkaʼan, abʼan moqon chik kiʼok xyeebʼal saʼ xchʼool: “Usta inkʼaʼ ninkʼe xloqʼal li Yos chi moko nawoxloqʼi ebʼ li qas qiitzʼin, 5 tintenqʼa li malkaʼan re naq us traqmanq aatin saʼ xbʼeen ut chi joʼkan tixkanabʼ inchʼiʼchʼiʼinkil”». 6 Ut li Qaawaʼ kixye ajwiʼ: «Kʼehomaq reetal li kixye laj raqol aatin usta maaʼus xnaʼlebʼ! 7 Joʼkan bʼiʼ, wi li Yos nim xkuyum rikʼinebʼ li sikʼbʼilebʼ ru li nekeʼxpatzʼ xtenqʼankil re chi qʼeq ut chi kutan, chanru naq inkʼaʼ tixkʼe xchʼool chirixebʼ re naq us traqmanq aatin saʼ xbʼeenebʼ? 8 Ninye eere naq li Yos tixkʼe xchʼool chirixebʼ re naq saʼ junpaat traqmanq aatin saʼ xbʼeenebʼ ut saʼ tiikilal. Abʼan naq tkʼulunq li Ralal li Winq, ma tixtaw saʼ ruuchichʼochʼ li yooqebʼ xpaabʼankil li Yos chi joʼkaʼin?».

9 Kixkʼe ajwiʼ li eetalil aʼin rehebʼ li nekeʼxye ribʼ naq tiikebʼ xchʼool ut nekeʼxkʼoxla naq ebʼ li junchʼol maakʼaʼ nekeʼok wiʼ. 10 «Wiibʼ li winq xeʼtaqeʼk saʼ rochoch li Yos chi tijok: jun aj pariseey ut li jun chik aʼan li naxchʼutubʼ li toj choʼq re li awabʼej. 11 Laj pariseey kiwakliik ut kiʼok chi tijok saʼ xchʼool chi joʼkaʼin: “At Inyos, ninbʼanyoxi chaawu naq moko chanchanin ta joʼebʼ laj elqʼ, li inkʼaʼ nekeʼnaʼlebʼak saʼ tiikilal, li nekeʼmuxuk sumlaak..., chi moko chanchanin ta li winq aʼin li naxchʼutubʼ li toj choʼq re li awabʼej. 12 Wiibʼ sut chiru li xamaan ninʼayuunik* ut ninkʼe xlajeetqil chixjunil li kʼaru we”. 13 Aʼut li winq li naxchʼutubʼ li toj choʼq re li awabʼej, chi najt naxxaqabʼ chaq ribʼ, ut inkʼaʼ naraj xtaqsinkil li rilobʼaal saʼ choxa, naxten bʼan chiru li xmaqabʼ ut yook xyeebʼal: “At Inyos, uxtaana wu* xbʼaan naq laaʼin aj maak”. 14 Ninye eere, naq li winq xkoho saʼ rochoch, qʼaxal tiik wiʼ chik xchʼool chiru laj pariseey. Xbʼaan naq li naxnima ribʼ tkubʼsiiq xwankil, abʼan li naxkubʼsi ribʼ tnimaaq ru».

15 Ebʼ li qas qiitzʼin xeʼok ajwiʼ xkʼambʼal chaq ebʼ li xkokʼal rikʼin li Jesús re naq tixkʼe li ruqʼ saʼ xbʼeenebʼ.* Abʼan naq ebʼ li xtzolom xeʼril aʼin, xeʼok xchʼilankil li xnaʼ xyuwaʼ ebʼ li kokʼal. 16 Abʼan li Jesús kixye naq teʼxkʼam chaq re ebʼ li kokʼal ut kixye: «Kanabʼomaq naq ebʼ li kokʼal teʼjiloq chinkʼatq. Meeram chiruhebʼ xbʼaan naq li chanchanebʼ li kokʼal, rehebʼ aʼan li Xʼawabʼejilal li Yos. 17 Relik chi yaal ninye eere naq li inkʼaʼ naxkʼulubʼa li Xʼawabʼejilal li Yos joʼ jun li chʼinaʼal, maajunwa t-oq saʼ li Awabʼejilal aʼin».

18 Jun li winq li najolomink rehebʼ laj judiiy kixpatzʼ re: «At chaabʼil Kʼutunel, kʼaru tento tinbʼaanu re naq twechani li junelik yuʼam?». 19 Li Jesús kixye re: «Kʼaʼut nakaaye naq chaabʼilin? Maaʼani chaabʼil, kaʼajwiʼ li Yos. 20 Laaʼat nakaanaw li xtaql li Yos: matmuxuk sumlaak,* matkamsink, mat-elqʼak, matyoobʼank tikʼtiʼ chirixebʼ li junchʼol, oxloqʼi laanaʼ laayuwaʼ». 21 Tojaʼ naq kixye re: «Chixjunil aʼin yookin chaq xyuʼaminkil chalen chaq saʼ linkachʼinal». 22 Naq li Jesús kirabʼi aʼin kixye re: «Toj wank jun li naʼlebʼ li maajiʼ nakaabʼaanu: kʼayi chixjunil li kʼaru aawe ut li xtuminal taajekʼi saʼ xyanqebʼ li nebʼaʼ; chi joʼkan twanq aabʼihomal saʼ choxa. Tojaʼ naq tatchalq ut tinaataqe». 23 Naq li winq kirabʼi aʼin, kʼajoʼ kirahoʼk saʼ xchʼool xbʼaan naq naabʼal li xbʼihomal.

24 Li Jesús kixkaʼya ut kixye: «Qʼaxal tchʼaʼajkoʼq chiruhebʼ li wankebʼ xtumin ok saʼ li Xʼawabʼejilal li Yos! 25 Joʼkan utan moko chʼaʼaj ta chiru junaq li kameey* ok saʼ ru junaq li kuux re bʼojok chiru naq junaq li bʼihom t-oq saʼ li Xʼawabʼejilal li Yos». 26 Li xeʼabʼink re aʼin xeʼxpatzʼ: «Wi joʼkan, ani tkoleʼq?». 27 Aʼan kixye: «Li inkʼaʼ naruhank xbʼaanunkil li winq, naruhank chiru li Yos». 28 Laj Pedro kixye re: «Kʼe reetal, laaʼo xqakanabʼ chixjunil re aataqenkil». 29 Aʼan kixye rehebʼ: «Relik chi yaal ninye eere naq li kixkanabʼ rochoch, rixaqil, ras ut riitzʼin, xnaʼ xyuwaʼ malaj ralal xkʼajol saʼ xkʼabʼaʼ li Xʼawabʼejilal li Yos 30 naabʼal chik tixkʼul saʼebʼ li kutan aʼin, ut saʼ li kutan* li yook chi chalk tixkʼul li junelik yuʼam».

31 Tojaʼ naq kirisi xjunes li Kabʼlaju ut kixye rehebʼ: «Kʼehomaq reetal, yooko chi taqeʼk Jerusalén, ut chixjunil li kitzʼiibʼamank chaq saʼ xkʼabʼaʼ ebʼ li propeet chirix li Ralal li Winq, ttzʼaqloq ru. 32 Jun eetalil, teʼxqʼaxtesi saʼ ruqʼebʼ li maawaʼebʼ aj judiiy, teʼxseʼe, teʼxhobʼ ut teʼxchuubʼa. 33 Ut naq ak xeʼxkʼe chi tzʼuum,* teʼxkamsi, abʼan saʼ rox kutan twaklesiiq chi yoʼyo». 34 Abʼan aʼanebʼ inkʼaʼ xeʼxtaw ru xyaalalil chixjunil aʼin xbʼaan naq kimuqmank chiruhebʼ li aatin aʼin ut inkʼaʼ xeʼxtaw ru li kiyeemank chaq.

35 Naq li Jesús yook chi nachʼok Jericó, wank jun li mutzʼ chunchu chire bʼe ut yook chi lemooxik. 36 Naq kirabʼi chi numeʼk li kʼiila tenamit kiʼok xpatzʼbʼal kʼaru yook chi kʼulmank. 37 Xeʼxye re: «Yook chi numeʼk li Jesús aj Nazaret!». 38 Naq kixnaw aʼin kixjap re chi xyeebʼal: «Jesús, Ralal laj David, toqʼobʼa wu!».* 39 Li yookebʼ chiru li kʼiila tenamit xeʼok xchʼilankil ut xeʼxye re, naq tixkanabʼ xjapbʼal re. Aʼut qʼaxal kaw chik kiʼok xyeebʼal: «Ralal laj David, toqʼobʼa wu!».* 40 Tojaʼ naq, kixaqli li Jesús ut kixtaqla xkʼambʼal chaq li winq. Ut naq ak wank li winq chixkʼatq, li Jesús kixpatzʼ re: 41 «Kʼaru nakaawaj naq tinbʼaanu aawe?». Li mutzʼ kixye re: «Qaawaʼ, nawaj naq tteehonq wiʼ chik saʼ li wu». 42 Joʼkan naq li Jesús kixye re: «Chiteehonq saʼ laawu, xatkʼiraak xbʼaan naq nakaapaabʼ naq li Yos tatxtenqʼa». 43 Saʼ junpaat kiʼok chi ilok. Ut naq yook xtaqenkil, kiʼok xkʼebʼal xloqʼal li Yos. Naq chixjunil li tenamit kiril aʼin, kiʼok ajwiʼ xkʼebʼal xloqʼal li Yos.