1 Corintios
12 Ex wechpaabʼanel, nawaj naq teetaw ru chirix ebʼ li maatan li naxkʼe li Yos. 2 Laaʼex nekeenaw, naq toj maajiʼ nekexʼok chi paabʼank, nekexbʼalaqʼiik ut chanchan tawiʼ nekexkʼameʼk xbʼaanebʼ li pechʼbʼil yos li inkʼaʼ nekeʼaatinak. Ut nekexxik bʼarwiʼ kʼambʼilex xbʼaanebʼ. 3 Joʼkan bʼiʼ, nawaj teenaw naq maaʼani naru naxye «ra tixkʼul li Jesús!» wi naʼaatinak saʼ xkʼabʼaʼ li xsantil musiqʼej li Yos. Ut maaʼani naru naxye «li Jesús aʼan li Qaawaʼ!» wi inkʼaʼ bʼeresinbʼil xbʼaan li santil musiqʼej.
4 Wank jalan jalanq li maatan, abʼan jun ajwiʼ li santil musiqʼej; 5 wank jalan jalanq li kʼanjel, abʼan jun ajwiʼ li Qaawaʼ, 6 ut wank jalan jalanq li kʼanjel, abʼan jun ajwiʼ li Yos li naxkʼe xmetzʼew chixjunilebʼ re naq teʼruuq xbʼaanunkil aʼin. 7 Abʼan li tenqʼ li naxkʼe li santil musiqʼej re li junjunq nakʼutunk chi tzʼaqal re ru rikʼin chixjunilebʼ, ut li Yos naxkʼe aʼin re xtenqʼankil chixjunilebʼ. 8 Saʼ xkʼabʼaʼ li santil musiqʼej wankebʼ kʼebʼilebʼ xmaatan re naq wanqebʼ xnaʼlebʼ re aatinak. Ut saʼ xkʼabʼaʼ li santil musiqʼej wankebʼ kʼebʼilebʼ xmaatan re naq wanqebʼ xnawom re aatinak; 9 li santil musiqʼej naxtenqʼa li jun chik re naq wanq xpaabʼal; naxtenqʼa li jun chik re naq truuq chi kʼirtasink; 10 li santil musiqʼej naxtenqʼa li jun chik re naq truuq xbʼaanunkil ebʼ li sachbʼachʼoolej; naxtenqʼa li jun chik re naq t-aatinaq joʼ propeet; naxtenqʼa li jun chik re naq tixnaw ma chalenaq rikʼin li Yos ebʼ li esil malaj inkʼaʼ; naxtenqʼa li jun chik re naq t-aatinaq saʼ jalan jalanq chi aatinobʼaal; naxtenqʼa li jun chik re naq tixjal ru li yook chi yeemank saʼebʼ li aatinobʼaal. 11 Abʼan chixjunil aʼin, li santil musiqʼej nabʼaanunk re ut naxkʼe re li junjunq joʼ chanru naraj aʼan.
12 Xbʼaan naq joʼ chanru naq li tibʼelej jun ajwiʼ abʼan naabʼal xchaʼal, ut chixjunil li xchaʼal, usta naabʼal nekeʼxkʼubʼ jun chi tibʼelej, joʼkan ajwiʼ li Kriist. 13 Chiqajunilo xkubʼsiik qahaʼ xbʼaan li santil musiqʼej re naq tqakʼubʼ jun chi tibʼelej aʼ yaal ma laaʼo aj judiiy malaj aj griego malaj wanko choʼq moos malaj isinbʼilo choʼq moos, chiqajunilo xqakʼul jun chi santil musiqʼej.
14 Chʼolchʼo naq li tibʼelej moko kʼubʼanbʼil ta rikʼin jun ajwiʼ chi chaʼalej, kʼubʼanbʼil bʼan rikʼin naabʼal li chaʼalej. 15 Wi li oqej tixye raj «Saʼ xkʼabʼaʼ naq moko laaʼin ta uqʼej, moko laaʼin ta jun rehebʼ xchaʼal li tibʼelej», moko xbʼaan ta aʼin naq tixkanabʼ wank joʼ jun rehebʼ xchaʼal li tibʼelej. 16 Ut wi li xikej tixye raj «Saʼ xkʼabʼaʼ naq moko laaʼin ta xsaʼuʼej, moko laaʼin ta jun rehebʼ xchaʼal li tibʼelej», moko xbʼaan ta aʼin tixkanabʼ wank joʼ jun rehebʼ li chaʼalej. 17 Wi xsaʼuʼej chixjunil li tibʼelej, chanru truuq chi abʼink junaq li qas qiitzʼin? Wi xikej chixjunil li tibʼelej, chanru truuq chi utzʼuk junaq li qas qiitzʼin? 18 Abʼan li Yos kixkʼe saʼ xnaʼaj li junjunq chi chaʼal joʼ chanru kiraj aʼan.
19 Wi junaqik raj chixjunil li chaʼalej, bʼar raj wank li tibʼelej? 20 Abʼanan, usta naabʼal li chaʼalej, jun ajwiʼ li tibʼelej. 21 Li xsaʼuʼej inkʼaʼ naru naxye re li uqʼej «Maakʼaʼ nakat-ok wiʼ we» chi moko li jolomej naru naxye rehebʼ li oqej «Maakʼaʼ nekexʼok wiʼ we». 22 Abʼanan ebʼ li xchaʼal li tibʼelej li ilbʼil naq kubʼenaq xwankil, nekeʼkʼanjelak. 23 Ut li xchaʼal li qatibʼel li naqakʼoxla naq moko chʼinaʼus ta, naqatzʼap ru chiʼus ut ebʼ li xchaʼal li qatibʼel li naxkʼe qaxutaan naqachʼinaʼusa ru. 24 Abʼan li xchaʼal li qatibʼel li qʼaxal chʼinaʼus moko yiibʼaak ta chik naraj. Naq li Yos kixyiibʼ li tibʼelej kixchʼinaʼusa bʼarwiʼ naʼajmank xyiibʼankil 25 re naq moko jachjooq ta ru li tibʼelej ut ebʼ li chaʼal teʼxkʼe xchʼool chiribʼilebʼ ribʼ. 26 Wi jun xchaʼal li tibʼelej ra wank, ebʼ li junchʼol chi chaʼal ra ajwiʼ wankebʼ rochbʼeen. Wi jun rehebʼ li chaʼal naxkʼul xloqʼal, ebʼ li junchʼol chi chaʼal nekeʼsahoʼk xchʼool rochbʼeen.
27 Joʼkan bʼiʼ, laaʼex li xtibʼel li Kriist ut laaʼex li xchaʼal li tibʼelej aʼin. 28 Li Yos kixkʼe xnaʼaj li junjunq saʼ li chʼuut: xbʼeen ebʼ li apóstol; xkabʼ ebʼ li propeet; rox ebʼ laj kʼutunel; joʼkan ajwiʼ, li nekeʼruuk xbʼaanunkil ebʼ li sachbʼachʼoolej; li nekeʼruuk chi kʼirtasink; li nekeʼxtenqʼa ebʼ li junchʼol; li nekeʼxnaw kʼamok bʼe; li nekeʼaatinak saʼ jalan jalanq chi aatinobʼaal. 29 Peʼyaal naq moko chixjunilebʼ ta wankebʼ choʼq apóstol chi moko chixjunilebʼ ta wankebʼ choʼq propeet chi moko chixjunilebʼ ta wankebʼ choʼq aj kʼutunel chi moko chixjunilebʼ ta nekeʼxbʼaanu ebʼ li sachbʼachʼoolej? 30 Peʼyaal naq moko chixjunilebʼ ta kʼebʼilebʼ xmaatan re kʼirtasink chi moko chixjunilebʼ ta nekeʼruuk chi aatinak saʼ jalan jalanq chi aatinobʼaal chi moko chixjunilebʼ ta nekeʼruuk chi jalok ru aatinobʼaal? 31 Meekanabʼ xkʼebʼal eeqʼe re xkʼulbʼal ebʼ li maatan li qʼaxal nim. Abʼan anaqwan tinkʼut cheeru li bʼe li qʼaxal nim chiruhebʼ li junchʼol.