Apocalipsis
5 Saʼ li xnim ruqʼ li chunchu saʼ li kʼojaribʼaal xwil jun li bʼotbʼilhu tzʼiibʼanbʼil chiru ut chirix. Tzʼaptzʼo chiʼus rikʼin wuqubʼ li letzlebʼ. 2 Ut xwil jun li ánjel, li qʼaxal nim xwankil, yook chaq xyeebʼal rikʼin kawil kuxej: «Ani xkʼulubʼ xteebʼal li bʼotbʼilhu ut xpejbʼal li xletzlebʼ?». 3 Abʼan maaʼani, chi moko saʼ choxa, saʼ ruuchichʼochʼ malaj rubʼel chʼochʼ, kiruuk xteebʼal ut rilbʼal li tzʼiibʼanbʼil saʼ li bʼotbʼilhu. 4 Saʼ xkʼabʼaʼ naq inkʼaʼ xtawmank ani xkʼulubʼ xteebʼal li bʼotbʼilhu ut rilbʼal li tzʼiibʼanbʼil chisaʼ, xinʼok chi yaabʼak chi maakʼaʼ nakʼojobʼank re linchʼool. 5 Abʼan jun rehebʼ li winq li cheek chik kixye we: «Matyaabʼak chik. Kʼe reetal, li Kaqkoj re li teep Judá aʼ li xxeʼ laj David, kiqʼaxok u. Joʼkan naq aʼan naru xteebʼal li bʼotbʼilhu ut li wuqubʼ chi letzlebʼ».
6 Chixkʼatq li kʼojaribʼaal ut saʼ xyiihebʼ li ánjel ut ebʼ li cheekel winq, xwil chi xaqxo jun li karneer li chanchan tawiʼ ak mayejanbʼil. Wuqubʼ xxukubʼ ut wuqubʼ saʼ ru. (Li uhej reetalil wuqubʼ li musiqʼ. Ebʼ li musiqʼ aʼin re li Yos ut kixtaqlahebʼ saʼ chixjunil li ruuchichʼochʼ). 7 Tikto kinachʼok li Karneer ut kixchap li bʼotbʼilhu li wank saʼ xnim ruqʼ li chunchu saʼ li kʼojaribʼaal. 8 Naq kixchap li bʼotbʼilhu, li kaahibʼ chi ánjel ut li 24 chi cheekel winq xeʼxwiqʼibʼ ribʼ chiru li Karneer. Ut li junjunq wank xʼarpa ut xnimla sekʼ re oor li nujenaq chi insiʼeens. (Li insiʼeens reetalil ebʼ li xtij li santil paabʼanel). 9 Ut yookebʼ xbʼichankil jun li akʼ bʼich li naxye: «Aakʼulubʼ xchapbʼal li bʼotbʼilhu ut xteebʼal ebʼ li letzlebʼ xbʼaan naq xatmayejaak ut rikʼin laakikʼel xaaloqʼ choʼq re li Yos ebʼ li qas qiitzʼin li jalan jalanq xteep, raatinobʼaal, xtenamit ut xkʼalebʼaal. 10 Laaʼat xaakʼehebʼ choʼq awabʼej ut choʼq aj tij re naq teʼkʼanjelaq chiru li Qayos. Ut aʼanebʼ teʼawabʼejinq saʼ xbʼeen li ruuchichʼochʼ».
11 Xwil naabʼalebʼ li ánjel chi xsutam li kʼojaribʼaal ut xwil kaahibʼ chik li ánjel ut ebʼ li cheekel winq ut xwabʼi ajwiʼ xyaabʼ xkuxebʼ. Chi siʼeent miyon xkʼihalebʼ 12 yookebʼ chaq xyeebʼal saʼ kawil kuxej: «Li Karneer li kimayejaak xkʼulubʼ xkʼulbʼal li wankilal, li bʼihomal, li naʼlebʼ, li metzʼew, li loqʼal, li nimaak ut li osobʼtesiik».
13 Ut xwabʼi naq chixjunil li yobʼtesihom li wank saʼ choxa, saʼ ruuchichʼochʼ, rubʼel chʼochʼ ut saʼ palaw (chixjunil li wank chisaʼ) yookebʼ xyeebʼal: «Li chunchu saʼ li kʼojaribʼaal ut li Karneer teʼxkʼul taxaq li osobʼtesiik, li nimaak, li loqʼal ut li wankilal chi junelik». 14 Li kaahibʼ chi ánjel yookebʼ xyeebʼal: «Joʼkan taxaq!». Ut ebʼ li cheekel winq xeʼxwiqʼibʼ ribʼ ut xeʼxloqʼoni ru li Yos.