1 Juan
2 Ex walal inkʼajol, li raarokex inbʼaan, nintzʼiibʼa eere li naʼlebʼ aʼin re naq inkʼaʼ texmaakobʼq. Abʼanan, wi junaq namaakobʼk, wank jun aj tenqʼahom qe li wank chixkʼatq li Yuwaʼbʼej: aʼ li Jesukriist, li tiik xchʼool. 2 Aʼan kiqʼaxtesiik joʼ mayej chirix li qamaak re naq tqakʼam wiʼ chik qibʼ saʼ usilal rikʼin li Yos abʼan moko kaʼaj tawiʼ chirix li qamaak chirix ajwiʼ li xmaak chixjunilebʼ li qas qiitzʼin. 3 Ut saʼ xkʼabʼaʼ aʼin xchʼolaak chiqu naq ak naqanaw ru: wi inkʼaʼ naqakanabʼ xpaabʼankil li xchaqʼrabʼ. 4 Li naxye «Laaʼin ak ninnaw ru» abʼan inkʼaʼ naxpaabʼ li xchaqʼrabʼ, aj tikʼtiʼ ut li yaal moko wank ta rikʼin. 5 Abʼan naq junaq li qas qiitzʼin naxpaabʼ li raatin li Kriist aran nakʼutunk naq relik chi yaal naxra li Yos. Joʼkan naq chʼolchʼo chiqu naq wanko saʼ junajil rikʼin aʼan. 6 Li naxye naq wank saʼ junajil rikʼin aʼan tenebʼanbʼil saʼ xbʼeen xbʼeresinkil li xyuʼam joʼ kixbʼaanu chaq li Jesús.
7 Ex wechpaabʼanel, li raarokex inbʼaan, moko yookin ta xtzʼiibʼankil eere jun akʼ chaqʼrabʼ, yookin bʼan xtzʼiibʼankil jun najteril chaqʼrabʼ li wank chaq eerikʼin chalen saʼ xtiklajik. Li najteril chaqʼrabʼ aʼin aʼan li aatin li xeerabʼi chaq. 8 Abʼan akʼ li chaqʼrabʼ li yookin xtzʼiibʼankil eere, li chaqʼrabʼ aʼin kixpaabʼ aʼan ut laaʼex ajwiʼ xeepaabʼ xbʼaan naq li qʼoqyink yook chi numeʼk ut li tzʼaqal saqenk yook chi lemtzʼunk.
9 Li naxye naq wank saʼ li saqenk abʼan xikʼ naril li ras riitzʼin toj wank saʼ qʼoqyink. 10 Li naxra li ras riitzʼin wank saʼ saqenk ut maakʼaʼ naru natʼanok re. 11 Abʼan, li xikʼ naril li ras riitzʼin wank saʼ qʼoqyink ut nabʼeek saʼ qʼoqyink ut inkʼaʼ naxnaw bʼar yook chi xik xbʼaan naq xmutzʼobʼresiik xbʼaan li qʼoqyink.
12 Ex walal inkʼajol, li raarokex inbʼaan, nintzʼiibʼa eere aʼin xbʼaan naq kuybʼil chik leemaak saʼ xkʼabʼaʼ aʼan. 13 Ex yuwaʼbʼej nintzʼiibʼa eere aʼin xbʼaan naq xeenaw ru li wank chalen saʼ xtiklajik. Ex saaj nintzʼiibʼa eere aʼin xbʼaan naq xeeqʼax ru li Maaʼus. Ex walal inkʼajol, li raarokex inbʼaan, nintzʼiibʼa eere aʼin xbʼaan naq xeenaw ru li Yuwaʼbʼej. 14 Ex yuwaʼbʼej nintzʼiibʼa eere aʼin xbʼaan naq xeenaw ru li wank chaq chalen saʼ xtiklajik. Ex saaj nintzʼiibʼa eere aʼin xbʼaan naq kaw eeribʼ ut li raatin li Yos wank saʼ leechʼool ut xeeqʼax ru li Maaʼus.
15 Meera li ruuchichʼochʼ chi moko li kʼaʼaq re ru li wank saʼ ruuchichʼochʼ. Wi junaq li qas qiitzʼin naxra li ruuchichʼochʼ, li qas qiitzʼin aʼin inkʼaʼ naxra li Yuwaʼbʼej. 16 Xbʼaan naq chixjunil li wank saʼ ruuchichʼochʼ moko chalenaq ta rikʼin li Yuwaʼbʼej chalenaq bʼan saʼ ruuchichʼochʼ. Aʼan aʼin li chalenaq saʼ ruuchichʼochʼ: li naxrahi ru li tibʼelej, li naxrahi ru li saʼ uhej ut chixjunil li kʼaʼaq re ru li naxnima wiʼ ribʼ junaq li qas qiitzʼin. 17 Joʼkan ajwiʼ, li ruuchichʼochʼ t-osoʼq ut chixjunil li nekeʼxrahi ru ebʼ li qas qiitzʼin t-osoʼq ajwiʼ, abʼan li naxbʼaanu li rajom li Yos twanq chi junelik.
18 Ex walal inkʼajol, li raarokex inbʼaan, ak xnachʼok chaq li hoonal. Laaʼex xeerabʼi naq tchalq li naxtzʼeqtaana li Kriist. Saʼebʼ li qakutan naabʼalebʼ ajwiʼ nekeʼxtzʼeqtaana li Kriist joʼkan naq naqanaw naq ak xnachʼok chaq li hoonal. 19 Ebʼ aʼan xeʼelk saʼ qayanq abʼan moko qechpaabʼanelebʼ ta xbʼaan naq wi qechpaabʼanelebʼ raj xeʼkanaak raj saʼ qayanq. Abʼan, xeʼelk saʼ qayanq re naq tkanaaq chi chʼolchʼo ru naq moko chixjunilebʼ ta qechpaabʼanel. 20 Laaʼex xsikʼeʼk eeru xbʼaan li Yos aʼ li Saant ut cheejunilex wank eenawom. 21 Nintzʼiibʼa eere aʼin moko xbʼaan ta naq inkʼaʼ nekeenaw li yaal, nekexintzʼiibʼa bʼan xbʼaan naq nekeenaw li yaal ut xbʼaan naq maakʼaʼ junaq li tikʼtiʼ li nachalk saʼ li yaal.
22 Ani laj tikʼtiʼ? Ma maawaʼ tabʼiʼ li nayeehok re, naq li Jesús maawaʼ li Kriist? Li naxtzʼeqtaana li Kriist aʼan li inkʼaʼ naxpaabʼ li Yuwaʼbʼej ut li Alalbʼej. 23 Li inkʼaʼ naxpaabʼ li Alalbʼej inkʼaʼ naxtaw rusilal li Yuwaʼbʼej. Abʼan li naxye naq naxpaabʼ li Alalbʼej naxtaw rusilal li Yuwaʼbʼej. 24 Ut wanq junelik saʼ leechʼool li xeerabʼi chalen saʼ xtiklajik. Wi wank junelik saʼ leechʼool li xeerabʼi chalen saʼ xtiklajik, junelik wanqex saʼ junajil rikʼin li Alalbʼej ut rikʼin li Yuwaʼbʼej. 25 Joʼkan ajwiʼ, aʼan kixyeechiʼi qe li junelik yuʼam.
26 Nintzʼiibʼa eere aʼin xbʼaan naq wankebʼ nekeʼraj eebʼalaqʼinkil. 27 Li Yos kixsikʼ eeru rikʼin li santil musiqʼej ut aʼin yaal, moko tikʼtiʼ ta. Saʼ xkʼabʼaʼ naq junelik wank li santil musiqʼej saʼ leechʼool moko aajel ta ru naq textzoleʼq. Li Yos naroksi li santil musiqʼej re eetzolbʼal saʼ chixjunil. Joʼkan naq meekanabʼ wank saʼ junajil rikʼin aʼan joʼ chanru kixkʼut cheeru li santil musiqʼej naq teebʼaanu. 28 Anaqwan, ex walal inkʼajol, li raarokex inbʼaan, meekanabʼ wank saʼ junajil rikʼin aʼan, ut naq tkʼutbʼesiiq tooruuq chi aatinak chi maakʼaʼ qaxiw ut inkʼaʼ tooxutaanaq chi moko toonajtoʼq rikʼin naq ak wanq arin.* 29 Wi nekeenaw naq aʼan tiik xchʼool, nekeenaw ajwiʼ naq li naxbʼaanu li us yoʼlajenaq rikʼin li Yos.