Juan
18 Naq ak kixye aʼin, li Jesús xkoho rikʼinebʼ li xtzolom saʼ xjunpakʼalil li naʼaj li taqʼa ru* Cedrón xkʼabʼaʼ ut kiʼok rochbʼeenebʼ li xtzolom saʼ xnaʼaj li uutzʼuʼuj li wank aran. 2 Laj Judas li tqʼaxtesinq re, naxnaw ajwiʼ bʼar nakanaak li naʼaj aʼin xbʼaan naq aran naxchʼutubʼ ribʼ li Jesús chi rajlal rikʼinebʼ li xtzolom. 3 Joʼkan naq laj Judas kiwulak aran rochbʼeen jun chʼuut aj puubʼ ut ebʼ laj kʼaakʼalenel li taqlanbʼilebʼ xbʼaanebʼ li xbʼeenil aj tij ut ebʼ laj pariseey. Wankebʼ xxaml, xkandil* ut xchʼiichʼ. 4 Li Jesús ak naxnaw chixjunil li tkʼulmanq, kixkʼe jun xyok chiru ut kixpatzʼ rehebʼ: «Ani nekeesikʼ?». 5 Ebʼ aʼan xeʼxsume ut xeʼxye re: «Aʼ li Jesús, aj Nazaret». «Laaʼin», chan rehebʼ. Ut laj Judas li tqʼaxtesinq re wank ajwiʼ saʼ xyanqebʼ.
6 Abʼan naq li Jesús kixye rehebʼ: «Laaʼin», xeʼxkʼe jun xyok chirixebʼ ut xeʼxkut ribʼ chiru chʼochʼ. 7 Tojaʼ naq kixpatzʼ wiʼ chik rehebʼ: «Ani nekeesikʼ?». Ebʼ aʼan xeʼxye re: «Aʼ li Jesús, aj Nazaret». 8 Li Jesús kixye rehebʼ: «Ak xinye eere naq laaʼin. Joʼkan naq, wi laaʼin li nekeesikʼ, kanabʼomaqebʼ chi xik ebʼ li winq aʼin». 9 Aʼin kikʼulmank re naq ttzʼaqloq ru li kixye chaq: «Maaʼani rehebʼ li xaakʼe we kisach».
10 Tojaʼ naq laj Simón Pedro kixkʼe chi chʼiichʼ li xmoos li xyuwaʼil aj tij ut kixchʼot li xxik li wank saʼ xnim. Li moos aʼin Malco xkʼabʼaʼ. 11 Abʼan li Jesús kixye re laj Pedro: «Kʼe laachʼiichʼ saʼ xnaʼaj. Ma inkʼaʼ tabʼiʼ tento twukʼ li wank saʼ li ukʼlebʼ sekʼ li xkʼe we li Yuwaʼbʼej?».
12 Tojaʼ naq ebʼ laj puubʼ, li najolomink rehebʼ laj puubʼ ut ebʼ kʼaakʼalenel li taqlanbʼilebʼ xbʼaanebʼ laj judiiy, xeʼxchap li Jesús ut xeʼxbʼakʼ. 13 Xbʼeenwa xeʼxkʼam rikʼin laj Anás xbʼaan naq aʼan xyuwaʼ li rixaqil laj Caifás li wank chaq choʼq xyuwaʼil aj tij saʼ li chihabʼ aʼan. 14 Ut aʼin laj Caifás li kixye rehebʼ laj judiiy naq us choʼq rehebʼ naq jun ajwiʼ li winq tkamq saʼ xkʼabʼaʼ li tenamit.
15 Joʼkan bʼiʼ, laj Simón Pedro ut jun li rechtzolom yookebʼ xtaqenkil li Jesús. Ut saʼ xkʼabʼaʼ naq li tzolom aʼin nawbʼil ru xbʼaan li xyuwaʼil aj tij, kiʼok rochbʼeen li Jesús saʼ xnebʼaal li rochoch li xyuwaʼil aj tij, 16 abʼan laj Pedro kikanaak chirix kabʼl chire li okebʼaal. Joʼkan naq li tzolom li nawbʼil ru xbʼaan li xyuwaʼil aj tij kiʼelk raatinankil li ixq laj ilol okebʼaal ut kiroksi laj Pedro. 17 Tojaʼ naq li ixq laj ilol okebʼaal kixpatzʼ re laj Pedro: «Ma inkʼaʼ tabʼiʼ laaʼat jun rehebʼ li xtzolom li winq aʼin?». Laj Pedro kixye re: «Inkʼaʼ, moko laaʼin ta». 18 Ebʼ li moos ut ebʼ laj kʼaakʼalenel xeʼxtzʼabʼ xxaml xbʼaan naq yook li ke ut xaqxokebʼ chi qʼixink chire li xaml. Laj Pedro yook ajwiʼ chi qʼixink saʼ xyanqebʼ.
19 Li xbʼeenil aj tij aʼ laj Anás kixpatzʼ re li Jesús chirixebʼ li xtzolom ut chirix li xkʼutum. 20 Li Jesús kixsume ut kixye re: «Xinʼaatinak chi kutankil chiru chixjunilebʼ li qas qiitzʼin. Junelik xinkʼutuk saʼ li naʼaj re loqʼonink ut saʼ rochoch li Yos, bʼarwiʼ nekeʼxchʼutubʼ ribʼ chixjunilebʼ laj judiiy, ut maakʼaʼ xinye saʼ muqmu. 21 Kʼaʼut we nakatpatzʼok? Patzʼ rehebʼ li qas qiitzʼin li xeʼrabʼi li xinye. Aran wankebʼ, aʼanebʼ nekeʼxnaw chiʼus li xinye». 22 Naq li Jesús kixye aʼin, jun rehebʼ laj kʼaakʼalenel li wank aran kixtzʼaj chi ruqʼ li Jesús ut kixye re: «Kʼaʼut nakaasume chi joʼkan li xyuwaʼil aj tij?». 23 Li Jesús kixsume ut kixye re: «Wi inkʼaʼ us xinye, ye chaq we;* ut wi yaal xinye, kʼaʼut naq nikinaasakʼ?». 24 Chirix chik aʼan laj Anás kixtaqla chi bʼakʼbʼo li Jesús rikʼin laj Caifás, li xyuwaʼil aj tij.
25 Saʼ li hoonal ajwiʼ aʼin, laj Simón Pedro toj yook chi qʼixink. Tojaʼ naq xeʼxpatzʼ re: «Ma inkʼaʼ tabʼiʼ laaʼat jun rehebʼ li xtzolom?». Laj Pedro inkʼaʼ kixkʼulubʼa. Ut kixye: «Inkʼaʼ, moko laaʼin ta». 26 Jun rehebʼ li xmoos li xyuwaʼil aj tij li rech-alal li kichʼoteʼk xxik xbʼaan laj Pedro, kixye re: «Ma inkʼaʼ tabʼiʼ xatwil rochbʼeen saʼ xnaʼaj li uutzʼuʼuj?». 27 Abʼan laj Pedro inkʼaʼ kixkʼulubʼa wiʼ chik, ut saʼ junpaat kiyaabʼak jun li tzoʼ kaxlan.
28 Toj eqʼla xeʼrisi li Jesús saʼ rochoch laj Caifás ut xeʼxkʼam saʼ rochoch li ruuchil awabʼej re Judea abʼan aʼanebʼ inkʼaʼ xeʼok saʼ rochoch li ruuchil awabʼej re naq inkʼaʼ teʼxtzʼajni ribʼ ut chi joʼkan teʼruuq xwaʼbʼal li Paswa. 29 Joʼkan naq laj Pilaat kiwulak bʼarwiʼ wankebʼ aʼan ut kixpatzʼ rehebʼ: «Chirix kʼaru nekeeqʼabʼa li winq aʼin?». 30 Xeʼxsume ut xeʼxye re: «Wi us raj xnaʼlebʼ li winq aʼin inkʼaʼ raj xqaqʼaxtesi aawe». 31 Joʼkan naq laj Pilaat kixye rehebʼ: «Kʼamomaq ut raqomaq aatin saʼ xbʼeen joʼ naxye leechaqʼrabʼ». Ebʼ laj judiiy xeʼxye re: «Laaʼo maakʼaʼ qaleseens re xkamsinkil junaq li qas qiitzʼin». 32 Aʼin kikʼulmank re naq ttzʼaqloq ru li raatin li Jesús naq kixye chanru tkamq.
33 Laj Pilaat kiʼok wiʼ chik saʼ rochoch li ruuchil awabʼej, kixbʼoq li Jesús ut kixpatzʼ re: «Ma laaʼat li awabʼej rehebʼ laj judiiy?». 34 Li Jesús kixsume ut kixye re: «Ma saʼ laachʼool kiʼelk chaq li patzʼom aʼin, malaj yal xaawabʼi wesil rikʼin jalanebʼ chik?». 35 Laj Pilaat kixye re: «Ma laaʼin tabʼiʼ aj judiiy? Laatenamit ajwiʼ ut ebʼ li xbʼeenil aj tij xeʼqʼaxtesink aawe wikʼin. Kʼaru xaabʼaanu?». 36 Li Jesús kixsume ut kixye re: «Linʼawabʼejilal moko re ta li ruuchichʼochʼ aʼin. Wi re raj li ruuchichʼochʼ aʼin, ebʼ laj tenqʼahom we xeʼpleetik raj re naq inkʼaʼ tinqʼaxtesiiq saʼ ruqʼebʼ laj judiiy. Abʼan relik chi yaal naq Linʼawabʼejilal moko re ta arin». 37 Joʼkan naq laj Pilaat kixpatzʼ re: «Ma laaʼat awabʼej chi joʼkanan?». Li Jesús kixsume ut kixye re: «Heeheʼ, laaʼat yookat xyeebʼal naq laaʼin awabʼej. Re aʼin naq xinyoʼlaak ut re aʼin naq xinchalk saʼ ruuchichʼochʼ: re xkʼebʼal chi naweʼk li yaal. Li naʼokenk chirix li yaal narabʼi xyaabʼ linkux». 38 Laj Pilaat kixpatzʼ re: «Kʼaru li yaal?».
Naq ak kixye aʼin, kiʼelk wiʼ chik bʼarwiʼ wankebʼ laj judiiy ut kixye rehebʼ: «Laaʼin inkʼaʼ nintaw xmaak li winq aʼin. 39 Joʼkan ajwiʼ, laaʼex kʼaynaqex chi rilbʼal naq nawisi saʼ tzʼalam junaq laj preex naq nawank li Paswa. Ma nekeeraj naq tinkanabʼ chi xik li awabʼej rehebʼ laj judiiy?». 40 Ebʼ aʼan xeʼxjap wiʼ chik re chi xyeebʼal: «Inkʼaʼ naqaj li winq aʼin, naqaj laj Barrabás!». Ut laj Barrabás aj elqʼ.