Apocalipsis
21 Tojaʼ naq xwil jun akʼ choxa ut jun akʼ ruuchichʼochʼ xbʼaan naq li choxa ut li ruuchichʼochʼ li xwank rubʼelaj xeʼsach ut li palaw moko wank ta chik. 2 Xwil ajwiʼ li santil tenamit aʼ li Akʼ Jerusalén li yook chi elk saʼ choxa bʼarwiʼ wank li Yos. Ut ak kawresinbʼil joʼ jun li ixq li ok re chi sumlaak li naxyiibʼ ribʼ choʼq re li xbʼeelom. 3 Chirix chik aʼan xwabʼi jun li kawil kuxej li kiʼelk chaq saʼ li kʼojaribʼaal ut kixye: «Kʼe reetal! Li xchʼina rochoch li Yos wank rikʼinebʼ li qas qiitzʼin. Aʼan tkanaaq rikʼinebʼ ut aʼanebʼ teʼwanq choʼq xtenamit. Li Yos twanq rikʼinebʼ. 4 Ut tixmes li xyaʼalebʼ ru, maakʼaʼaq chik li kamk chi moko li rahil chʼoolej chi moko li yaabʼak chi moko li rahilal. Chixjunil li narahobʼtesink chaq qe moko wank ta chik».
5 Li chunchu saʼ li kʼojaribʼaal kixye: «Kʼe reetal, yookin xʼakʼobʼresinkil chixjunil». Kixye ajwiʼ: «Tzʼiibʼa ebʼ li aatin aʼin xbʼaan naq tzʼaqal yaal ut paabʼajel». 6 Ut kixye we: «Ak xtzʼaqlok ru ebʼ li aatin aʼin! Laaʼin li Alfa ut li Omega,* li xtiklajik ut li xraqik. Li tchaqiq re tinkʼe chi rukʼ chi sibʼil li yuʼamhaʼ li nakʼehok yuʼam. 7 Li tqʼaxoq u tixkʼul aʼin choʼq xʼereens,* laaʼinaq li Xyos ut aʼanaq li walal. 8 Abʼan li nekeʼxkanabʼ naq li xxiw ttaqlanq saʼ xbʼeenebʼ, li inkʼaʼ nekeʼpaabʼank, li inkʼaʼ saqebʼ ru ut li nekeʼxyuʼami li tzʼaj aj naʼlebʼ li kʼajoʼ xchuhal, ebʼ laj kamsinel, ebʼ li nekeʼxmux ribʼ,* ebʼ li nekeʼaatinak rikʼinebʼ li maaʼus aj musiqʼej,* ebʼ li nekeʼxloqʼoni li pechʼbʼil yos,* ut chixjunilebʼ laj tikʼtiʼ teʼkuteʼq saʼ li palaw li naqʼichichnak xxamlel ut asuupr. Aʼin reetalil li xkabʼ kamk».
9 Ut jun rehebʼ li wuqubʼ chi ánjel li wank rikʼinebʼ li wuqubʼ chi sekʼ li nujenaq rikʼin li xraqik li wuqubʼ chi rahilal, kichalk ut kixye we: «Kim ut tinkʼut chaawu li ixq li ok re chi sumlaak aʼ li rixaqil li Karneer». 10 Joʼkan naq, saʼ xkʼabʼaʼ li santil musiqʼej xinxkʼam saʼ jun nimla tzuul najt xteram ut kixkʼut chiwu li santil tenamit Jerusalén, li yook chaq chi kubʼeek saʼ choxa bʼarwiʼ wank li Yos 11 ut wank rikʼin xloqʼal li Yos. Li xlemtzʼunil chanchan xlemtzʼunil li pek jaspe, li qʼaxal chʼinaʼus ut kutan ru. 12 Qʼaxal nim li xsuttzʼakil ut najt xteram, wank kabʼlaju li rokebʼaal ut saʼebʼ li okebʼaal wank kabʼlaju li ánjel ut chiruhebʼ li okebʼaal tzʼiibʼanbʼil xkʼabʼaʼ li kabʼlaju chi teep rehebʼ li ralal xkʼajol laj Israel. 13 Wank oxibʼ li okebʼaal bʼarwiʼ naʼelk li saqʼe, oxibʼ li okebʼaal bʼarwiʼ naʼelk li iqʼ, oxibʼ li okebʼaal bʼarwiʼ naʼok li iqʼ ut oxibʼ li okebʼaal bʼarwiʼ naʼok li saqʼe. 14 Joʼkan ajwiʼ, li rubʼelankil li xsuttzʼakil li tenamit yiibʼanbʼil rikʼin kabʼlaju chi pek ut chiruhebʼ li pek tzʼiibʼanbʼil li kabʼlaju chi kʼabʼaʼej re li kabʼlaju chi apóstol li nekeʼxtaqe li Karneer.
15 Li yook chi aatinak wikʼin wank rikʼin jun li cheʼ re bʼisok, li cheʼ aʼin yiibʼanbʼil rikʼin oor, re xbʼisbʼal li tenamit, ebʼ li okebʼaal ut li suttzʼak. 16 Kaaxukuut ru li tenamit ut li xnimal ru juntaqʼeet rikʼin li xnajtil roq. Li ánjel kixbʼis li tenamit rikʼin cheʼ ut kachʼin chik ma 2,220 kilómetro li xnimal ru, li xnajtil roq ut li xteram xbʼaan naq juntaqʼeet chixjunil. 17 Kixbʼis ajwiʼ li suttzʼak: kachʼin chik ma 64 meetr xteram. Li ánjel kiroksi li bʼislebʼ li naroksi li winq. 18 Li suttzʼak yiibʼanbʼil rikʼin jaspe ut li tenamit yiibʼanbʼil rikʼin tzʼaqal oor, kutan ru joʼ li lem. 19 Li rubʼelankil li xsuttzʼakil li tenamit uutzʼuʼujinbʼil rikʼin jalan jalanq chi chʼinaʼusil pek: li xbʼeen rubʼelankil yiibʼanbʼil rikʼin jaspe, li xkabʼ rikʼin zafiro, li rox rikʼin calcedonia, li xka rikʼin esmeralda, 20 li roʼ rikʼin sardónica, li xwaq rikʼin sardio, li xwuq rikʼin crisólito, li xwaqxaq rikʼin berilo, li xbʼele rikʼin topacio, li xlaje rikʼin crisoprasa, li xjunlaju rikʼin jacinto ut li xkabʼlaju rikʼin amatista. 21 Joʼkan ajwiʼ, li kabʼlaju chi okebʼaal chanchan kabʼlaju chi lemtzʼunil pek. Rikʼin jun ajwiʼ li lemtzʼunil pek yiibʼanbʼil li junjunq chi okebʼaal. Ut li xnimal ru bʼe re li tenamit yiibʼanbʼil rikʼin tzʼaqal oor ut kutan ru joʼ li lem.
22 Inkʼaʼ xwil junaq li ochoch re loqʼonink saʼ li tenamit xbʼaan naq li Jehobʼa,* li Nimajwal Yos ut li Karneer aʼanebʼ li ochoch re loqʼonink saʼ li tenamit. 23 Moko aajel ta chiru li tenamit naq li saqʼe malaj li po tlemtzʼunq saʼ xbʼeen xbʼaan naq li xloqʼal li Yos nakutanobʼresink re ut li xkandil* aʼan li Karneer. 24 Ebʼ li tenamit teʼbʼeeq saʼ xkʼabʼaʼ li xsaqenkil ut ebʼ li awabʼej re li ruuchichʼochʼ teʼxkʼe re li tenamit li xloqʼalebʼ. 25 Ebʼ li rokebʼaal inkʼaʼ ttzʼapmanq xbʼaan naq junelik kutanaq ut inkʼaʼ tqʼoqyinoʼq. 26 Ut teʼxkʼam saʼ li tenamit, li loqʼal ut li oxloqʼink li nachalk saʼebʼ li tenamit. 27 Maajun li kʼaʼaq re ru li tzʼaj ru chi moko junaq li qas qiitzʼin li yooq xbʼaanunkil li tzʼaj aj naʼlebʼ li kʼajoʼ xchuhal ut yooq chi bʼalaqʼik t-oq saʼ li tenamit. Kaʼajwiʼ teʼoq li tzʼiibʼanbʼilebʼ saʼ xhuhil li yuʼam. Li hu aʼin re li Karneer.