Lucas
7 Naq ak kixkʼe chixnaw li tenamit li tento tixye rehebʼ, kiʼok Capernaúm. 2 Ut aran wank chaq jun li winq li nataqlank rehebʼ laj puubʼ.* Li winq aʼin wank jun xmoos li qʼaxal raaro xbʼaan, nim xyajel ut kamk re. 3 Naq kirabʼi chirix li Jesús, kixtaqla wiibʼ oxibʼ li cheekel winq li wankebʼ saʼ xyanqebʼ laj judiiy re naq tchalq chi xkʼirtasinkil li xmoos. 4 Xkohebʼ bʼarwiʼ wank chaq li Jesús ut xeʼok xtzʼaamankil re: «Xkʼulubʼ naq taatenqʼa li winq aʼin, 5 xbʼaan naq naxra li qatenamit ut kixkabʼla li qanaʼaj re loqʼonink». 6 Tojaʼ naq li Jesús xkoho chirixebʼ. Naq yook chi wulak li Jesús chixkʼatq li ochoch, li winq li nataqlank rehebʼ laj puubʼ* kixtaqla wiibʼ oxibʼ li ramiiw chi xyeebʼal re: «Qaawaʼ, maachʼiʼchʼiʼi chik aawibʼ chi chalk xbʼaan naq moko inkʼulubʼ ta naq tat-oq saʼ wochoch. 7 Chi moko inkʼulubʼ ta xkʼutbʼal wibʼ chaawu. Abʼan yal taaye junaq laawaatin ut linmoos tkʼiraaq. 8 Xbʼaan naq laaʼin ajwiʼ ninpaabʼ naq nikineʼxtaqla ut nintaqlahebʼ laj puubʼ li wankebʼ rubʼel inwankil. Re jun ninye “Ayu!” ut naxik, ut re li jun chik ninye “Kim” ut nachalk, ut re linmoos ninye “Bʼaanu aʼin” ut naxbʼaanu». 9 Naq kirabʼi aʼin, li Jesús sachso xchʼool kikanaak, ut kixkaʼya li kʼiila tenamit li yook chi taqenk re, ut kixye: «Ninye eere naq chi moko saʼ Israel xintaw junaq winq li qʼaxal nim li xpaabʼal chirix li Yos». 10 Naq xeʼsutqʼiik saʼ ochoch, xeʼril naq li moos kʼirajenaq chik.
11 Chirix aʼan, li Jesús xkoho saʼ jun li tenamit Naín xkʼabʼaʼ, ut ebʼ li xtzolom joʼwiʼ ebʼ li kʼiila tenamit xkohebʼ chirix. 12 Naq yook chi wulak chixkʼatq li rokebʼaal li tenamit, yookebʼ chaq risinkil jun li kamenaq. Li kamenaq aʼin aʼan xyum jun li malkaʼan, li jun ajwiʼ chiru. Ut kʼajoʼ ajwiʼ li tenamit li yook chirix. 13 Naq li Qaawaʼ kiril li ixq, kiril xtoqʼobʼaal ru ut kixye re: «Matyaabʼak chik». 14 Saʼ junpaat kijilok chixkʼatq, kixchʼeʼ li chʼaat li yookebʼ wiʼ xkʼambʼal li kamenaq. Ut li yookebʼ chi xpaqonkil li kamenaq xeʼxaqliik. Tojaʼ naq li Jesús kixye: «At saaj, aawe ninye: waklin!». 15 Kichunlaak li saaj al ut kiʼok chi aatinak, ut li Jesús kixqʼaxtesi re li xnaʼ. 16 Sachsokebʼ xchʼool xeʼkanaak chixjunilebʼ, xeʼok xkʼebʼal xloqʼal li Yos ut xeʼok xyeebʼal: «Jun li propeet li nim xwankil kichalk saʼ qayanq» ut «Li Yos kijultikoʼk re li xtenamit». 17 Ut li esil aʼin chirix li Jesús kinawmank saʼ chixjunil Judea ut saʼ chixjunil li teep aʼan.
18 Tojaʼ naq ebʼ li xtzolom laj Juan xeʼxseeraqʼi re chixjunil aʼin. 19 Joʼkan naq laj Juan kixtaqla xkʼambʼal chaq wiibʼ rehebʼ li xtzolom, tojaʼ naq kixtaqla xpatzʼbʼal re li Qaawaʼ: «Ma laaʼat li tento tkʼulunq, malaj tento tqoybʼeni jalan chik?». 20 Naq ebʼ li winq xeʼwulak bʼarwiʼ wank li Jesús, xeʼxye re: «Laj Juan, aj Kubʼsihomhaʼ, xooxtaqla re naq tqapatzʼ aawe ma laaʼat li tento tkʼulunq malaj toj tqoybʼeni jalan chik». 21 Saʼ li hoonal aʼan, kixkʼirtasi naabʼal li qas qiitzʼin li yajebʼ, li nim xrahilalebʼ ut li echaninbʼilebʼ xbʼaanebʼ li maaʼus aj musiqʼej ut kixkʼe chi ilok naabʼalebʼ li mutzʼ. 22 Ut aʼan kixye rehebʼ: «Ayuqex ut seeraqʼimaq re laj Juan li xeeril ut li xeerabʼi: anaqwan ebʼ li mutzʼ nekeʼilok, ebʼ li yeq nekeʼbʼeek, ebʼ li saqlep nekeʼkʼirtasiik, ebʼ li tzʼap xik nekeʼabʼink, ebʼ li kamenaq nekeʼwaklesiik chi yoʼyo, ut nakʼemank chi naweʼk li chaabʼil esil rehebʼ li nebʼaʼ. 23 Sa saʼ xchʼool li inkʼaʼ nawiibʼank ru xchʼool chiwix».*
24 Naq ak xkohebʼ li xtzolom laj Juan, li Jesús kiʼok chi aatinak rikʼin li kʼiila tenamit chirix laj Juan ut kixye rehebʼ: «Kʼaru xkohex rilbʼal saʼ li chaqichʼochʼ? Ma li tañil* li ekʼasinbʼil xbʼaan li kawil iqʼ? 25 Kʼaru xkohex rilbʼal chi joʼkanan? Ma jun li winq li tiqto rikʼin chaabʼil tʼikr? Xbʼaan naq li sutsukebʼ saʼ bʼihomal ut tiqtokebʼ rikʼin tertokil tʼikr wankebʼ saʼ rochoch awabʼej! 26 Abʼan, kʼaru xkohex rilbʼal? Ma jun li propeet? Joʼkan, ut naxqʼax wiʼ chik ru jun li propeet. 27 Chirix li winq aʼin tzʼiibʼanbʼil chaq: “Kʼe reetal, tintaqla lintaql chaawu re naq aʼan tixkawresi laabʼe”. 28 Ninye eere naq saʼ xyanqebʼ li winq maakʼaʼ junaq li qas qiitzʼin li qʼaxal nim chiru laj Juan. Abʼanan, li kachʼin saʼ li Xʼawabʼejilal li Yos qʼaxal nim chiru aʼan». 29 Naq chixjunil li tenamit ut ebʼ li nekeʼxchʼutubʼ li toj choʼq re li awabʼej xeʼrabʼi aʼin, xeʼxye naq li Yos tiik xchʼool xbʼaan naq xeʼkubʼsiik xhaʼ xbʼaan laj Juan. 30 Abʼan ebʼ laj pariseey ut li nekeʼxnaw chiʼus chirix li Chaqʼrabʼ xeʼxtzʼeqtaana li kiraj li Yos choʼq rehebʼ. Xeʼxbʼaanu aʼin xbʼaan naq inkʼaʼ xeʼxkʼulubʼa naq laj Juan tixkubʼsihebʼ xhaʼ.
31 Li Jesús kiʼok xyeebʼal: «Rikʼin ani tinjuntaqʼeeta li tenamit li wank chiruhebʼ li kutan aʼin? Ani chanchanebʼ wiʼ li winq aʼin? 32 Chanchanebʼ li kokʼal li chunchukebʼ saʼ kʼayil li nekeʼxjap re chi xyeebʼal chiribʼilebʼ ribʼ: “Xqayaabʼasi li xolbʼ choʼq eere ut inkʼaʼ xexxajok; xqabʼicha li rahil bʼich ut inkʼaʼ xexyaabʼak”. 33 Xbʼaan naq kiwulak laj Juan, aj Kubʼsihomhaʼ, li inkʼaʼ naxwaʼ li kaxlanwa chi moko narukʼ li bʼiin ut laaʼex nekeeye: “Wank maaʼus aj musiqʼej rikʼin”. 34 Ut xwulak li Ralal li Winq li nawaʼak ut naʼukʼaʼk ut nekeeye: “Kʼehomaq reetal, li winq aʼin nanumwaʼak ut narukʼ li bʼiin ut wank choʼq ramiiw ebʼ laj maak ut li nekeʼxchʼutubʼ li toj choʼq re li awabʼej”. 35 Abʼanan, rikʼin xchaabʼilal ru li xbʼaanuhom tixkʼutbʼesi naq wank xnaʼlebʼ».
36 Joʼkan bʼiʼ, jun rehebʼ laj pariseey inkʼaʼ naxkanabʼ xyeebʼal re, naq txik chi waʼak rikʼin. Joʼkan naq li Jesús kiʼok saʼ rochoch laj pariseey ut kichunlaak saʼ xmeex. 37 Ut saʼ li tenamit, wank chaq jun li ixq li nawbʼil ru joʼ aj maak. Naq kixnaw naq li Jesús yook chi waʼak* saʼ rochoch laj pariseey kixkʼam chaq jun li meet* li nujenaq chi sununkil aseeyt. 38 Kixkʼe ribʼ chirix li Jesús, kixkut ribʼ chi roq ut kiʼok chi yaabʼak ut chi xtʼaqresinkil li roq rikʼin xyaʼal ru. Tojaʼ naq kixmes rikʼin rismal, yook xtzʼubʼal li roq li Jesús ut xyulbʼal rikʼin sununkil aseeyt. 39 Naq laj pariseey li kibʼoqok re kiril aʼin kiʼok xyeebʼal saʼ xchʼool: «Wi propeet raj li winq aʼin, tixnaw raj naq li ixq aʼin aj maak». 40 Abʼan li Jesús naxnaw li naxkʼoxla li winq joʼkan naq kixye re: «At Simón, tinye aawe jun li naʼlebʼ». Ut li winq kixye re: «Ye chaq Kʼutunel!».
41 «Wiibʼ li winq wankebʼ chaq xkʼas rikʼin jun li winq li nakʼehok toʼ tumin; jun kixtoʼoni 500 denario,* ut li jun chik 50. 42 Saʼ xkʼabʼaʼ naq maakʼaʼebʼ xtumin re tojok, li winq kixkuyebʼ xmaak chi anchal xchʼool. Joʼkan utan, ani rehebʼ li winq aʼin qʼaxal trahoq re laj kʼehol toʼ?». 43 Laj Simón kixye re: «Ninye naq li wank naabʼal xkʼas». Aʼan kixye re: «Joʼkan tzʼaqal». 44 Tojaʼ naq li Jesús kixkaʼya li ixq ut kixye re laj Simón: «Ma nakaawil li ixq aʼin?». Xinʼok saʼ laawochoch ut inkʼaʼ xaakʼe xchʼajbʼal woq, abʼan li ixq aʼin kixtʼaqresi li woq rikʼin xyaʼal ru ut kixmes rikʼin rismal. 45 Laaʼat inkʼaʼ xaatzʼubʼ wu. Abʼan li ixq aʼin inkʼaʼ naxkanabʼ xtzʼubʼal li woq chalen naq xinʼok chaq. 46 Inkʼaʼ xaayul aseeyt saʼ injolom, abʼan li ixq aʼin kixyul sununkil aseeyt saʼ xbʼeen li woq. 47 Joʼkan naq ninye aawe naq usta naabʼal* li xmaak li ixq aʼin, tkuymanq tsachmanq xmaak xbʼaan naq kʼajoʼ naq kirahok. Abʼan, li kachʼin ajwiʼ nakuyeʼk xmaak, kachʼin ajwiʼ narahok. 48 Tojaʼ naq kixye re li ixq: «Kuybʼil sachbʼil chik laamaak». 49 Li wankebʼ rochbʼeen saʼ meex xeʼok xyeebʼal chiribʼilebʼ ribʼ: «Ani li winq aʼin re xyeebʼal aʼin?». 50 Abʼan li Jesús kixye re li ixq: «Xatkʼiraak xbʼaan naq nakaapaabʼ naq li Yos tatxtenqʼa. Ayu ut matkʼoxlak chik».