2 Corintios
1 Laaʼin laj Pablo li xʼapóstol li Kristo Jesús saʼ xkʼabʼaʼ li rajom li Yos ut laj Timoteo, li qechpaabʼanel. Naqatzʼiibʼa eere li esilhu aʼin laaʼex li wankex saʼ li xchʼuut li Yos aran Corinto ut re chixjunilebʼ li santil paabʼanel li wankebʼ Acaya.
2 Chiwanq taxaq eerikʼin li xnimal rusilal ut li xtuqtuukilal li Yos, li Qayuwaʼ, ut li Xyuwaʼ li Qaawaʼ Jesukriist.
3 Chinimaaq ru li Xyos ut li Xyuwaʼ li Qaawaʼ Jesukriist, li Yuwaʼbʼej li qʼaxal narahok ut naʼuxtaanank u,* ut li Yos, li qʼaxal nakʼojobʼank chʼool. 4 Aʼan naxkʼojobʼ qachʼool* naq naqakʼul ebʼ li chʼaʼajkilal re naq tooruuq xkʼojobʼankilebʼ xchʼool li yookebʼ xkʼulbʼal yalaq kʼaru chi chʼaʼajkilal rikʼin li kʼojobʼank chʼool li naqakʼul rikʼin li Yos. 5 Xbʼaan naq, joʼ chanru naq naqakʼul naabʼal li rahilal saʼ xkʼabʼaʼ li Kriist, qʼaxal naabʼal ajwiʼ xkʼojobʼankil qachʼool naqakʼul saʼ xkʼabʼaʼ li Kriist. 6 Joʼkan ajwiʼ, wi laaʼo naqakʼul ebʼ li chʼaʼajkilal, naqakʼul aʼin re xkʼojobʼankil leechʼool ut re eekolbʼal. Ut wi naqakʼul xkʼojobʼankil li qachʼool, naqakʼul aʼin re xkʼojobʼankil ajwiʼ leechʼool. Li kʼojobʼank chʼool aʼin nekextenqʼa chi xkuybʼal ebʼ li rahilal li naqakʼul ajwiʼ laaʼo. 7 Kaw qachʼool cheerix xbʼaan naq chʼolchʼo chiqu naq joʼ chanru naq nekeekʼul li rahilal li naqakʼul laaʼo, teekʼul ajwiʼ xkʼojobʼankil leechʼool joʼ naqakʼul laaʼo.
8 Ex wechpaabʼanel, naqaj xyeebʼal eere ebʼ li chʼaʼajkilal li xqakʼul naq wanko chaq saʼ xweent Asia. Xqanumsi jun nimla chʼaʼajkilal li xqʼax ru li qametzʼew ut xqekʼa naq tookamq. 9 Joʼkan ajwiʼ, xqekʼa naq chanchan tawiʼ ak tenebʼanbʼil kamk saʼ qabʼeen. Aʼin kikʼulmank re naq inkʼaʼ tqakʼojobʼ qachʼool rikʼin li qakʼaʼuxl, tqakʼojobʼ bʼan qachʼool rikʼin li Yos li naxwaklesihebʼ chi yoʼyo ebʼ li kamenaq. 10 Aʼan xooxkol naq kachʼin chik ma xookamk ut tooxkol wiʼ chik. Ut kʼojkʼo qachʼool rikʼin, naq aʼan inkʼaʼ tixkanabʼ qakolbʼal. 11 Laaʼex ajwiʼ naru nokooʼeetenqʼa naq textzʼaamanq chiqix. Xbʼaan naq wi naabʼalebʼ nekeʼtzʼaamank chiqix, li Yos trabʼi ebʼ li xtij ut tooxtenqʼa. Ut saʼ xkʼabʼaʼ aʼin naabʼalebʼ teʼbʼanyoxinq.
12 Wanko chi saq ru li qachʼool saʼ xyanqebʼ li qas qiitzʼin joʼ ajwiʼ saʼ eeyanq, wanko saʼ santilal ut maawaʼo aj kaʼpakʼal u. Joʼkan ajwiʼ, inkʼaʼ naqakanabʼ naq li xnaʼlebʼ li ruuchichʼochʼ tbʼeresinq qe, naqakanabʼ bʼan naq li xnimal rusilal li Yos tbʼeresinq qe. Laaʼo naqanima qibʼ rikʼin chixjunil aʼin. 13 Yooko xtzʼiibʼankil eere wiibʼ oxibʼ li naʼlebʼ li moko chʼaʼaj ta xyaabʼasinkil ut xtawbʼal ru ut nawoybʼeni naq inkʼaʼ teekanabʼ xtawbʼal ru 14 joʼ ak nekeʼxtaw ru wiibʼ oxibʼ, wankebʼ saʼ eeyanq nekeʼxtaw ru naq saʼ qakʼabʼaʼ nekeenima eeribʼ, laaʼo ajwiʼ tqanima qibʼ saʼ eekʼabʼaʼ saʼ xkutankil li Qaawaʼ Jesús.
15 Saʼ xkʼabʼaʼ naq chʼolchʼo chiwu aʼin xwaj xik eerulaʼaninkil xbʼeenwa laaʼex re naq teetaw wiʼ chik* xsahil leechʼool. 16 Xinkʼoxla numeʼk xbʼeenwa eerikʼin ut chirix chik aʼan tinxik Macedonia ut xinkʼoxla numeʼk wiʼ chik eerikʼin naq tinsutqʼiiq chaq Macedonia ut xineerochbʼeeni raj saʼ bʼe naq tinxik Judea. 17 Ma inkʼaʼ tabʼiʼ toj xinkʼoxla chiʼus naq xinkʼubʼ aʼin? Laaʼin inkʼaʼ xinbʼaanu li nawaj joʼkan naq moko xinye ta saʼ junpaat naq «tinxik» ut chirix chik aʼan «inkʼaʼ chik tinxik». 18 Yaal li naqaye eere, laaʼex naru nekeekʼojobʼ leechʼool rikʼin li Yos. Laaʼo moko naqaye ta xbʼeenwa us ut moqon chik inkʼaʼ. 19 Xbʼaan naq laj Silvano,* laj Timoteo ut laaʼin naqakʼe chi naweʼk chirix li Jesukriist, Ralal li Yos, aʼan inkʼaʼ naxye naq tixbʼaanu junaq li naʼlebʼ ut chirix chik aʼan inkʼaʼ naxbʼaanu, junelik bʼan naxbʼaanu li naxye. 20 Chixjunil li naxyeechiʼi li Yos natzʼaqlok ru saʼ xkʼabʼaʼ li Jesús. Ut saʼ xkʼabʼaʼ aʼan naqaye re li Yos joʼkan taxaq re naq tooruuq xkʼebʼal xloqʼal. 21 Abʼan li nayeehok re, naq laaʼex ut laaʼo reho li Kriist ut li kixsikʼ qu, aʼan li Yos. 22 Aʼan ajwiʼ kixkʼe li eetalil saʼ qabʼeen ut aʼan li santil musiqʼej* li wank saʼ li qachʼool. Li eetalil naxkʼut chiqu naq yaal naq tixkʼe qe ebʼ li osobʼtesink li tchalq moqon.
23 Toj maajiʼ ninxik Corinto re naq inkʼaʼ tinrahobʼtesi leechʼool. Li Yos naxnaw naq yaal aʼin. 24 Moko yookin ta xyeebʼal naq laaʼo aj echal re leepaabʼal xbʼaan naq laaʼex kaw xaqxokex xbʼaan leepaabʼal, yal yooko bʼan chi tenqʼank re naq sahaq saʼ leechʼool.