1 Pedro
3 Joʼkan ajwiʼ laaʼex ixaqilbʼej, kʼehomaq eeribʼ rubʼel xwankil leebʼeelom ut wi wankebʼ inkʼaʼ nekeʼxpaabʼ li raatin li Yos teʼoq chi paabʼank rikʼin rilbʼal li xchaabʼilal leebʼaanuhom ut maawaʼ xbʼaan leeraatin 2 xbʼaan naq aʼanebʼ xeʼxkʼe reetal naq saq ru leeyuʼam ut naq qʼaxal nekexʼoxloqʼink. 3 Leechʼinaʼusal maawaʼ raj li naʼilmank chi kutankil joʼ xtzʼulbʼal leerismal, roksinkil li oor ut xtiqibʼankil eeribʼ rikʼin tertokil tʼikr, 4 kanabʼomaq bʼan naq leechʼinaʼusal tkʼutunq rikʼin li wank saʼ leechʼool. Saʼ xkʼabʼaʼ aʼin tiqibʼomaq eeribʼ rikʼin li tuqtuukilal ut li tuulanil, aʼin qʼaxal oxloqʼ chiru li Yos ut inkʼaʼ naʼosoʼk. 5 Xbʼaan naq chi joʼkan nekeʼxyiibʼ chaq ribʼ ebʼ li santil ixq li wankebʼ roybʼenihom rikʼin li Yos. Ebʼ li ixq aʼin nekeʼxkʼe ribʼ rubʼel xwankil ebʼ li xbʼeelom, 6 joʼ chanru naq li xSara naxpaabʼ chaq laj Abrahán ut naxye qaawaʼ re. Laaʼex li xkoʼ, wi inkʼaʼ nekeekanabʼ xbʼaanunkil li us ut wi inkʼaʼ nekeekanabʼ naq leexiw tqʼaxoq saʼ eebʼeen.
7 Joʼkan ajwiʼ laaʼex bʼeelomej, kʼutbʼesimaq chiru leerixaqil naq nekeetaw ru. Ebʼ li ixq qʼaxal qʼunebʼ xchʼool cheeru laaʼex ut chanchanebʼ li bʼaas li najoreʼk saʼ junpaat. Joʼkan naq cheeroxloqʼihebʼ xbʼaan naq saʼ xkʼabʼaʼ li rusilal li Yos kixkʼehebʼ xyuʼam joʼ chanru naq kixkʼe eeyuʼam. Ut wi inkʼaʼ nekeebʼaanu aʼin, li Yos inkʼaʼ trabʼi leetij.
8 Re xraqbʼal, cheejunilex junajaq ru li leekʼaʼuxl ut teekʼutbʼesi naq nekextawok u, naq nekeʼxrahok joʼ nekeʼxra ribʼ ebʼ li junkabʼal, naq nekextoqʼobʼank u* ut naq nekeekubʼsi eeribʼ. 9 Meekʼe reqaj li maaʼusilal li xbʼaanuuk eere chi moko teehobʼ li xhobʼok eere. Teebʼaanu li us rehebʼ li junchʼol xbʼaan naq saʼ xkʼabʼaʼ aʼin xexbʼoqeʼk xbʼaan li Yos re naq teerechani jun li osobʼtesink.
10 Xbʼaan naq «li naraj xyalbʼal xsahil li yuʼam ut rilbʼal li chaabʼil kutan, tento tixnatʼ li ruʼuj raqʼ re naq inkʼaʼ tixye li inkʼaʼ us ut inkʼaʼ tbʼalaqʼiq rikʼin xtzʼuumal re.* 11 Tixnajtobʼresi ribʼ chiru li inkʼaʼ us ut tixbʼaanu li us, tixkʼe xqʼe chi wank saʼ usilal rikʼinebʼ li junchʼol. 12 Xbʼaan naq li xnaqʼ ru li Jehobʼa* wank saʼ xbʼeenebʼ li tiikebʼ xchʼool ut narabʼi li nekeʼxtzʼaama, abʼan li xnaqʼ ru li Jehobʼa* moko wank ta saʼ xbʼeenebʼ li nekeʼxbʼaanu li inkʼaʼ us».
13 Joʼkan naq, ani trahobʼtesinq eere wi chi anchal eechʼool nekeeraj xbʼaanunkil li us? 14 Abʼan, usta teekʼul li rahilal saʼ xkʼabʼaʼ li tiikilal, sahaq saʼ leechʼool. Abʼanan, meexuwa ru li nekeʼxuwa ru aʼanebʼ chi moko t-oq eekʼaʼuxl. 15 Teeroxloqʼi bʼan li Kriist joʼ Qaawaʼ saʼ leechʼool, junelik seebʼaqex chi xsumenkil li tpatzʼoq eere chirix leeroybʼenihom, abʼan naq yooqex chi sumenk teebʼaanu saʼ tuulanil ut qʼaxal texʼoxloqʼinq.
16 Junelik saqaq ru leechʼool* chiru li Yos maakʼaʼ naxye wi teʼaatinaq chirix eejolom ut teʼxye li inkʼaʼ us chirix li xchaabʼilal ru leebʼaanuhom joʼ aj tqehom re li Kriist, aʼanebʼ teʼkanaaq saʼ xutaan. 17 Qʼaxal us naq teekʼul li rahilal chirix li us, wi joʼkan naxkʼulubʼa li Yos, chiru naq teekʼul li rahilal chirix li inkʼaʼ us. 18 Xbʼaan naq li Kriist jun sut ajwiʼ kikamk chirix li maak ut maajunwa chik tixbʼaanu, jun li winq li chaabʼil xnaʼlebʼ kikamk chirixebʼ li inkʼaʼ usebʼ xnaʼlebʼ re naq texkʼameʼq rikʼin li Yos. Xeʼxkamsi saʼ tibʼelej abʼan kiwaklesiik chi yoʼyo saʼ musiqʼej.* 19 Ut naq ak wank saʼ musiqʼej xkoho xyeebʼal resil li raqok aatin rehebʼ li ánjel li wankebʼ saʼ tzʼalam, 20 li inkʼaʼ xeʼabʼink junxil, naq li Yos yook chaq chi oybʼenink chi anchal xchʼool saʼ xkutankil laj Noé ut naq yook chaq chi yiibʼamank li jukubʼ kabʼl. Moko kʼihebʼ ta xeʼkoleʼk chiru li haʼ, kaʼajwiʼ waqxaqibʼ li qas qiitzʼin.
21 Naru naqajuntaqʼeeta li kikʼulmank chiruhebʼ li kutan aʼan rikʼin li kubʼihaʼ li yookex wiʼ chi koleʼk anaqwan saʼ xkʼabʼaʼ naq li Jesukriist kiwaklesiik chi yoʼyo. Li kubʼihaʼ inkʼaʼ nakʼanjelak re risinkil xtzʼajnil leetibʼel, nakʼanjelak bʼan re naq texruuq xtzʼaamankil re li Yos naq saqaq ru leechʼool.* 22 Aʼan wank saʼ xnim ruqʼ li Yos xbʼaan naq aʼan xkoho saʼ choxa ut ebʼ li ánjel ut ebʼ li wankebʼ xwankil xeʼkʼeheʼk rubʼel xwankil aʼan.