Hechos

10 Joʼkan bʼiʼ, aran Cesarea wank chaq jun li winq aj Cornelio xkʼabʼaʼ, aʼan jun li winq li nataqlank saʼ xbʼeen jun siʼeent aj puubʼ re Italia. 2 Li winq aʼin joʼ ajwiʼ li wankebʼ saʼ rochoch nekeʼxloqʼoni li Yos chi anchalebʼ xchʼool. Junelik naxtenqʼahebʼ li wankebʼ saʼ rajbʼal ru* ut wulaj wulaj natijok chiru li Yos. 3 Abʼanan, naq kachʼin chik ma oxibʼ hoor re ewu kiril saʼ jun li moy u naq li xʼánjel li Yos kiʼok bʼarwiʼ wank aʼan ut kiyeeheʼk re: «Cornelio!». 4 Laj Cornelio kikanaak rilbʼal chi kʼajoʼ xxiw ut kixpatzʼ re: «Kʼaru Qaawaʼ?». Tojaʼ naq li ánjel kixye re: «Li tij li nakaabʼaanu ut li tenqʼ li nakaakʼe rehebʼ li nebʼaʼ ak xwulak rikʼin li Yos ut wank saʼ xchʼool. 5 Joʼkan naq taqla wiibʼ oxibʼ li winq aran Jope re naq teʼxkʼam chaq jun li winq li nakʼabʼaʼiik joʼ aj Simón ut nawbʼil ru joʼ aj Pedro. 6 Li winq aʼin yook chi kanaak saʼ rochoch laj Simón, li naxkʼanjela li tzʼuum ut li rochoch wank chixkʼatq li palaw». 7 Tojaʼ t-elq ajwiʼ li ánjel li kiʼaatinank re, kixbʼoq wiibʼ rehebʼ li xmoos ut jun laj puubʼ li naxloqʼoni li Yos chi anchal xchʼool ut wank saʼ xyanqebʼ li xmoos, 8 kixseeraqʼi rehebʼ chixjunil ut kixtaqlahebʼ Jope.

9 Saʼ li jun chik kutan naq yookebʼ chi xik ut nachʼ wankebʼ rikʼin li tenamit, laj Pedro kitaqeʼk chi tijok saʼ xbʼeen li kabʼl* naq kachʼin chik ma tuqtu waʼlebʼ. 10 Abʼan kichalk xtzʼokajik ut kiraj waʼak. Naq yookebʼ xkʼubʼankil li tzekemq, laj Pedro sachamil xkʼaʼuxl 11 ut kiril li choxa chi teeto ut kiril chanchan jun li nimla tʼikr re liin li chapcho saʼ xkaaxukuutil yook chi kubʼeek saʼ ruuchichʼochʼ. 12 Saʼ xbʼeen li tʼikr aʼin wank jalan jalanq xpaayil li xul li kaahibʼ roq ut ebʼ li xul li nekeʼxjukuki ribʼ ut ebʼ li nekeʼrupupik chiru choxa. 13 Tojaʼ naq jun li yaabʼ kuxej kixye re: «Waklin Pedro, kamsihebʼ li xul ut waʼin!». 14 Abʼan laj Pedro kixye: «Maajoqʼe Qaawaʼ. Maajun sut inyalom li muxbʼil ut tzʼaj ru». 15 Li yaabʼ kuxej kixye xkaʼsutil: «Kanabʼ xyeebʼal muxbʼil re li ak saabʼesinbʼil ru xbʼaan li Yos». 16 Ut aʼin kikʼulmank saʼ rox sut ut tikto kitaqeʼk li tʼikr saʼ choxa.

17 Sachso xchʼool kikanaak laj Pedro ut inkʼaʼ naxkanabʼ xkʼoxlankil kʼaru xyaalal li moy u aʼin. Ut naq yook chi kʼulmank aʼin, ebʼ li winq li taqlanbʼilebʼ xbʼaan laj Cornelio yookebʼ xpatzʼbʼal bʼar nakanaak rochoch laj Simón abʼan ak xaqxokebʼ saʼ li okebʼaal. 18 Xeʼxchʼeʼ li okebʼaal ut xeʼxpatzʼ ma aran yook chi kanaak laj Simón li nawbʼil ru joʼ aj Pedro. 19 Toj yook ajwiʼ laj Pedro xkʼoxlankil rix li moy u naq li Yos kixye re saʼ xkʼabʼaʼ li xsantil musiqʼej: «Kʼe reetal, oxibʼ li winq yookebʼ aasikʼbʼal. 20 Joʼkan naq waklin, kubʼen ut ayu rikʼinebʼ ut matkʼoxlak xbʼaan naq laaʼin xintaqlank rehebʼ». 21 Tojaʼ naq laj Pedro kikubʼeek bʼarwiʼ wankebʼ li winq ut kixye: «Arin wankin, laaʼin li nekeesikʼ. Kʼaru ajʼe naq xeʼxchalk?». 22 Ebʼ li winq xeʼxye re: «Laj Cornelio aʼan jun li winq li nataqlank rehebʼ laj puubʼ,* tiik xchʼool ut qʼaxal naroxloqʼi li Yos ut chixjunilebʼ laj judiiy us nekeʼaatinak chirix. Saʼ xkʼabʼaʼ jun li santil ánjel kiyeeheʼk re xbʼaan li Yos naq tatxbʼoq saʼ rochoch ut trabʼi li taaye». 23 Joʼkan naq laj Pedro kiroksihebʼ saʼ ochoch ut aran xeʼkanaak chi wark.

Wulajaq chik kiwakliik ut xkoho chirixebʼ, ut wiibʼ oxibʼ aj paabʼanel re Jope xkohebʼ chirix. 24 Naq ak xnumeʼk jun kutan, xwulak Cesarea. Ut laj Cornelio ak yook roybʼeninkilebʼ ut xchʼutubʼebʼ li rech-alal ut ebʼ li ramiiw. 25 Naq laj Pedro kiʼok saʼ ochoch, laj Cornelio xkoho xtawbʼal chaq, kixkut ribʼ chi roq ut kixwiqʼibʼ ribʼ chiru. 26 Abʼan laj Pedro kixwaklesi ut kixye re: «Xaqlin xbʼaan naq yal winqin ajwiʼ laaʼin». 27 Naq laj Pedro yook chi aatinak rikʼin, kiʼok ut aran kiril chi chʼutchʼu naabʼalebʼ li qas qiitzʼin. 28 Tojaʼ naq laj Pedro kixye rehebʼ: «Chʼolchʼo cheeru naq li chaqʼrabʼ naxye naq ebʼ laj judiiy inkʼaʼ naru naq teʼxjunaji ribʼ rikʼinebʼ li jalanebʼ xtenamit malaj teʼaatinaq rikʼinebʼ. Abʼan li Yos xkʼut chiwu naq moko naru ta naq tinye chirix junaq li qas qiitzʼin naq muxbʼil malaj tzʼaj ru. 29 Joʼkan naq inkʼaʼ xinqʼet wibʼ chi chalk naq xexwulak chinsikʼbʼal. Anaqwan yeehomaq we, kʼaʼut xineebʼoq?».

30 Laj Cornelio kixye: «Kaahibʼ kutan anaqwan yookin chi tijok saʼ wochoch saʼ li hoonal ajwiʼ aʼin naq kachʼin chik ma oxibʼ hoor re ewu. Kutamil chiwu jun li winq li nalemtzʼunk li xtʼikr 31 ut kixye we: “Cornelio ak xʼabʼimank laatij, ut wank saʼ xchʼool li Yos li tenqʼ li nakaakʼe rehebʼ li nebʼaʼ. 32 Joʼkan naq taqla jun li qas qiitzʼin aran Jope re naq tixbʼoq chaq laj Simón li nawbʼil ru joʼ aj Pedro. Li winq aʼin yook chi kanaak saʼ rochoch laj Simón, li naxkʼanjela li tzʼuum ut li rochoch wank chixkʼatq li palaw”. 33 Saʼ junpaat xintaqla aasikʼbʼal, ut laaʼat xatchalk chi anchal aachʼool. Ut anaqwan chiqajunilo wanko arin chiru li Yos re rabʼinkil chixjunil li xatxtaqla chi xyeebʼal li Jehobʼa».*

34 Naq kirabʼi aʼin, laj Pedro kiʼok chi aatinak ut kixye: «Anaqwan chʼolchʼo chiwu naq li Yos inkʼaʼ nasikʼok u, 35 naxkʼulubʼaʼebʼ bʼan li nekeʼoxloqʼink re ut nekeʼxbʼaanu li us maakʼaʼ naxye bʼar xtenamitebʼ. 36 Aʼan kixtaqla li raatin rehebʼ li ralal xkʼajol li tenamit Israel re xkʼebʼal chi naweʼk li chaabʼil esil chirix li tuqtuukilal saʼ xkʼabʼaʼ li Jesukriist. Aʼan Xqaawaʼ chixjunilebʼ. 37 Naq laj Juan ak kixkʼe chi naweʼk li esil chirix li kubʼihaʼ, laaʼex nekeenaw li naʼlebʼ li kiyeemank chaq chalen Galilea ut saʼ chixjunil Judea: 38 chirix li Jesús laj Nazaret. Li Yos kixsikʼ ru rikʼin santil musiqʼej ut kixkʼe xwankil. Ut saʼ xkʼabʼaʼ aʼin kixbʼaanu li us ut kixkʼirtasi chixjunilebʼ li wankebʼ rubʼel xwankil laj Tza* xbʼaan naq li Yos wank rikʼin. 39 Laaʼo xqil ut nokooʼaatinak chirix chixjunil li kixbʼaanu saʼ xtenamitebʼ laj judiiy ut saʼ xteepal Jerusalén. Abʼan aʼanebʼ xeʼxkamsi naq xeʼxtʼuyubʼ chiru cheʼ. 40 Li Yos kixwaklesi chi yoʼyo saʼ rox kutan ut kixkanabʼ naq tixkʼutbʼesi ribʼ chiruhebʼ 41 abʼan moko chiru ta chixjunil li tenamit, kaʼajwiʼ chiqu laaʼo li xoowaʼak ut xooʼukʼak rochbʼeen naq ak xwaklesiik chi yoʼyo saʼ xyanqebʼ li kamenaq. Laaʼo xooxaqabʼaak xbʼaan li Yos chi rubʼelaj re naq tqil ut tooʼaatinaq chirix. 42 Aʼan kixye ajwiʼ qe naq tqakʼe chi naweʼk re li tenamit ut tqachʼolobʼ chi tzʼaqal re ru naq aʼan li kixaqabʼaak xbʼaan li Yos joʼ aj raqol aatin saʼ xbʼeen li yoʼyokebʼ ut saʼ xbʼeen li kamenaqebʼ. 43 Chixjunilebʼ li propeet xeʼaatinak chirix li Jesús ut xeʼxye naq saʼ xkʼabʼaʼ aʼan, li Yos tixkuyebʼ xmaak li nekeʼpaabʼank re li Jesús».

44 Toj yook ajwiʼ chi aatinak laj Pedro chirix li naʼlebʼ aʼin naq li santil musiqʼej kikubʼeek chaq saʼ xbʼeenebʼ li yookebʼ rabʼinkil li esil.* 45 Ut ebʼ laj paabʼanel aj judiiy* li xeʼochbʼeenink re laj Pedro, sachsokebʼ xchʼool xeʼkanaak xbʼaan naq li maawaʼebʼ aj judiiy yookebʼ ajwiʼ xkʼulbʼal li santil musiqʼej joʼ maatan 46 ut xeʼrabʼi naq yookebʼ chi aatinak saʼ jalan jalanq chi aatinobʼaal ut yookebʼ ajwiʼ xnimankil li Yos. Chirix chik aʼan laj Pedro kixye: 47 «Ebʼ li qas qiitzʼin aʼin xeʼxkʼul ajwiʼ li santil musiqʼej joʼ xqakʼul laaʼo. Joʼkan naq ani naru naxye naq inkʼaʼ naru naq t-oksimanq li haʼ re xkubʼsinkilebʼ xhaʼ?». 48 Tojaʼ naq kixye naq teʼkubʼsiiq xhaʼ saʼ xkʼabʼaʼ li Jesukriist. Chirix chik aʼan xeʼxtzʼaama chiru naq tkanaaq rikʼinebʼ wiibʼ oxibʼ kutan.