Hebreos
5 Joʼkan bʼiʼ, li winq li xaqabʼanbʼil choʼq xyuwaʼil aj tij nakʼanjelak re xtenqʼankilebʼ li qas qiitzʼin chi xloqʼoninkil li Yos ut re xyeechiʼinkil li maatan ut li mayejanbʼil xul chirixebʼ li xmaak li qas qiitzʼin. 2 Li xyuwaʼil aj tij napaltoʼk ajwiʼ. Saʼ xkʼabʼaʼ aʼin naxtoqʼobʼa ruhebʼ* li nekeʼpaltoʼk xbʼaan xmaajelal xnaʼlebʼebʼ. 3 Joʼkan naq tento tixyeechiʼi li maatan chirix li xmaak ut chirix li xmaak li tenamit.
4 Jun li winq inkʼaʼ naru naxxaqabʼ ribʼ xjunes choʼq xyuwaʼil aj tij, li Yos bʼan naxaqabʼank re joʼ kikʼulmank rikʼin laj Aarón. 5 Joʼkan ajwiʼ, li Kriist moko xjunes ta kixxaqabʼ ribʼ choʼq xyuwaʼil aj tij re xtawbʼal xloqʼal, li Yos bʼan kikʼehok re xloqʼal naq kiyeeheʼk re: «Laaʼat li walal; anaqwan laaʼin chik aayuwaʼ». 6 Joʼ naxye ajwiʼ saʼ jun chik xraqal li raatin li Yos: «Laaʼat aj tij joʼ laj Melquisedec ut junelik tatwanq choʼq aj tij».
7 Naq li Kriist kiwank saʼ ruuchichʼochʼ, kiʼelajink ut kitzʼaamank chiru li tkoloq re chiru li kamk ut kixbʼaanu aʼin chi kaw xyaabʼ xkux ut yook chi yaabʼak. Ut kiʼabʼiik xbʼaan naq naroxloqʼi li Yos. 8 Usta ralal li Yos, kixtzol abʼink xbʼaan chixjunil li rahilal li kixkʼul. 9 Ut naq ak xtzʼaqobʼresiik ru, chixjunilebʼ li teʼabʼinq chiru teʼruuq chi koleʼk ut xtawbʼal li junelik yuʼam saʼ xkʼabʼaʼ aʼan 10 xbʼaan naq li Yos kixxaqabʼ choʼq xyuwaʼil aj tij joʼ laj Melquisedec.
11 Toj wank naabʼal li naʼlebʼ li tqaye raj chirix, abʼan chʼaʼaj xchʼolobʼankil cheeru xbʼaan naq timil nekeetaw ru. 12 Anaqwan laaʼex raj chik aj kʼutunel, abʼan toj nekeeraj naq tkʼuteʼq wiʼ chik cheeru li xbʼeen naʼlebʼ li xeetzol saʼ xtiklajik chirix li raatin li Yos. Toj nekeeraj li leech joʼebʼ li kʼuulaʼal ut inkʼaʼ nekeeraj li kawil tzekemq li nekeʼxwaʼ li ak ninqebʼ chik. 13 Li inkʼaʼ naxkanabʼ rukʼbʼal li leech inkʼaʼ naxnaw li us li naxkʼut li raatin li Yos xbʼaan naq toj kachʼin. 14 Abʼanan, li nekeʼxwaʼ li kawil tzekemq aʼanebʼ li kawebʼ xpaabʼal. Ebʼ li qas qiitzʼin aʼin ak xeʼxtzol roksinkil chiʼus li xkʼaʼuxebʼ joʼkan naq nekeʼxnaw rilbʼal bʼar wank li us ut li inkʼaʼ us.