Mateo

10 Tojaʼ naq kixchʼutubʼ li kabʼlaju chi tzolom ut kixkʼehebʼ xwankil re naq teʼisinq maaʼus aj musiqʼej* ut re naq teʼxkʼirtasi li jalan jalanq xyajelebʼ ut xrahilalebʼ.

2 Aʼin li xkʼabʼaʼebʼ li kabʼlaju chi apóstol: li xbʼeen aʼan laj Simón (li nakʼabʼaʼiik joʼ aj Pedro) ut li jun chik laj Andrés, ebʼ li winq aʼin riitzʼinebʼ ribʼ.* Laj Santiago ut laj Juan ralalebʼ laj Zebedeo; 3 laj Felipe ut laj Bartolomé; laj Tomás ut laj Mateo li naxchʼutubʼ li toj choʼq re li awabʼej; laj Santiago ralal laj Alfeo, ut laj Tadeo; 4 laj Simón, li naxbʼaanu chixjunil chi anchal xchʼool, ut laj Judas Iscariote (li kixqʼaxtesi li Jesús moqon).

5 Naq li Jesús kixtaqla li kabʼlaju chi apóstol, kixye rehebʼ: «Mexxik saʼ xbʼehebʼ li maawaʼebʼ aj judiiy chi moko texʼoq saʼ junaq li tenamit re Samaria. 6 Meekanabʼ bʼan xsikʼbʼal ebʼ li karneer re li tenamit* Israel li sachsokebʼ. 7 Naq yooqex chi xik, teeye “Li Xʼawabʼejilal li choxa ak xnachʼok chaq”. 8 Cheekʼirtasi ebʼ li yaj, cheewaklesi chi yoʼyo ebʼ li kamenaq, cheekʼirtasi ebʼ li saqlep, cheerisi ebʼ li maaʼus aj musiqʼej. Chi maatan xeekʼul, chi maatan ajwiʼ teekʼe. 9 Meekʼam saʼ xkʼaamal eesaʼ li tumin re oor, re plaat malaj junaq chik li tumin, 10 ut meekʼam eechampa choʼq re leebʼeenik chi moko teekʼam wiibʼaq leetʼikr chi moko teekʼam leexaabʼ* ut leexuqʼ; xbʼaan naq laj kʼanjel xkʼulubʼ naq tkʼeheʼq xtzekemq.

11 »Naq texʼoq saʼ junaq li tenamit malaj kʼalebʼaal, sikʼomaq toj reetal teetaw junaq li qas qiitzʼin li xkʼulubʼ rabʼinkil li esil ut kanaqex rikʼin toj reetal twulaq xkutankil leexikik. 12 Naq texʼoq saʼ junaq li ochoch, kʼehomaq xsahilebʼ xchʼool* li wankebʼ aran. 13 Ut wi li junkabʼal naxkʼulubʼa naq teerulaʼani, tixtaw rusilal; abʼan wi inkʼaʼ tixkʼulubʼa, inkʼaʼ tixtaw rusilal li ulaʼaniik. 14 Wi saʼ junaq ochoch malaj tenamit inkʼaʼ texkʼuleʼq malaj inkʼaʼ texʼabʼiiq, naq texʼelq aran chiqʼomaq li poqs cheeroq. 15 Relik chi yaal ninye eere naq saʼ Xkutankil li Raqok Aatin qʼaxal ra wiʼ chik tixkʼul li tenamit aʼin chiru li kixkʼul chaq Sodoom ut Gomoor.

16 »Cheenawaq naq yookin eetaqlankil joʼ karneer saʼ xyanqebʼ li josqʼ aj xul. Joʼkan naq, seebʼaqex joʼebʼ li kʼantiʼ, abʼan tuulanaqex joʼebʼ li mukuy. 17 Weent teebʼaanu rikʼinebʼ li qas qiitzʼin xbʼaan naq texqʼaxtesiiq saʼ ruqʼebʼ laj raqol aatin ut texkʼeheʼq chi tzʼuum* saʼebʼ li naʼaj re loqʼonink. 18 Ut saʼ inkʼabʼaʼ texkʼameʼq chiruhebʼ li ruuchil awabʼej ut chiruhebʼ li awabʼej, re naq aʼanebʼ ut ebʼ li tenamit teʼxnaw chiwix. 19 Abʼanan, naq texqʼaxtesiiq, miʼok eekʼaʼuxl chi xkʼoxlankil kʼaru teeye malaj chanru teeye xbʼaan naq saʼ li hoonal aʼan tyeemanq eere li teeye. 20 Moko eejunes ta texʼaatinaq, li xsantil musiqʼej Leeyuwaʼ t-aatinaq chi xtzʼuumal eere. 21 Joʼkan ajwiʼ, ebʼ li qas qiitzʼin teʼxqʼaxtesi ebʼ li ras ut ebʼ li riitzʼin re naq teʼkamsiiq, ut li yuwaʼbʼej tixqʼaxtesi li ralal, ut ebʼ li alal kʼajolbʼej teʼxqʼet ribʼ chiru li xnaʼ xyuwaʼ ut teʼxbʼaanu naq teʼkamsiiq. 22 Xikʼ texʼileʼq xbʼaan linkʼabʼaʼ. Abʼan li tixkuy toj naq twulaq li xraqik, aʼan tkoleʼq. 23 Naq texrahobʼtesiiq saʼ junaq tenamit, ayuqex saʼ jalan chik. Relik chi yaal ninye eere naq toj maajiʼ ajwiʼ nekeechoy xbʼeeninkil chixjunil ebʼ li tenamit re Israel naq tchalq li Ralal li Winq.

24 »Li toj yook chi tzolok moko naxqʼax ta ru li nakʼutuk re chi moko li moos ta naxqʼax ru laj echal re. 25 Li toj yook chi tzolok sahaq saʼ xchʼool naq twulaq joʼ laj kʼutul re ut joʼkan ajwiʼ tixkʼul li moos rikʼin laj echal re. Wi laj echal ochoch nekeʼxkʼabʼaʼi choʼq aj Tza,* chanru naq inkʼaʼ teʼkʼabʼaʼiiq chi joʼkan li wankebʼ saʼ rochoch! 26 Joʼkan naq meexuwahebʼ xbʼaan naq maakʼaʼ wank chi tzʼaptzʼo chi inkʼaʼ ta t-elq chi kutankil ut maakʼaʼ wank chi muqmu chi inkʼaʼ ta tnawmanq. 27 Li ninye eere saʼ qʼoqyink, yeehomaq chi kutankil; ut li teerabʼi saʼ jas, yeehomaq resil saʼ xbʼeenebʼ li kabʼl.* 28 Meexuwahebʼ li teʼruuq eekamsinkil abʼan inkʼaʼ teʼruuq xrambʼal cheeru naq twanq wiʼ chik eeyuʼam saʼ li kutan chalk re; teexuwa bʼan ru li Yos li naru tixbʼaanu naq texʼosoʼq chi junajwa.* 29 Ma inkʼaʼ tabʼiʼ nakʼayimank chi jun sentaaw* wiibʼ li kokʼ xul li nekeʼrupupik? Abʼanan, maajun rehebʼ natʼaneʼk saʼ chʼochʼ chi inkʼaʼ tixnaw Leeyuwaʼ. 30 Abʼan, ajlanbʼil ajwiʼ chixjunil rismal leejolom. 31 Joʼkan bʼiʼ, mexxuwak, laaʼex qʼaxal terto eetzʼaq chiru naabʼal li kokʼ xul li nekeʼrupupik.

32 »Wi junaq naxye chiru li tenamit naq naxnaw wu, laaʼin ajwiʼ tinye chiru linchoxahil Yuwaʼ naq ninnaw ru. 33 Abʼan li ani naxye chiru li tenamit naq inkʼaʼ naxnaw wu, laaʼin ajwiʼ tinye chiru linchoxahil Yuwaʼ naq inkʼaʼ ninnaw ru. 34 Meekʼoxla naq xinchalk re naq twanq li tuqtuukilal saʼ ruuchichʼochʼ; moko xinchalk ta re aʼan, xinchalk bʼan re naq inkʼaʼ teʼwanq saʼ junajil. 35 Xbʼaan naq xinchalk chi jachok ibʼ. Li alalbʼej tixjach ribʼ rikʼin li xyuwaʼ, li koʼbʼej tixjach ribʼ rikʼin li xnaʼ ut li alibʼej tixjach ribʼ rikʼin li xnaʼ li xbʼeelom. 36 Joʼkan utan, li xikʼ teʼiloq eere aʼanebʼ ajwiʼ li wanqebʼ saʼ leerochoch. 37 Li qʼaxal naxra li xnaʼ malaj li xyuwaʼ chiwu laaʼin, moko xkʼulubʼ ta naq twanq choʼq intzolom. Ut li qʼaxal naxra li ralal xkʼajol chiwu laaʼin, moko xkʼulubʼ ta naq twanq choʼq intzolom. 38 Li inkʼaʼ naxkʼulubʼa li rahobʼtesiik* ut inkʼaʼ nikinxtaqe, moko xkʼulubʼ ta naq twanq choʼq intzolom. 39 Li tixyal xkolbʼal li xyuʼam tixsach, ut li tixsach xyuʼam saʼ inkʼabʼaʼ, tixtaw xyuʼam.

40 »Li nakʼuluk eere, nikinxkʼul ajwiʼ laaʼin; ut li nakʼuluk we, naxkʼul ajwiʼ li kitaqlank chaq we. 41 Li nakʼuluk re junaq li propeet xbʼaan naq propeet, tixkʼul xqʼajkamunkil joʼ jun propeet, ut li naxkʼul jun laj kʼanjel chiru li Yos xbʼaan naq aj kʼanjel chiru li Yos, tixkʼul xqʼajkamunkil joʼ jun laj kʼanjel chiru li Yos. 42 Ut relik chi yaal ninye eere: li tixkʼe usta jun sekʼ ajwiʼ li haʼ re jun rehebʼ li kubʼenaq xwankil xbʼaan naq intzolom maajoqʼe tkanaaq chi inkʼaʼ ta tixkʼul xqʼajkamunkil».