1 Juan
3 Kʼehomaq reetal, li Yuwaʼbʼej kʼajoʼ nokooxra xbʼaan naq yeebʼil chiqix naq laaʼo ralal xkʼajol li Yos! Ut yaal naq laaʼo ralal xkʼajol. Joʼkan naq li ruuchichʼochʼ inkʼaʼ naxnaw qu xbʼaan naq toj maajiʼ naxnaw ru aʼan. 2 Ex wechpaabʼanel anaqwan laaʼo ralal xkʼajol li Yos abʼan aʼan toj maajiʼ naxkʼutbʼesi chiqu chixjunil chirix li qayuʼam li tchalq moqon. Ut naq tixkʼutbʼesi ribʼ, chʼolchʼo chiqu naq chanchanaqo joʼ aʼan xbʼaan naq tqil ru chi kutankil. 3 Ut li wank roybʼenihom chirix aʼan naxsaqobʼresi ribʼ xbʼaan naq aʼan maakʼaʼ xtzʼajnil.
4 Li qas qiitzʼin li naxyuʼami li maak yook xqʼetbʼal li chaqʼrabʼ xbʼaan naq li maak aʼan xqʼetbʼal li chaqʼrabʼ. 5 Laaʼex nekeenaw ajwiʼ naq aʼan kikʼutbʼesiik re risinkil li qamaak ut rikʼin maakʼaʼ li maak. 6 Li wank saʼ junajil rikʼin inkʼaʼ naxyuʼami li maak; li naxyuʼami li maak inkʼaʼ rilom ru chi moko xnawom ta ru. 7 Ex walal inkʼajol, li raarokex inbʼaan, maaʼani tbʼalaqʼinq eere. Li naxbʼaanu li us tiik xchʼool, joʼ naq aʼan tiik xchʼool. 8 Li naxyuʼami li maak naxkʼam re rikʼin laj Tza* xbʼaan naq laj Tza* ak yook chaq chi maakobʼk chalen saʼ xtiklajik. Aʼin ajʼe naq kikʼutbʼesiik li Ralal li Yos: re xjukʼbʼal li xkʼanjel laj Tza.*
9 Li yoʼlajenaq rikʼin li Yos inkʼaʼ naxyuʼami li maak xbʼaan naq li xsantil musiqʼej li Yos wank junelik rikʼin ut naxkanabʼ xyuʼaminkil li maak xbʼaan naq yoʼlajenaq rikʼin li Yos. 10 Li ralal xkʼajol li Yos ut li ralal xkʼajol laj Tza* nawbʼilebʼ ru xbʼaan aʼin: li inkʼaʼ naxyuʼami li us inkʼaʼ naxkʼam re rikʼin li Yos ut li inkʼaʼ naxra li ras riitzʼin inkʼaʼ ajwiʼ naxkʼam re rikʼin li Yos. 11 Xbʼaan naq aʼin li esil li xeerabʼi chalen saʼ xtiklajik: naq tqara qibʼ chiqibʼil qibʼ 12 moko joʼ ta laj Caín li kixkʼam re rikʼin li Maaʼus ut kixkamsi li riitzʼin. Ut kʼaʼut kixkamsi? Xbʼaan naq maaʼus xnaʼlebʼ, abʼan li riitzʼin chaabʼil xnaʼlebʼ.
13 Ex aj paabʼanel misach eechʼool naq xikʼ texril li ruuchichʼochʼ. 14 Laaʼo naqanaw naq junxil chanchan tawiʼ kamenaqo abʼan anaqwan yoʼyoko xbʼaan naq naqarahebʼ laj paabʼanel. Li inkʼaʼ narahok chanchan tawiʼ kamenaq. 15 Li xikʼ naril li ras riitzʼin aj kamsinel ut laaʼex nekeenaw naq laj kamsinel inkʼaʼ tixkʼul li junelik yuʼam. 16 Saʼ xkʼabʼaʼ aʼin naqanaw chirix li rahok xbʼaan naq aʼan kixqʼaxtesi li xyuʼam chiqix ut tenebʼanbʼil saʼ qabʼeen xqʼaxtesinkil li qayuʼam chirixebʼ li qechpaabʼanel. 17 Abʼan wi junaq li qas qiitzʼin wank xjunkabʼlal ut inkʼaʼ naxtoqʼobʼa ru* li ras riitzʼin li wank saʼ rajbʼal ru, chanru tixye naq naxra li Yos? 18 Ex walal inkʼajol li raarokex inbʼaan moko kaʼaj tawiʼ teekʼutbʼesi leerahom rikʼin li nekeeye, teekʼutbʼesi bʼan rikʼin leebʼaanuhom ut chi tzʼaqal yaal.
19 Chi joʼkan tqanaw naq wank qikʼin li yaal ut chʼolchʼooq chiqu naq li Yos nokooxra, 20 usta li qachʼool naraqok aatin saʼ qabʼeen, li Yos qʼaxal nim chiru li qachʼool ut naxnaw chixjunil. 21 Ex wechpaabʼanel wi li qachʼool inkʼaʼ naraqok aatin saʼ qabʼeen naru nokooʼaatinak rikʼin li Yos chi maakʼaʼ qaxiw. 22 Ut chixjunil li naqatzʼaama re tqakʼul xbʼaan naq yooko xpaabʼankil li xchaqʼrabʼ ut yooko xbʼaanunkil li nawulak chiru. 23 Aʼan aʼin li xchaqʼrabʼ: naq toopaabʼanq saʼ xkʼabʼaʼ li Jesukriist, li Ralal, ut tqara qibʼ chiqibʼil qibʼ joʼ kixye qe naq tqabʼaanu. 24 Joʼkan ajwiʼ li naxpaabʼ li xchaqʼrabʼ li Yos nawank saʼ junajil rikʼin aʼan ut li Yos nawank saʼ junajil rikʼin li qas qiitzʼin aʼin. Ut saʼ xkʼabʼaʼ li santil musiqʼej* li kixkʼe qe naqanaw naq aʼan wank saʼ junajil qikʼin.