Romanos
15 Abʼan, laaʼo li kaw qapaabʼal tento tqatenqʼahebʼ li inkʼaʼ kawebʼ xpaabʼal re naq teʼxkuy xnumsinkil li nachʼaʼajkoʼk chiruhebʼ xkʼulubʼankil ut inkʼaʼ tqasikʼ li us kaʼajwiʼ choʼq qe qajunes. 2 Chiqajunqal tqasikʼ li us choʼq rehebʼ li junchʼol ut tqabʼaanu ajwiʼ li us rehebʼ re naq tkawuuq xpaabʼalebʼ. 3 Xbʼaan naq, chi moko li Kriist kixsikʼ li us choʼq re xjunes, kixbʼaanu bʼan joʼ chanru tzʼiibʼanbʼil: «Li aatin li xeʼroksi re aahobʼal, xeʼroksi ajwiʼ re inhobʼal». 4 Xbʼaan naq chixjunil li kitzʼiibʼamank junxil kitzʼiibʼamank re qatzolbʼal re naq tooruuq roybʼeninkil li kixyeechiʼi qe li Yos choʼq re li kutan chalk re. Xbʼaan naq li Raatin li Yos nokooxtenqʼa chi xkuybʼal ut naxkʼe xkʼojobʼankil qachʼool. 5 Aʼ taxaq li Yos tixkʼe eere li kuyum ut li xkʼojobʼankil leechʼool. Ut nintijok cheerix re naq texkʼoxlaq joʼ kikʼoxlak chaq li Kristo Jesús 6 re naq saʼ junajil ut chi junaj ru xyaabʼ leekux, teekʼe xloqʼal li Xyos ut Xyuwaʼ li Qaawaʼ Jesukriist.
7 Joʼkan naq cheekʼulaq eeribʼ cheeribʼil eeribʼ chi anchal eechʼool joʼ naq li Kriist xexkʼul ajwiʼ chi anchal xchʼool re naq li Yos tixkʼul xloqʼal. 8 Xbʼaan naq ninye eere naq li Kriist kiwank choʼq xmoos ebʼ laj judiiy* re xkʼutbʼesinkil naq li Yos naxbʼaanu li naxye ut re xkʼutbʼesinkil naq yaal li yeechiʼom li kixbʼaanu li Yos rehebʼ li xxeʼtoon ebʼ laj judiiy. 9 Kibʼaanumank aʼin re naq ebʼ li tenamit teʼxkʼe xloqʼal li Yos saʼ xkʼabʼaʼ naq naʼuxtaanank u.* Joʼ chanru tzʼiibʼanbʼil: «Joʼkan naq tinnima aawu saʼ xyanqebʼ li tenamit ut tinbʼichanq re xnimankil laakʼabʼaʼ». 10 Aʼan naxye ajwiʼ: «Chisahoʼq leechʼool ex tenamit rikʼin xtenamit li Yos». 11 Ut jun chik xraqal li raatin li Yos naxye: «Ex tenamit, cheenimaq ru li Jehobʼa.* Chinimaaq taxaq ru xbʼaanebʼ li tenamit». 12 Laj Isaías kixye ajwiʼ: «Tchalq li xxeʼ laj Jesé li tjolominq rehebʼ li tenamit. Ut ebʼ li tenamit teʼxkʼojobʼ xchʼool chirix». 13 Aʼ taxaq li Yos li nakʼehok xnimal qoybʼenihom chinujobʼresinq eere rikʼin chixjunil li sahil chʼoolejil ut tuqtuukilal saʼ leepaabʼal re naq numtajenaqaq leeroybʼenihom xbʼaan xwankil li santil musiqʼej.
14 Ex wechpaabʼanel, chʼolchʼo chiwu naq numtajenaq xchaabʼilal leechʼool ut wank naabʼal leenaʼlebʼ ut naru nekeekʼe eenaʼlebʼ chiribʼil eeribʼ. 15 Abʼanan, chi chʼolchʼo ru xexintzʼiibʼa chirix wiibʼ oxibʼ li naʼlebʼ re xjultikankil wiʼ chik cheeru. Ninbʼaanu aʼin saʼ xkʼabʼaʼ naq li Yos kixkʼutbʼesi chiwu li xnimal rusilal, 16 re naq laaʼinaq xmoos li Kristo Jesús choʼq rehebʼ li tenamit. Yookin chi kʼanjelak chi kaw saʼ li kʼanjel li kʼebʼil xbʼaan li Yos chirix li chaabʼil esil re naq ebʼ li tenamit teʼkanaaq joʼ jun li mayej li nawulak chiru li Yos, li mayej li santobʼresinbʼil choʼq re saʼ xkʼabʼaʼ li santil musiqʼej.
17 Joʼkan naq nasahoʼk inchʼool chi xtaqenkil li Kristo Jesús ut chi xbʼaanunkil li xkʼanjel li Yos. 18 Inkʼaʼ tinʼaatinaq chirix li xinbʼaanu, tinʼaatinaq bʼan chirix chanru xinroksi li Kriist re naq ebʼ li tenamit teʼabʼinq. Ut kiruuk xbʼaanunkil aʼin xbʼaan li waatin ut linbʼaanuhom. 19 Xeʼabʼink xbʼaan ebʼ li xninqal ru sachbʼachʼoolej ut xninqal ru naʼlebʼ li kixbʼaanu li xsantil musiqʼej li Yos. Chi joʼkan xinkʼe resil yalaq bʼar* chirix li Kriist, xintikibʼ chalen Jerusalén toj Ilírico. 20 Joʼkan naq xinkʼubʼ saʼ inchʼool naq inkʼaʼ tinkʼe resil li chaabʼil esil bʼarwiʼ ak xkʼemank chi naweʼk li xkʼabʼaʼ li Kriist re naq inkʼaʼ tinchap li kʼanjel li ak kixtikibʼ jalan chik li qas qiitzʼin. 21 Joʼ chanru tzʼiibʼanbʼil: «Ebʼ li inkʼaʼ xeʼkʼeheʼk chixnaw chirix aʼan teʼril ru, ut ebʼ li inkʼaʼ xeʼrabʼi resil teʼxtaw ru».
22 Ut saʼ xkʼabʼaʼ ajwiʼ aʼin, naabʼal sut kichʼaʼajkoʼk chiwu eerulaʼaninkil. 23 Anaqwan ak xinraqeʼk xkʼebʼal resil li chaabʼil esil saʼebʼ li teep aʼin ut junxil chik nawaj rilbʼal eeru. 24 Joʼkan bʼiʼ, naq yooqin chi xik España nawoybʼeni naq tinruuq chi numeʼk eerikʼin. Ut naq ak xoowank junpaataq saʼ komonil chi sa qachʼool, twulaq raj chiwu naq tineekanabʼ chaq saʼ bʼe naq tinxik España. 25 Abʼan anaqwan xik we Jerusalén re xtenqʼankilebʼ li santil paabʼanel. 26 Ebʼ laj paabʼanel re Macedonia ut re Acaya xeʼxwotz chi anchalebʼ xchʼool li kʼaru rehebʼ rikʼinebʼ li santil paabʼanel li wankebʼ Jerusalén li nebʼaʼebʼ. 27 Abʼan ebʼ laj paabʼanel sahebʼ saʼ xchʼool chi xtenqʼankilebʼ xbʼaan naq wankebʼ saʼ kʼas rikʼinebʼ. Ebʼ li santil paabʼanel xeʼxwotz rikʼinebʼ laj paabʼanel aʼin chixjunil li xeʼxkʼul rikʼin li Yos. 28 Abʼan anaqwan xik we Jerusalén re xqʼaxtesinkil rehebʼ li santil paabʼanel li xeʼxkʼe ebʼ li qechpaabʼanel. Naq ak xinraqeʼk xbʼaanunkil aʼin, tinxik España. Ut naq yooqin chi xik tinnumeʼq eerikʼin. 29 Joʼkan ajwiʼ, chʼolchʼo chiwu naq tinkʼam eere naabʼal li osobʼtesink li nachalk rikʼin li Kriist naq tinwulaq eerulaʼaninkil.
30 Ex wechpaabʼanel, nintzʼaama cheeru saʼ xkʼabʼaʼ li Qaawaʼ Jesukriist ut xbʼaan li rahok li naxkʼe li santil musiqʼej naq teekʼe eechʼool chi tijok chiwix joʼ ninbʼaanu laaʼin, 31 re naq tinkoleʼq saʼ ruqʼebʼ li inkʼaʼ nekeʼpaabʼank aran Judea ut re naq ebʼ li santil paabʼanel li wankebʼ Jerusalén teʼxkʼul chi sahebʼ saʼ xchʼool li xinkʼam rehebʼ. 32 Joʼkan bʼiʼ, wi li Yos naraj, texwulaʼani chi sa linchʼool ut tqawaklesi qachʼool chiqibʼil qibʼ. 33 Aʼ taxaq li Yos li nakʼehok tuqtuukilal chiwanq eerikʼin. Joʼkan taxaq.