1 Corintios

7 Anaqwan ok we chi aatinak chirix li xeetzʼiibʼa chaq, us raj naq li winq inkʼaʼ twanq rikʼin ixq. 2 Abʼanan saʼ xkʼabʼaʼ naq yalaq bʼar nekeʼxyuʼami li muxuk ibʼ,* li junjunq chi winq chiwanq rixaqil ut li junjunq chi ixq chiwanq xbʼeelom. 3 Li bʼeelomej tento tixkʼe re li rixaqil li tenebʼanbʼil saʼ xbʼeen* ut joʼkan ajwiʼ tixbʼaanu li ixaqilbʼej rikʼin li xbʼeelom. 4 Li ixaqilbʼej moko aʼan ta nataqlank saʼ xbʼeen li xtibʼel, li bʼeelomej bʼan. Joʼkan ajwiʼ, li bʼeelomej moko aʼan ta nataqlank saʼ xbʼeen li xtibʼel, li ixaqilbʼej bʼan. 5 Meeram cheeribʼil eeribʼ li wank saʼ wiibʼal, abʼan naru nekeebʼaanu wi ak xeekʼe eeribʼ saʼ aatin naq inkʼaʼ texwanq saʼ wiibʼal chiru jarubʼaq kutan. Ut aʼin ttenqʼanq eere chi xkʼebʼal eehoonal re tijok. Chirix chik aʼan texwanq wiʼ chik saʼ wiibʼal re naq laj Tza inkʼaʼ teʼxraale chi xkʼatbʼal roq leesumʼaatin xbʼaan naq inkʼaʼ nekeekuy eeribʼ. 6 Abʼan ninye aʼin re naq teenaw li naru nekeebʼaanu, abʼan aʼin maawaʼ jun li taql. 7 Twulaq raj chiwu naq chixjunilebʼ li winq chanchanaqebʼ raj joʼ laaʼin. Abʼanan, li junjunq naxkʼul li xmaatan rikʼin li Yos ut moko junaqik ta li xmaatan li junjunq.

8 Li inkʼaʼ sumsukebʼ ut ebʼ li malkaʼan ninye rehebʼ naq qʼaxal us choʼq rehebʼ naq teʼkanaaq joʼ laaʼin. 9 Abʼan, wi inkʼaʼ nekeʼxkuy ribʼ, sumlaqebʼ. Xbʼaan naq us naq teʼsumlaaq chiru naq yooqebʼ xtiqwal.

10 Rehebʼ li sumsu ninkʼe li naʼlebʼ aʼin, naq li ixaqilbʼej inkʼaʼ tixkanabʼ li xbʼeelom. Abʼan moko laaʼin ta ninyeehok re, li Qaawaʼ bʼan nayeehok re. 11 Abʼan wi li ixaqilbʼej naxkanabʼ li xbʼeelom, inkʼaʼ chik tsumlaaq. Abʼan wi inkʼaʼ naraj kanaak xjunes, xkʼamaq wiʼ chik ribʼ saʼ usilal rikʼin li xbʼeelom. Ut li bʼeelomej inkʼaʼ tixkanabʼ li rixaqil.

12 Abʼan rehebʼ li junchʼol ninkʼe li naʼlebʼ aʼin naq, wi li rixaqil jun li qechpaabʼanel naxkʼul xchʼool kanaak rikʼin usta maawaʼ aj paabʼanel, mixkanabʼ li rixaqil. Abʼan laaʼin ninyeehok re, moko li Qaawaʼ ta nayeehok re. 13 Ut wi li xbʼeelom jun li ixq naxkʼul xchʼool kanaak rikʼin usta li bʼeelomej maawaʼ aj paabʼanel, mixkanabʼ li xbʼeelom. 14 Xbʼaan naq li bʼeelomej li maawaʼ aj paabʼanel ilbʼil joʼ saant saʼ xkʼabʼaʼ li rixaqil li wank choʼq aj paabʼanel. Ut li ixaqilbʼej li maawaʼ aj paabʼanel ilbʼil joʼ saant saʼ xkʼabʼaʼ li xbʼeelom li wank choʼq aj paabʼanel. Wi moko joʼkan ta raj, tzʼajebʼ raj li ralal xkʼajol abʼan anaqwan saqebʼ ru. 15 Abʼan, wi li xsumʼaatin laj paabʼanel winq malaj ixq naraj xik, xikaq. Li qechpaabʼanel aʼin moko minbʼil ta ru chi kanaak rikʼin li xsumʼaatin. Li Yos bʼan xbʼoqok eere re naq texwanq saʼ tuqtuukilal. 16 At ixaqilbʼej, chanru nakaanaw ma taakol malaj inkʼaʼ taakol laabʼeelom rikʼin xtenqʼankil re naq t-oq choʼq aj paabʼanel? Ut laaʼat bʼeelomej, chanru nakaanaw ma taakol malaj inkʼaʼ taakol laawixaqil rikʼin xtenqʼankil re naq t-oq choʼq aj paabʼanel?

17 Abʼanan, sahaq xchʼool li junjunq rikʼin li xwanjik li kikʼeheʼk re xbʼaan li Jehobʼa* joʼ chanru wank chaq naq kibʼoqeʼk xbʼaan li Yos. Aʼin li naʼlebʼ ninkʼe saʼ chixjunil li chʼuut. 18 Ma wank junaq li winq li ak setbʼil xtzʼuumal xtzʼejwal naq kibʼoqeʼk? Mixbʼaanu ribʼ naq maawaʼ aj judiiy.* Ma wank junaq li winq li inkʼaʼ setbʼil xtzʼuumal xtzʼejwal naq kibʼoqeʼk? Mixset xtzʼuumal xtzʼejwal. 19 Wi setbʼil malaj inkʼaʼ setbʼil xtzʼuumal xtzʼejwal junaq li qas qiitzʼin, moko aʼin ta wank xwankil. Li wank xwankil aʼan xpaabʼankil li xtaql li Yos. 20 Li junjunq mixkanabʼ wank joʼ chanru wank chaq naq kibʼoqeʼk. 21 Ma wankat chaq choʼq moos naq xatbʼoqeʼk? Matkʼoxlak chirix aʼin. Abʼan wi tatruuq chi elk chi moosil, maakol li maatan aʼin. 22 Xbʼaan naq li wank chaq choʼq moos naq kibʼoqeʼk xbʼaan li Qaawaʼ, anaqwan moko wank ta chik choʼq moos, re bʼan chik li Qaawaʼ. Joʼkan ajwiʼ, li moko wank ta chaq choʼq moos naq kibʼoqeʼk, anaqwan wank chik choʼq xmoos li Kriist. 23 Aʼan xexloqʼ ut terto kitojok cheerix; kanabʼomaq wank choʼq xmoos ebʼ li winq. 24 Ex wechpaabʼanel, li junjunq mixkanabʼ wank chiru li Yos joʼ chanru wank chaq naq kibʼoqeʼk.

25 Joʼkan bʼiʼ, maakʼaʼ junaq li taql li chalenaq rikʼin li Qaawaʼ li tinkʼe rehebʼ li maajunwa xeʼsumlaak, abʼan saʼ xkʼabʼaʼ naq li Qaawaʼ kiruxtaana wu* naru teʼxpaabʼ li waatin. 26 Joʼkan bʼiʼ, saʼ xkʼabʼaʼ ebʼ li chʼaʼajkilal li yook chi kʼulmank, ninkʼoxla naq qʼaxal us naq li winq tkanaaq joʼ chanru wank. 27 Wi sumsukat rikʼin junaq li ixq, maakʼoxla xkanabʼankil. Wi inkʼaʼ sumsukat rikʼin junaq li ixq, maasikʼ aawixaqil. 28 Abʼan, wi nakatsumlaak, moko maak ta wi nakaabʼaanu. Ut wi nasumlaak junaq li winq li maakʼaʼ rixaqil malaj junaq li ixq li maakʼaʼ xbʼeelom, moko maak ta wi naxbʼaanu. Abʼan ebʼ li teʼsumlaaq, teʼxtaw li chʼaʼajkilal saʼebʼ li xyuʼam. Joʼkan naq ninye eere aʼin re naq inkʼaʼ teekʼul.

29 Joʼkan ajwiʼ, ex wechpaabʼanel moko najt ta chik wanko. Chalen anaqwan, li wankebʼ rixaqil cheʼwanq chanchan tawiʼ maakʼaʼebʼ rixaqil; 30 li nekeʼyaabʼak chanchanaqebʼ li inkʼaʼ nekeʼyaabʼak; li sahebʼ saʼ xchʼool chanchanaqebʼ li inkʼaʼ sahebʼ saʼ xchʼool; li nekeʼloqʼok chanchanaqebʼ li maakʼaʼebʼ xloqʼom; 31 li nekeʼroksi li ruuchichʼochʼ chanchanaqebʼ li inkʼaʼ nekeʼroksi chi tzʼaqal re ru li ruuchichʼochʼ. Xbʼaan naq li yook chi kʼulmank saʼ ruuchichʼochʼ yook chi jalaak. 32 Laaʼin nawaj naq inkʼaʼ yooq eekʼaʼuxl. Li winq li inkʼaʼ sumsu naxik xchʼool chirix li xkʼanjel li Qaawaʼ xbʼaan naq naraj xsahobʼresinkil xchʼool li Qaawaʼ. 33 Abʼan li winq li sumsu naxik xchʼool chirix li naʼajmank rajlal kutan ut chirix chanru xsahobʼresinkil xchʼool li rixaqil 34 ut jachjo ru li xkʼaʼuxl. Joʼkan ajwiʼ, li ixq li inkʼaʼ sumsu joʼ ajwiʼ li ixq li inkʼaʼ xnawom ru winq, naxik xchʼool chirix li xkʼanjel li Qaawaʼ re naq santaq li xtibʼel ut li xkʼaʼuxl. Abʼanan, li sumsukil ixq naxik xchʼool chirix li naʼajmank rajlal kutan ut chirix chanru xsahobʼresinkil xchʼool li xbʼeelom. 35 Ninye eere aʼin re naq us texwanq. Inkʼaʼ ninye aʼin re eerambʼal, ninye bʼan, re naq texnaʼlebʼaq chiʼus ut texkʼanjelaq junelik chiru li Yos chi maakʼaʼ tlaatzʼanq eere.

36 Abʼan, wi junaq li qas qiitzʼin li maajiʼ nasumlaak narekʼa naq inkʼaʼ tixkuy li naxrahi ru li xtibʼel ut moko saaj ta chik, us raj naq tsumlaaq. Moko maak ta wi tixbʼaanu aʼin. 37 Abʼan wi junaq li qas qiitzʼin chʼolchʼo chiru naq moko aajel ta naq tsumlaaq ut narekʼa naq naxkuy li naxrahi ru li xtibʼel ut ak xkʼubʼ saʼ xchʼool naq inkʼaʼ tsumlaaq, chaabʼil li yook xkʼoxlankil. 38 Joʼkan naq us naxbʼaanu li nasumlaak, abʼan qʼaxal us wiʼ chik naxbʼaanu li inkʼaʼ nasumlaak.

39 Li sumsukil ixq junelik sumsuuq rikʼin li xbʼeelom naq yoʼyooq li xbʼeelom. Abʼan, wi nakamk li xbʼeelom, naru nasumlaak rikʼin li naraj, abʼan tento tsumlaaq rikʼin jun li winq li naxtaqe li Qaawaʼ. 40 Abʼan, laaʼin ninkʼoxla naq qʼaxal sahaq wiʼ chik saʼ xchʼool wi nakanaak joʼ chanru wank. Ut chʼolchʼo ajwiʼ chiwu naq wank wikʼin li xsantil musiqʼej li Yos.