2 Pedro
3 Laaʼex li raarokex inbʼaan, aʼin li xkabʼ esilhu li nintzʼiibʼa eere. Ut joʼ xintzʼiibʼa saʼ li xbʼeen esilhu, nawaj xjultikankil eere wiibʼ oxibʼ li naʼlebʼ li ttenqʼanq eere chi kʼoxlak chiʼus 2 re naq teejultika ebʼ li aatin li xeʼxye chaq rubʼelaj ebʼ li santil propeet ut li taql li kixkʼe chaq li Qaawaʼ, aj Kolonel, saʼ xkʼabʼaʼ leeʼapóstol. 3 Li tento teenaw aʼan aʼin: saʼ xraqik ebʼ li kutan, ebʼ li qas qiitzʼin teʼxseʼe li chaabʼil naʼlebʼ ut teʼxbʼaanu li inkʼaʼ us li nekeʼxrahi ru 4 ut teʼxye: «Aʼan kixye naq tchalq abʼan, bʼar wank? Xbʼaan naq chalen naq xeʼkamk ebʼ li qaxeʼtoon, juntaqʼeet wank chixjunil chalen naq li Yos kixyobʼtesihebʼ li qas qiitzʼin».
5 Ebʼ aʼan yal inkʼaʼ nekeʼraj xkʼebʼal reetal naq li choxa ak wank chaq junxil ut naq saʼ xkʼabʼaʼ li raatin li Yos, li ruuchichʼochʼ kiʼisiik saʼ xyi li haʼ ut saʼ xyanq li haʼ. 6 Aʼin kixbʼaanu naq ebʼ li qas qiitzʼin li xeʼwank chiruhebʼ li kutan aʼan, teʼosoʼq. Ut kikʼulmank aʼin naq kinujak chi haʼ chixjunil li ruuchichʼochʼ. 7 Abʼan saʼ xkʼabʼaʼ li raatin li Yos, li choxa ut li ruuchichʼochʼ li wankebʼ anaqwan kʼulanbʼilebʼ choʼq re li xaml ut wanqebʼ aran toj reetal twulaq xkutankil naq traqmanq aatin saʼ xbʼeenebʼ li inkʼaʼ nekeʼroxloqʼi li Yos ut teʼosoʼq.
8 Abʼanan, laaʼex li raarokex inbʼaan, misach saʼ leechʼool li naʼlebʼ aʼin: chiru li Jehobʼa* jun kutan chanchan jun mil chihabʼ ut jun mil chihabʼ chanchan jun kutan. 9 Li Jehobʼa* inkʼaʼ nabʼayk chi xbʼaanunkil li naxyeechiʼi joʼ nekeʼxkʼoxla wiibʼ oxibʼ li qas qiitzʼin. Nim bʼan xkuyum eerikʼin xbʼaan naq naraj naq chixjunilebʼ teʼkoleʼq, teʼxyotʼ xchʼool ut teʼxjal xnaʼlebʼ. 10 Abʼanan, li xkutankil li Jehobʼa* tchalq joʼ jun laj elqʼ. Saʼ li kutan aʼan li choxa t-osoʼq ut qʼaxal kaw t-ekʼanq. Ut saʼ xkʼabʼaʼ naq chixjunil li wank saʼ choxa ut saʼ ruuchichʼochʼ qʼaxal tiqaq, aʼin tixbʼaanu naq teʼhaʼoq. Li ruuchichʼochʼ ut li wank chisaʼ tkanaaq chi kutankil xbʼaan li xaml.
11 Saʼ xkʼabʼaʼ naq chixjunil aʼin thaʼoʼq chi joʼkaʼin, tento teekʼoxla chanru yookex chi naʼlebʼak ut li tento raj teebʼaanu. Tento naq santaqex ut rikʼin leebʼaanuhom teekʼutbʼesi naq nekeeloqʼoni li Yos. 12 Ut chiwanq saʼ leekʼaʼuxl li xkutankil li Jehobʼa* li yookex roybʼeninkil xbʼaan naq saʼ li kutan aʼin t-osoʼq li choxa rikʼin xaml. Ut saʼ xkʼabʼaʼ naq chixjunil li wank saʼ choxa ut saʼ ruuchichʼochʼ qʼaxal tiqaq, aʼin tixbʼaanu naq teʼhaʼoq. 13 Laaʼo yooko roybʼeninkil jun akʼ choxa ut jun akʼ ruuchichʼochʼ joʼ chanru kixyeechiʼi li Yos. Ut aran twanq li tiikilal.
14 Joʼkan bʼiʼ, laaʼex li raarokex inbʼaan, saʼ xkʼabʼaʼ naq yookex roybʼeninkil chixjunil aʼin, bʼaanumaq chixjunil li wank saʼ eeruqʼ re naq li Yos textaw chi maakʼaʼ eetzʼajnil, eepaltil ut wanqex saʼ amiiwil rikʼin. 15 Joʼkan ajwiʼ, kʼoxlamaq naq li xkuyum li Qaawaʼ aʼan leekolbʼal. Laj Pablo, li qechpaabʼanel li raaro qabʼaan, kixtzʼiibʼa ajwiʼ eere aʼin rikʼin li naʼlebʼ li kixkʼul rikʼin li Yos. 16 Aʼan kiʼaatinak chirix aʼin saʼ chixjunil li esilhu li kixtzʼiibʼa. Abʼanan, saʼebʼ li esilhu wank li naʼlebʼ li chʼaʼaj xtawbʼal ru chiruhebʼ li inkʼaʼ nekeʼxtaw ru chiʼus.* Ut li moko kawebʼ ta xpaabʼal nekeʼxjalpaqʼi ru xbʼaan naq inkʼaʼ nekeʼxtaw ru joʼ nekeʼxbʼaanu rikʼin li junchʼol chi hu li wank saʼ li Raatin li Yos. Ut saʼ xkʼabʼaʼ aʼin, nekeʼxkʼam chaq li sachok saʼ xbʼeenebʼ.
17 Joʼkan bʼiʼ, laaʼex li raarokex inbʼaan, saʼ xkʼabʼaʼ naq ak nekeenaw aʼin rubʼelaj, junelik ajʼooq eeru re naq inkʼaʼ tjalmanq eebʼe joʼ xeʼxkʼul aʼanebʼ xbʼaanebʼ li xkʼutum li maaʼusebʼ xnaʼlebʼ* ut aʼin tixbʼaanu naq inkʼaʼ chik kawaqex. 18 Meekanabʼ bʼan kʼiik saʼ li xnawom ut saʼ li xnimal rusilal li Qaawaʼ Jesukriist, aj Kolonel. Aʼan taxaq tkʼeheʼq xloqʼal anaqwan ut chi junelik. Joʼkan taxaq.