Hebreos
6 Anaqwan naq ak xqakanabʼ chiʼixbʼej ebʼ li xbʼeen naʼlebʼ li xqatzol chirix li Kriist, miqakanabʼ kʼiik saʼ li qapaabʼal ut re xbʼaanunkil aʼin moko tooʼoq ta wiʼ chik xtzolbʼal li xbʼeen naʼlebʼ, aʼin naraj xyeebʼal naq teʼxkʼut wiʼ chik chiqu naq tento tqayotʼ qachʼool ut tqajal qanaʼlebʼ, naq tqakanabʼ xbʼaanunkil li maakʼaʼ naʼok wiʼ ut naq wanq qapaabʼal chirix li Yos, 2 ebʼ li naʼlebʼ chirix li kubʼihaʼ, xkʼebʼal li uqʼej saʼ xbʼeen junaq li qas qiitzʼin, li wakliik chi yoʼyo ut li raqok aatin li twanq chi junelik. 3 Wi li Yos naraj, aʼin li tqabʼaanu.
4 Wankebʼ xeʼkutanobʼresiik, xeʼxyal li maatan li nachalk saʼ choxa, xeʼxkʼul li santil musiqʼej 5 ut xeʼxyal xchaabʼilal li raatin li Yos ut li xwankil ebʼ li kutan* li yook chi chalk, 6 abʼan xeʼxkanabʼ paabʼank ut inkʼaʼ chik naruhank xtenqʼankilebʼ re naq teʼxyotʼ xchʼool ut teʼxjal xnaʼlebʼ xbʼaan naq xeʼxklawxi wiʼ chik li Ralal li Yos chiru cheʼ ut nekeʼxkʼe chi kutankil re xkʼebʼal saʼ xutaan chiruhebʼ li qas qiitzʼin. 7 Li Yos narosobʼtesi li chʼochʼ naq natʼaneʼk li habʼ chi rajlal xbʼaan naq naxtʼaqresi li chʼochʼ re naq tkʼiiq li awimq ut teʼxtaw rusilal li nekeʼkʼanjelank re. 8 Abʼan wi namoq chaq li cheʼ kʼix ru, maakʼaʼ t-oq wiʼ ut ttzʼeqtaanaaq saʼ junpaat ut chirix chik aʼan tkʼatmanq.
9 Abʼan, ex wechpaabʼanel, li raarokex qabʼaan, usta joʼkan nokooʼaatinak, chʼolchʼo chiqu naq teekʼul eerosobʼtesinkil ut yookex xbʼaanunkil li us re naq li Yos texkol. 10 Xbʼaan naq oxloqʼ chiru li Yos li nekeebʼaanu ut inkʼaʼ nasach saʼ xchʼool leekʼanjel chi moko nasach ta saʼ xchʼool leerahom li xeekʼutbʼesi chirix li xkʼabʼaʼ naq xeetenqʼahebʼ li santil paabʼanel ut toj yookex xbʼaanunkil. 11 Abʼan naqaj naq li junjunq saʼ eeyanq seebʼaq chi xbʼaanunkil aʼin joʼ nekeebʼaanu chaq saʼ xtiklajik re naq chʼolchʼooq cheeru naq ttzʼaqloq ru saʼ xraqik li yookex roybʼeninkil 12 ut chi joʼkan inkʼaʼ texqʼemoʼq, teekʼam bʼan eere rikʼinebʼ li teʼrechani li yeechiʼom saʼ xkʼabʼaʼebʼ li xpaabʼal ut ebʼ li xkuyum.
13 Li Yos kixpatzʼ li xkʼabʼaʼ naq kixbʼaanu li yeechiʼom re laj Abrahán xbʼaan naq inkʼaʼ naru naxpatzʼ xkʼabʼaʼ jalan chik xbʼaan naq maakʼaʼ junaq chik li qʼaxal nim xwankil chiru aʼan. 14 Kixye re: «Relik chi yaal naq tatwosobʼtesi ut relik chi yaal naq qʼaxal tatkʼihanq». 15 Joʼkan bʼiʼ, naq ak xkʼutbʼesi laj Abrahán naq wank xkuyum, kixkʼul li yeechiʼom aʼin. 16 Naq jun li qas qiitzʼin naxye naq tixbʼaanu junaq li naʼlebʼ, naxpatzʼ xkʼabʼaʼ jun li cheek chiru re naq inkʼaʼ twanq li chʼaʼajkilal xbʼaan naq li kixye naxkʼutbʼesi naq yaal. 17 Joʼkan ajwiʼ, naq li Yos kiraj xkʼutbʼal chi kutankil rehebʼ li teʼechaninq re li yeechiʼom naq inkʼaʼ najalaak li rajom,* kixkʼe li raatin re xkʼutbʼesinkil naq yaal aʼin 18 re naq saʼ xkʼabʼaʼ li xyeechiʼom ut li raatin, laaʼo li nokooxik rikʼin li Yos re naq maakʼaʼ tqakʼul, tooruuq xtawbʼal qametzʼew re xchapbʼal qibʼ chi kaw rikʼin li qoybʼenihom. Li wiibʼ chi naʼlebʼ aʼin maajunwa najalaak ut li Yos inkʼaʼ natikʼtiʼik. 19 Li oybʼenihom aʼin chʼolchʼo naq ttzʼaqloq ru ut xaqxo chi kaw chanchan jun li ankla choʼq re li qayuʼam ut nokooxkʼam saʼ li naʼaj li wank junpakʼal li kortiin.* 20 Li Jesús kiʼok aran xbʼeenwa chiqu laaʼo re xteebʼal ut xkawresinkil qabʼe ut ak wank choʼq xyuwaʼil aj tij joʼ laj Melquisedec ut junelik twanq choʼq aj tij.