1 Corintios
4 Chixjunilebʼ tento raj tooʼeʼril joʼ aj tenqʼahom re li Kriist ut joʼ aj ilol re li muqmukil naʼlebʼ li nachalk rikʼin li Yos. 2 Ut naʼoybʼenimank naq ebʼ laj kʼanjel teʼxchʼolani chiʼus li xeʼxaqabʼaak chi rilbʼal. 3 Maakʼaʼ nawaj re ma laaʼex malaj junaq li raqlebʼaal aatin traqoq aatin saʼ inbʼeen. Chi moko laaʼin ninraqok aatin saʼ inbʼeen. 4 Xbʼaan naq linchʼool* inkʼaʼ nikinxqʼabʼa chi bʼaanunkil li inkʼaʼ us, abʼan aʼin moko naxkʼutbʼesi ta naq tiik linchʼool. Li Jehobʼa* bʼan naraqok aatin saʼ inbʼeen. 5 Joʼkan naq mexraqok aatin saʼ xbʼeenebʼ li junchʼol naq toj maajiʼ xqʼehil. Naq tkʼulunq li Qaawaʼ aʼan trisi chi kutankil li muqmu saʼ qʼoqyink ut aʼan tixkʼe chi naweʼk li wank saʼ xchʼool li junjunq chi qas qiitzʼin. Chirix chik aʼan, li junjunq tnimaaq ru xbʼaan li Yos joʼ chanru xkʼulubʼ.
6 Ex wechpaabʼanel xinye chixjunil aʼin chiwix ut chirix laj Apolos re naq teetaw ru aʼin. Saʼ xkʼabʼaʼ naq xqakʼe qibʼ choʼq eetalil, laaʼex teetzol raj li naʼlebʼ aʼin: «Teebʼaanu kaʼajwiʼ li tzʼiibʼanbʼil». Ut chi joʼkan inkʼaʼ tnumtaaq leeqʼetqʼetil ut jun teeroxloqʼi ut li jun chik teetzʼeqtaana. 7 Joʼkan ajwiʼ, ani naxbʼaanu naq jalanaqat chiruhebʼ li junchʼol? Ma inkʼaʼ tabʼiʼ yal xkʼemank aawe chixjunil li xaakʼul? Ut wi xaakʼul, kʼaʼut nakaanima aawibʼ chanchan tawiʼ inkʼaʼ xaakʼul?
8 Ma ak xkʼojlaak eechʼool? Ma ak xexbʼihomoʼk? Ma ak xexʼok chi awabʼejink ut inkʼaʼ xooʼeeroybʼeni? Us raj naq ak xexʼok chi awabʼejink re naq laaʼo ajwiʼ tooʼoq chi awabʼejink eerochbʼeen. 9 Xbʼaan naq chanchan tawiʼ xooʼeʼxkʼam saʼ jun li naʼaj re naq tookʼutbʼesiiq chiru li ruuchichʼochʼ, chiruhebʼ li qas qiitzʼin ut chiruhebʼ li ánjel. Ut li Yos kixkanabʼ naq tookʼutbʼesiiq toj saʼ xraqik, joʼebʼ li winq li tenebʼanbʼil kamk saʼ xbʼeenebʼ. 10 Ilbʼilo naq maakʼaʼ qanaʼlebʼ saʼ xkʼabʼaʼ li Kriist, abʼan laaʼex nekeekʼoxla naq wank eenaʼlebʼ saʼ xkʼabʼaʼ li Kriist. Laaʼo ilbʼilo naq maakʼaʼ qametzʼew, abʼan laaʼex chanchan tawiʼ wank eemetzʼew. Laaʼex nekexʼoxloqʼiik, abʼan laaʼo inkʼaʼ nokooʼoxloqʼiik. 11 Junxil nokooʼok xkuybʼal qasaʼ ut tchaqiq qe, moko kʼi ta qatʼikr,* sakʼbʼilo ut maakʼaʼ qochoch 12 ut kaw nokookʼanjelak rikʼin quqʼ. Naq nokooʼeʼxhobʼ, nokoosumenk saʼ tuulanil; naq xikʼ nokooʼeʼril, nokookuyuk 13 naq nekeʼxyoobʼ aatin chiqix nokoosumenk saʼ qʼunil aatin.* Chalen junxil, ebʼ li qas qiitzʼin nokooʼeʼril joʼ xmul li ruuchichʼochʼ li natzʼeqmank chi junajwa.
14 Inkʼaʼ yookin xtzʼiibʼankil aʼin re eekʼebʼal saʼ xutaan, re xkʼebʼal bʼan eenaʼlebʼ joʼ walal inkʼajol, li raarokex inbʼaan. 15 Usta wanq lajeebʼ mil aj kʼutul eere saʼ xkʼabʼaʼ li Kriist, moko naabʼalebʼ ta leeyuwaʼ xbʼaan naq saʼ xkʼabʼaʼ li Kristo Jesús xinkanaak choʼq eeyuwaʼ xbʼaan li chaabʼil esil. 16 Joʼkan bʼiʼ, nintzʼaama naq cheekʼam eere wikʼin. 17 Joʼkan naq nintaqla eerikʼin laj Timoteo, li nawil joʼ walal li raaro inbʼaan, ut nakʼanjelak chiru li Qaawaʼ chi anchal xchʼool. Aʼan tixjultika eere li jalan jalanq chi naʼlebʼ li nawoksi re xtaqenkil li Kristo Jesús. Ut tixjultika cheeru li ninkʼut yalaq bʼar saʼ li jalan jalanq chi chʼuut.
18 Wankebʼ numtajenaq wiʼ chik xqʼetqʼetilebʼ, chanchan tawiʼ inkʼaʼ tinxik rilbʼalebʼ. 19 Abʼan, wi li Jehobʼa* naraj, chi seebʼ tinwulaq eerulaʼaninkil ut inkʼaʼ tinkʼe inchʼool chi xnawbʼal li nekeʼxye li qʼaxal qʼetqʼetebʼ, tinkʼe bʼan inchʼool chi xnawbʼal ma yookebʼ chi bʼeresiik xbʼaan xwankil li Yos malaj inkʼaʼ. 20 Xbʼaan naq li Xʼawabʼejilal li Yos inkʼaʼ nakʼutunk rikʼin aatin, nakʼutunk bʼan rikʼin xwankil li Yos. 21 Kʼaru nekeeraj? Ma nekeeraj naq tinwulaq eerikʼin re eerahobʼtesinkil* malaj nekeeraj naq tinwulaq rikʼin rahok ut tuulanil?