Marcos

12 Tojaʼ naq kiʼok raatinankilebʼ rikʼin eetalil.* Kixye rehebʼ: «Jun li winq kiraw li uubʼ saʼ li xchʼochʼ ut kixkorali. Kixbʼek ajwiʼ aran jun li yatzʼlebʼaal uubʼ, ut kixyiibʼ jun li ochoch li najt xteram. Chirix chik aʼan kixkʼe chi toʼ li chʼochʼ bʼarwiʼ awbʼil li uubʼ re wiibʼ oxibʼ laj kʼanjel ut xkoho chi najt. 2 Naq kiwulak xqʼehil, kixtaqla jun li moos rikʼinebʼ laj kʼanjel re xkʼulbʼal ru li uubʼ li ttzʼaq. 3 Abʼan ebʼ laj kʼanjel xeʼxchap li moos, xeʼxteni ut xeʼxsutqʼisi chi maakʼaʼ xeʼxkʼe re. 4 Ut laj echal chʼochʼ kixtaqla rikʼinebʼ jun chik li moos ut ebʼ laj kʼanjel xeʼxteni saʼ xjolom ut xeʼxkubʼsi xwankil. 5 Chirix chik aʼan kixtaqla jun chik ut xeʼxkamsi. Ut kixtaqla naabʼal chik li moos; wankebʼ xeʼteniik ut wankebʼ ajwiʼ xeʼkamsiik. 6 Abʼan toj wank jun chik li toj maajiʼ naxtaqla: li ralal li qʼaxal raaro xbʼaan. Joʼkan naq kixtaqla li ralal aʼin xbʼaan naq kixye saʼ xchʼool: “Li walal teʼroxloqʼi”. 7 Abʼan, ebʼ laj kʼanjel xeʼxye chiribʼilebʼ ribʼ: “Aʼin laj echal re li ereens. Yoʼqebʼ, qakamsihaq, ut chi joʼkan tookanaaq rikʼin li xʼereens”. 8 Joʼkan naq, xeʼxchap, xeʼxkamsi ut xeʼrisi saʼ li chʼochʼ aʼin. 9 Kʼaru tixbʼaanu laj echal chʼochʼ? Naq tchalq, tixkamsi ebʼ laj kʼanjel aʼin ut re jalanebʼ chik tixkʼe li chʼochʼ li awbʼil wiʼ li uubʼ. 10 Ma inkʼaʼ bʼiʼ eerilom li xraqal li Raatin li Yos li naxye: “Li pek li xeʼxtzʼeqtaana ebʼ laj kabʼlanel, aʼan li kikanaak choʼq xnimal ru pek li naxik saʼ xxuk ut nakʼemank taqeʼq”? 11 Ut ma inkʼaʼ eerilom: “Li pek aʼin chalenaq rikʼin li Jehobʼa* ut choʼq qe kʼajoʼ xchʼinaʼusil”?».

12 Ebʼ li xikʼ nekeʼilok re xeʼraj xchapbʼal li Jesús xbʼaan naq xeʼxkʼe reetal naq li eetalil* li kiroksi yook chi aatinak chirixebʼ. Abʼan nekeʼxxuwa ru li kʼiila tenamit, joʼkan naq xeʼxkanabʼ ut xkohebʼ.

13 Tojaʼ naq xeʼxtaqla wiibʼ oxibʼ laj pariseey ut li nekeʼokenk chirix laj Herodes bʼarwiʼ wank li Jesús re naq teʼruuq xqʼabʼankil naq tpaltoʼq saʼ li raatin. 14 Naq xeʼwulak xeʼxye re: «At Kʼutunel, naqanaw naq junelik nakaaye li yaal ut inkʼaʼ nakaasikʼ naq ebʼ li junchʼol teʼkʼulubʼanq aawe xbʼaan naq inkʼaʼ nakaakʼe aachʼool chirixebʼ li rilobʼaal li qas qiitzʼin, nakaakʼut bʼan xbʼe li Yos rikʼin li yaal. Ma us naq tqakʼe li toj* li nachʼutubʼamank choʼq re li awabʼej re Roma,* malaj inkʼaʼ? 15 Ma tento tqatoj, malaj inkʼaʼ?». Abʼan li Jesús kixkʼe reetal naq bʼalaqʼik yookebʼ joʼkan naq kixsumehebʼ: «Kʼaʼut nekeeyal wix? Kʼamomaq chaq we jun li denario* re naq twil». 16 Joʼkan naq xeʼxkʼam chaq re ut aʼan kixpatzʼ rehebʼ: «Ani aj jalam u aʼin ut ani aj kʼabʼaʼ tzʼiibʼanbʼil chiru?». «Re li awabʼej re Roma»,* chankebʼ re. 17 Tojaʼ naq li Jesús kixye rehebʼ: «Tojomaq re li awabʼej li re li awabʼej, aʼut re li Yos li re li Yos». Ut sachsokebʼ xchʼool xeʼkanaak xbʼaan.

18 Tojaʼ naq xeʼchalk ebʼ laj saduseey li nekeʼxye naq maakʼaʼ li wakliik chi yoʼyo, ut xeʼxpatzʼ re: 19 «At Kʼutunel, laj Moisés kixkanabʼ qe chi tzʼiibʼanbʼil naq wi nakamk junaq li winq chi maakʼaʼ ralal xkʼajol, li riitzʼin* tento tsumlaaq rikʼin li malkaʼan re naq twanq ralal xkʼajol li ras.* 20 Saʼ qayanq kiwank wuqubʼ li winq riitzʼinebʼ ribʼ.* Li xbʼeen kisumlaak, ut kikamk abʼan inkʼaʼ kiwank ralal xkʼajol. 21 Ut li xkabʼ kisumlaak rikʼin li malkaʼan ut kikamk, abʼan moko kiwank ta ajwiʼ xkokʼal; ut joʼkan ajwiʼ kixkʼul li rox. 22 Maajun rehebʼ li wuqubʼ kiwank xkokʼal. Naq ak kamenaqebʼ chik li wuqubʼ chi winq, kikamk ajwiʼ li ixq. 23 Naq twanq li wakliik chi yoʼyo, ani rehebʼ li wuqubʼ tkanaaq choʼq xbʼeelom? Xbʼaan naq li wuqubʼ xeʼsumlaak rikʼin». 24 Li Jesús kixye rehebʼ: «Ma inkʼaʼ tabʼiʼ saʼ xkʼabʼaʼ aʼin naq sachso leekʼaʼuxl xbʼaan naq inkʼaʼ nekeenaw li naxye li Raatin li Yos chi moko nekeetaw ru li xwankil li Yos? 25 Xbʼaan naq saʼ li wakliik chi yoʼyo, ebʼ li winq inkʼaʼ nekeʼsumlaak chi moko ebʼ li ixq kʼebʼilebʼ chi sumlaak, chanchanebʼ bʼan li ánjel saʼ choxa. 26 Ma inkʼaʼ xeeril saʼ li xhu laj Moisés naq li Yos kiraatina saʼ li cheʼ li kachʼin xteram? Aran li Yos yook chi aatinak chirixebʼ li kamenaq li teʼwakliiq chi yoʼyo naq kixye re laj Moisés: “Laaʼin li Xyos laj Abrahán, li Xyos laj Isaac ut li Xyos laj Jacob”. 27 Aʼan maawaʼ Xyosebʼ li kamenaq, Xyos bʼan li yoʼyokebʼ. Laaʼex, qʼaxal sachso eekʼaʼuxl».

28 Jun rehebʼ laj tzʼiibʼ li wank saʼ xyanqebʼ, kirabʼi li yookebʼ xyeebʼal. Naq kiril naq li Jesús kisumenk chiʼus, kixpatzʼ re: «Bʼar wank li xbʼeen taql saʼ xyanq chixjunil li Chaqʼrabʼ?». 29 Li Jesús kixye: «Li xbʼeen aʼan aʼin: “Abʼi, at Israel. Li Jehobʼa* li Qayos, jun ajwiʼ chi Jehobʼa.* 30 Taara li Jehobʼa* Laayos chi anchal laachʼool, chi anchal laayuʼam, chi anchal laakʼaʼuxl ut chi anchal laametzʼew”. 31 Li xkabʼ aʼan aʼin: “Taara laawas aawiitzʼin joʼ naq nakaara aawibʼ”. Maakʼaʼ junaq chik li taql li qʼaxal wank xwankil chiru li wiibʼ aʼin». 32 Laj tzʼiibʼ kixye re: «Xatsumenk chiʼus, at Kʼutunel, xaaye li yaal: “Li Yos jun ajwiʼ, ut chirix aʼan maakʼaʼ chik junaq”. 33 Ut naq li qas qiitzʼin tixra li Yos chi anchal xchʼool, chi anchal xkʼaʼuxl, chi anchal xmetzʼew, ut tixra li ras riitzʼin joʼ naxra ribʼ, aʼin qʼaxal wank xwankil chiru li jalan jalanq chi kʼatbʼil mayej ut ebʼ li mayejanbʼil xul». 34 Naq li Jesús kixkʼe reetal naq chaabʼil kisumenk, kixye re: «Kachʼin chik nakaawaj re naq tat-oq saʼ li Xʼawabʼejilal li Yos». Maaʼani chik kiraj xbʼaanunkil re junaq chik li patzʼom.

35 Abʼanan, saʼ xkʼabʼaʼ naq li Jesús toj yook chi kʼutuk saʼ rochoch li Yos, kixpatzʼ: «Chanru naq ebʼ laj tzʼiibʼ nekeʼxye naq li Kriist aʼan li ralal laj David? 36 Saʼ xkʼabʼaʼ naq bʼeresinbʼil laj David rikʼin santil musiqʼej, kixye: “Li Jehobʼa* kixye re Linqaawaʼ: «Kʼojlan saʼ linnim uqʼ toj reetal naq tinkʼe rubʼel laawoq ebʼ li xikʼ nekeʼilok aawe»”. 37 Wi laj David naxkʼabʼaʼi Qaawaʼ; chanru naq ralalaq?».

Ut li kʼiila tenamit naʼabʼink re chi sa saʼ xchʼool. 38 Naq yook chaq xtzolbʼalebʼ, kixye rehebʼ: «Weent teebʼaanu rikʼinebʼ laj tzʼiibʼ li nekeʼwulak chiru xbʼeninkil ribʼ rikʼinebʼ li xjut-aqʼ ut naq teʼkʼeheʼq xsahilebʼ xchʼool saʼebʼ li kʼayil, 39 ut saʼebʼ li naʼaj re loqʼonink nekeʼchunlaak toj chiru, ut naq nawank jun li nimla waʼak nekeʼwulak chiru chunlaak saʼebʼ li naʼaj li wankebʼ xwankil. 40 Nekeʼxmaqʼ xjunkabʼlal* ebʼ li malkaʼan ut najt roq ebʼ li xtij nekeʼxbʼaanu yal re naq teʼileʼq. Qʼaxal ra wiʼ chik teʼxkʼul naq traqmanq aatin saʼ xbʼeenebʼ».

41 Ut li Jesús kichunlaak saʼ jun li naʼaj bʼarwiʼ truuq rilbʼal li xkaaxil li tumin. Kiril naq ebʼ li qas qiitzʼin yookebʼ chi xkʼebʼal ebʼ li tumin saʼ xkaaxil li tumin; naabʼalebʼ li bʼihom nekeʼxkʼe naabʼal li tumin chisaʼ. 42 Tojaʼ naq kichalk jun li malkaʼan nebʼaʼ ut kixkʼe wiibʼ sentaaw* saʼ li kaax. 43 Li Jesús kixbʼoq ebʼ li xtzolom ut kixye rehebʼ: «Relik chi yaal ninye eere naq li malkaʼan aʼin qʼaxal naabʼal wiʼ chik kixkʼe saʼ xkaaxil li tumin chiruhebʼ li junchʼol. 44 Xbʼaan naq nekeʼxkʼe li naʼelaʼank* chiruhebʼ; abʼan li malkaʼan qʼaxal nebʼaʼ, kixkʼe chixjunil li wank rikʼin».