Romanos
9 Joʼ aj taqehom re li Kriist, ninye li yaal. Inkʼaʼ nintikʼtiʼik. Linchʼool* li bʼeresinbʼil xbʼaan li santil musiqʼej naxkʼe resil aʼin. 2 Qʼaxal yook inkʼaʼuxl ut junelik ra linchʼool. 3 Laaʼin tinkʼul raj li rahilal li tenebʼanbʼil saʼ xbʼeenebʼ laj judiiy, ebʼ li wiitzʼin li inkʼaʼ nekeʼxtaqe li Kriist, wi aʼin tixtenqʼahebʼ. 4 Aʼanebʼ aj Israel li kʼulbʼilebʼ xbʼaan li Yos joʼ tzʼaqal ralal xkʼajol. Li Yos kixkʼut chiruhebʼ li xloqʼal, kixkʼe ribʼ saʼ aatin rikʼinebʼ ut kixkʼe rehebʼ li Chaqʼrabʼ. Kixkanabʼebʼ naq teʼxloqʼoni ru ut kixkʼehebʼ chixnaw li xyeechiʼom. 5 Aʼanebʼ ralal xkʼajol ebʼ li qaxeʼtoon ut rikʼinebʼ aʼan chalenaq li Kriist. Chinimaaq taxaq chi junelik li Yos li naxjolomi chixjunil. Joʼkan taxaq.
6 Abʼanan, aʼin moko naraj ta xyeebʼal naq li raatin li Yos inkʼaʼ kitzʼaqlok ru. Xbʼaan naq moko chixjunilebʼ ta li ralal xkʼajol laj Israel tzʼaqalebʼ «aj Israel». 7 Chi moko chixjunilebʼ ta tzʼaqal ralal xkʼajol yal saʼ xkʼabʼaʼ naq chalenaqebʼ rikʼin laj Abrahán, kikʼulmank bʼan joʼ tzʼiibʼanbʼil: «Saʼ xkʼabʼaʼ laj Isaac tchalq li tkʼabʼaʼiiq choʼq aawalal aakʼajol». 8 Aʼin naraj xyeebʼal naq moko chixjunilebʼ ta li ralal xkʼajol laj Abrahán moko tzʼaqal ta ralal xkʼajol li Yos. Li xeʼyoʼlaak bʼan saʼ xkʼabʼaʼ li yeechiʼom aʼanebʼ li tzʼaqal ralal xkʼajol laj Abrahán. 9 Xbʼaan naq aʼin kixye chaq li Yos: «Saʼ jun chihabʼ, chiruhebʼ li kutan aʼin, tinkʼulunq ut li xSara twanq jun xyum». 10 Ut kiyeemank ajwiʼ aʼin naq li xRebeca kiwank xlut naq kikanaak saʼ yuʼam xbʼaan laj Isaac li qaxeʼtoon. 11 Naq toj maajiʼ nekeʼyoʼlaak ebʼ li kʼuulaʼal aʼin, maajiʼ nekeʼxbʼaanu li us chi moko li inkʼaʼ us, abʼan li Yos ak kixye chi rubʼelaj ani rehebʼ kixsikʼ ru. Li Yos naxsikʼ ru li ani naraj ut inkʼaʼ naxsikʼ ru saʼ xkʼabʼaʼ li xbʼaanuhom. 12 Joʼkan naq kiyeemank re li naʼbʼej: «Li asbʼej tkanaaq choʼq xmoos li iitzʼinbʼej». 13 Joʼ tzʼiibʼanbʼil: «Xinra laj Jacob ut xintzʼeqtaana laj Esaú».
14 Kʼaru naru naqaye chi joʼkanan? Ma inkʼaʼ tiik xchʼool li Yos? Maajoqʼe bʼiʼan! 15 Xbʼaan naq kixye re laj Moisés: «Laaʼin twuxtaana ru* li nawaj ruxtaanankil ru* ut tintoqʼobʼa ru* li nawaj xtoqʼobʼankil ru».* 16 Aʼin inkʼaʼ natawmank rikʼin li naraj li winq chi moko rikʼin xkʼebʼal xchʼool,* natawmank bʼan xbʼaan naq li Yos naʼuxtaanank u.* 17 Xbʼaan naq jun li raqal li Raatin li Yos naxye re laj faraón: «Xatinkanabʼ chi yoʼyo saʼ xkʼabʼaʼ aʼin: re naq rikʼin laanaʼlebʼ tinkʼutbʼesi linwankil ut re naq tkʼemanq chi naweʼk linkʼabʼaʼ saʼ chixjunil li ruuchichʼochʼ». 18 Joʼkan bʼiʼ, li Yos naruxtaana ru* li qas qiitzʼin li naraj ruxtaanankil ru* abʼan wi junaq li qas qiitzʼin naraj xkawresinkil xjolom naxkanabʼ naq tkawuuq xjolom.
19 Wankebʼ teʼxpatzʼ we: «Kʼaʼut nokooʼaaqʼabʼa? Ma naru tabʼiʼ junaq li qas qiitzʼin xqʼetbʼal ribʼ chiru li ak xaqabʼanbʼil xbʼaan li Yos?». 20 Abʼan, kʼaru aawankil naq nakaasume chi joʼkan li Yos? Ma naru naxye li chʼina pakʼbʼil sekʼ re laj pakʼol re «Kʼaʼut xinaayiibʼ chi joʼkaʼin?»? 21 Ma maakʼaʼ tawiʼ xwankil laj pakʼonel re xyoqʼbʼal jun chi sebʼ re xyiibʼankil wiibʼ li sekʼ, jun choʼq re li ninqʼe ut li jun chik re yalaq joqʼe? 22 Usta li Yos kiraj xkʼutbʼesinkil li xjosqʼil ut li xwankil saʼ xbʼeenebʼ li maaʼusebʼ xnaʼlebʼ, nim xkuyum saʼ xbʼeenebʼ. Ebʼ li qas qiitzʼin aʼin chanchanebʼ li pakʼbʼil sekʼ li teʼosoʼq ut xkʼulubʼebʼ naq teʼxtoj xmaak. 23 Ut kixbʼaanu aʼin re xkʼebʼal chi naweʼk li xloqʼal rehebʼ li qas qiitzʼin li xkʼulubʼebʼ naq teʼuxtaanaaq* xbʼaan. Ebʼ li qas qiitzʼin aʼin chanchanebʼ li pakʼbʼil sekʼ li kixkawresihebʼ chi rubʼelaj re xkʼulbʼal xloqʼal. 24 Laaʼo ebʼ li qas qiitzʼin aʼin li bʼoqbʼilo saʼ xyanqebʼ laj judiiy ut saʼ xyanqebʼ li junchʼol chi tenamit. 25 Aʼin chanchan ajwiʼ li kixye saʼ Oseas: «Li maawaʼ intenamit tinye naq intenamit ut li ixq li inkʼaʼ ninra tinye naq ninra. 26 Ut saʼ li naʼaj bʼarwiʼ xyeemank eere “Laaʼex maawaʼex intenamit” aran tyeemanq naq laaʼex ralal xkʼajol li yoʼyokil Yos».
27 Joʼkan ajwiʼ, laj Isaías kixye aʼin chirix li tenamit Israel: «Usta li xkʼihalil li ralal xkʼajol li tenamit Israel chanchanaq xsamahibʼ li palaw moko kʼihebʼ ta teʼkoleʼq. 28 Xbʼaan naq li Jehobʼa* traqoq aatin saʼ xbʼeen chixjunil li ruuchichʼochʼ ut saʼ junpaat tixbʼaanu». 29 Ut joʼ kixye chaq ajwiʼ laj Isaías: «Wi li Jehobʼa* li najolomink rehebʼ li ánjel saʼ choxa inkʼaʼ raj kixkanabʼ chi yoʼyo wiibʼ oxibʼ li qalal qakʼajol, xookanaak raj joʼ Sodoom ut chanchano raj Gomoor».
30 Kʼaru tqaye chi joʼkanan? Ebʼ li qas qiitzʼin rehebʼ li junchʼol chi tenamit usta moko yookebʼ ta xsikʼbʼal li tiikilal, xeʼxtaw li tiikilal chiru li Yos saʼ xkʼabʼaʼebʼ li xpaabʼal. 31 Usta li tenamit Israel kixkʼe xchʼool chi xyuʼaminkil li xchaqʼrabʼ li tiikilal inkʼaʼ kiruuk chi wank joʼ naxye li chaqʼrabʼ aʼin. 32 Kʼaʼut inkʼaʼ xeʼruuk? Xbʼaan naq xeʼxkʼe xchʼool chirixebʼ li xbʼaanuhom ut inkʼaʼ chirixebʼ li xpaabʼal. Xeʼtichkʼok chiru li «pek li nakʼehok chi tichkʼok» 33 joʼ chanru tzʼiibʼanbʼil: «Kʼehomaq reetal! Yookin xkʼebʼal aran Sion jun li pek li nakʼehok chi tichkʼok ut jun li pek li natʼanok, abʼan li naxkʼojobʼ xchʼool chirix inkʼaʼ tkanaaq saʼ xutaan».