Juan
8 12 Tojaʼ naq li Jesús kiraatinahebʼ wiʼ chik ut kixye: «Laaʼin xsaqenk li ruuchichʼochʼ. Li ttaqenq we maajunwa tbʼeeq saʼ qʼoqyink, wanq bʼan rikʼin li saqenk li nakʼamok saʼ li yuʼam». 13 Joʼkan naq ebʼ laj pariseey xeʼxye re: «Aajunes nakaakʼe aawibʼ chi naweʼk joʼkan naq inkʼaʼ naru naqapaabʼ li nakaaye». 14 Li Jesús kixye rehebʼ: «Usta injunes ninkʼe wibʼ chi naweʼk, yaal li ninye xbʼaan naq laaʼin ninnaw bʼar xinchalk ut bʼar tinxik. Abʼan laaʼex inkʼaʼ nekeenaw bʼar xinchalk ut bʼar tinxik. 15 Laaʼex nekexraqok aatin joʼ chanru nakʼoxlak li winq, laaʼin maaʼani ninraq aatin saʼ xbʼeen. 16 Ut wi tinraqoq raj aatin, tinbʼaanu saʼ tiikilal xbʼaan naq moko wankin ta injunes wank bʼan wikʼin li Yuwaʼbʼej li kitaqlank chaq we. 17 Joʼkan ajwiʼ, saʼ Leechaqʼrabʼ tzʼiibʼanbʼil: “Wi junaj ru li teʼxye wiibʼ li qas qiitzʼin, yaal* li raatinebʼ”. 18 Injunes ninkʼe wibʼ chi naweʼk ut li Yuwaʼbʼej li kitaqlank chaq we nikinxkʼe ajwiʼ chi naweʼk». 19 Tojaʼ naq xeʼxpatzʼ re: «Bʼar wank Laayuwaʼ?». Li Jesús kixye rehebʼ: «Laaʼex inkʼaʼ nekeenaw wu chi moko nekeenaw ru Linyuwaʼ. Wi nekeenaw raj wu teenaw raj ajwiʼ ru Linyuwaʼ». 20 Kixye ebʼ li aatin aʼin bʼarwiʼ wank xkaaxil li tumin naq yook chaq chi kʼutuk saʼ rochoch li Yos. Abʼan maaʼani kichapok re xbʼaan naq toj maajiʼ nawulak xhoonalil.
21 Joʼkan naq kixye wiʼ chik rehebʼ: «Laaʼin tinxik ut laaʼex tineesikʼ abʼan texkamq saʼ leemaak. Bʼarwiʼ tinxik laaʼin, moko texruuq ta chi xik laaʼex». 22 Ebʼ laj judiiy xeʼok xyeebʼal: «Ma ok re tawiʼ xkamsinkil ribʼ? Xbʼaan naq naxye “Bʼarwiʼ tinxik laaʼin moko texruuq ta chi xik laaʼex”». 23 Tojaʼ naq aʼan kixye ajwiʼ: «Laaʼex re taqʼa; laaʼin re taqeʼq. Laaʼex re li ruuchichʼochʼ aʼin; laaʼin maawaʼin re li ruuchichʼochʼ aʼin. 24 Joʼkan naq xinye eere: “Texkamq saʼ leemaak”. Xbʼaan naq wi inkʼaʼ nekeepaabʼ naq laaʼin aʼan, texkamq saʼ leemaak». 25 Joʼkan naq xeʼok xpatzʼbʼal re: «Ut laaʼat anihat?». Li Jesús kixye rehebʼ: «Kʼaru ajʼe naq ninʼaatinak eerikʼin? 26 Wank naabʼal li tinruuq xyeebʼal cheerix ut naabʼal li naʼlebʼ chirix li tinraqoq wiʼ aatin. Joʼkan naq li kitaqlank chaq we naxye li yaal, ut laaʼin ninye saʼ ruuchichʼochʼ li xwabʼi chi xyeebʼal». 27 Abʼan inkʼaʼ xeʼxtaw ru naq yook chi aatinak chirix li Yuwaʼbʼej. 28 Tojaʼ naq li Jesús kixye rehebʼ: «Naq ak xeetʼuyubʼ chiru cheʼ li Ralal li Winq aran teenaw naq laaʼin aʼan ut naq inkʼaʼ nintaqla wibʼ injunes, ninye bʼan li kixkʼut chiwu li Yuwaʼbʼej. 29 Ut li kitaqlank chaq we wank wikʼin, inkʼaʼ nikinxkanabʼ injunes xbʼaan naq junelik ninbʼaanu li nawulak chiru». 30 Naq yook chaq xyeebʼal aʼin naabʼalebʼ xeʼok xpaabʼankil.
31 Tojaʼ naq li Jesús kixye rehebʼ laj judiiy li xeʼpaabʼank re: «Wi junelik nekeepaabʼ li waatin, relik chi yaal naq laaʼex intzolom; 32 teenaw li yaal, ut li yaal tkoloq eere». 33 Keʼxye re: «Laaʼo ralal xkʼajol laj Abrahán ut maajunwa xoowank choʼq xmoos anihaq. Kʼaʼut nakaaye “Texkoleʼq”?». 34 Li Jesús kixye rehebʼ: «Relik chi yaal ninye eere naq li namaakobʼk wank choʼq xmoos li maak. 35 Joʼkan ajwiʼ li moos moko nakanaak ta junelik saʼ rochoch laj echal re, abʼan li Alalbʼej nakanaak junelik. 36 Joʼkan naq, wi li Alalbʼej texkol, relik chi yaal naq texkoleʼq. 37 Laaʼin ninnaw naq laaʼex ralal xkʼajol laj Abrahán; abʼan nekeeraj inkamsinkil xbʼaan naq inkʼaʼ nekeekʼulubʼa linkʼutum. 38 Laaʼin ninʼaatinak chirix li xwil naq wankin chaq rikʼin Linyuwaʼ, abʼan laaʼex nekeebʼaanu li nekeerabʼi chi xyeebʼal leeyuwaʼ». 39 Ebʼ aʼan xeʼxye re: «Li qayuwaʼ aʼan laj Abrahán». Li Jesús kixye rehebʼ: «Wi laaʼex raj ralal xkʼajol laj Abrahán, nekeebʼaanu raj li naxbʼaanu laj Abrahán. 40 Abʼan nekeeraj inkamsinkil. Laaʼin jun li winq li kixye eere li yaal li kirabʼi rikʼin li Yos. Laj Abrahán moko kixbʼaanu ta aʼin. 41 Laaʼex nekeebʼaanu li naxbʼaanu leeyuwaʼ». Ut ebʼ aʼan xeʼxye re: «Laaʼo inkʼaʼ xooyoʼlaak saʼ muxuk ibʼ;* jun ajwiʼ li qayuwaʼ aʼan li Yos».
42 Li Jesús kixye rehebʼ: «Wi li Yos raj Leeyuwaʼ, laaʼex nikineera raj xbʼaan naq li Yos kitaqlank chaq we joʼkan naq wankin arin. Moko xintaqla ta chaq wibʼ injunes, aʼan bʼan kitaqlank chaq we. 43 Kʼaʼut inkʼaʼ nekeetaw ru li yookin xyeebʼal? Xbʼaan naq laaʼex inkʼaʼ nekexruuk xkʼulubʼankil li waatin. 44 Laaʼex ralal xkʼajol leeyuwaʼ aʼ laj Tza* ut nekeeraj xbʼaanunkil li naraj leeyuwaʼ. Aʼan chaq aj kamsinel chalen chaq saʼ xtiklajik. Kixkanabʼ li yaal xbʼaan naq li yaal moko wank ta rikʼin. Natikʼtiʼik xbʼaan naq aʼan li wank saʼ xchʼool. Aʼan aj tikʼtiʼ ut xyuwaʼil li tikʼtiʼ. 45 Abʼan, laaʼin inkʼaʼ nikineepaabʼ xbʼaan naq ninye eere li yaal. 46 Ani eere naru nakʼutbʼesink re, naq xinmaakobʼk? Wi ninye li yaal, kʼaʼut inkʼaʼ nikineepaabʼ? 47 Li re li Yos narabʼi li raatin li Yos. Joʼkan naq laaʼex inkʼaʼ nekexʼabʼink xbʼaan naq moko rehex ta li Yos».
48 Naq xeʼrabʼi aʼin, ebʼ laj judiiy xeʼxye re: «Ma inkʼaʼ yaal naq naqaye “Laaʼat aj Samaria ut wank aawikʼin li maaʼus aj musiqʼej”?». 49 Li Jesús kixye rehebʼ: «Maakʼaʼ maaʼus aj musiqʼej wikʼin. Li ninbʼaanu laaʼin aʼan xkʼebʼal xloqʼal Linyuwaʼ, ut laaʼex inkʼaʼ nekeekʼe inloqʼal. 50 Abʼan laaʼin inkʼaʼ yookin xsikʼbʼal li loqʼal choʼq we; wank jun li nasikʼok re, ut aʼan li naraqok aatin. 51 Relik chi yaal ninye eere naq wi junaq naxpaabʼ li waatin maajunwa tkamq». 52 Ebʼ laj judiiy xeʼxye re: «Anaqwan xchʼolaak chiqu naq wank maaʼus aj musiqʼej aawikʼin. Laj Abrahán kikamk ut ebʼ li propeet ajwiʼ, abʼan laaʼat nakaaye “Wi junaq naxpaabʼ li waatin maajunwa tkamq”. 53 Ma nim tabʼiʼ laawankil chiru li qayuwaʼ laj Abrahán li kikamk? Ebʼ li propeet xeʼkamk ajwiʼ. Anihat laaʼat?». 54 Li Jesús kixye: «Wi tinkʼe inloqʼal injunes, maakʼaʼ raj t-oq wiʼ linloqʼal. Li nakʼehok re inloqʼal aʼan Linyuwaʼ, li nekeeye naq Eeyos. 55 Abʼan laaʼex inkʼaʼ nekeenaw ru, abʼan laaʼin ninnaw ru. Ut wi tinye raj naq inkʼaʼ ninnaw ru, laaʼin raj aj tikʼtiʼ joʼ laaʼex. Abʼan laaʼin ninnaw ru ut ninpaabʼ li raatin. 56 Laj Abrahán leeyuwaʼ kʼajoʼ kisahoʼk saʼ xchʼool chi xkʼoxlankil naq tril li tinbʼaanu, ut kiril ut kisahoʼk saʼ xchʼool». 57 Tojaʼ naq ebʼ laj judiiy xeʼxye re: «Maakʼaʼ 50 chihabʼ aawe ut nakaaye naq ak xaawil ru laj Abrahán?». 58 Li Jesús kixye rehebʼ: «Relik chi yaal ninye eere naq toj maajiʼ ajwiʼ nayoʼlaak laj Abrahán ut laaʼin ak wankin chaq». 59 Tojaʼ naq xeʼxchap li pek re xkutbʼal saʼ xbʼeen li Jesús, abʼan aʼan kixmuq ribʼ ut kiʼelk saʼ rochoch li Yos.