Romanos
3 Joʼkan bʼiʼ, kʼaru nabʼaanunk re, naq jun laj judiiy nimaq xwankil chiruhebʼ li junchʼol? Kʼaru rusilal naxtaw junaq li qas qiitzʼin naq nasetmank xtzʼuumal xtzʼejwal? 2 Wank naabʼal rusilal. Li xbʼeen, li Yos kixkʼe rehebʼ laj judiiy li esil li chalenaq rikʼin. 3 Joʼkan bʼiʼ, wi wankebʼ laj judiiy inkʼaʼ xeʼpaabʼank, ma naraj xyeebʼal aʼin naq ebʼ li qas qiitzʼin inkʼaʼ chik teʼruuq xkʼojobʼankil xchʼool rikʼin li Yos? 4 Relik chi yaal naq inkʼaʼ! Li Yos junelik naxye li yaal, usta chixjunilebʼ li qas qiitzʼin nekeʼtikʼtiʼik, joʼ tzʼiibʼanbʼil: «Rikʼin laawaatin t-ilmanq naq tiik laachʼool ut us tat-elq naq yooqebʼ chi raqok aatin saʼ aabʼeen». 5 Naq inkʼaʼ nokoonaʼlebʼak saʼ tiikilal nakʼutunk chi tzʼaqal re ru naq tiik xchʼool li Yos. Joʼkan bʼiʼ, ma maaʼus xnaʼlebʼ li Yos naq naxkʼut li xjosqʼil? (Yookin chi aatinak joʼ nekeʼaatinak wiibʼ oxibʼ li qas qiitzʼin). 6 Chʼolchʼo naq moko maaʼus ta xnaʼlebʼ! Wi joʼkan raj, chanru traqoq aatin li Yos saʼ xbʼeen li ruuchichʼochʼ?
7 Abʼan, wi laaʼin yookin chi tikʼtiʼik ut aʼin naxkʼutbʼesi naq li Yos naxye li yaal ut naxbʼaanu naq ebʼ li qas qiitzʼin teʼxnima ru, kʼaʼut li Yos yook xyeebʼal naq wank inmaak? 8 Ut kʼaʼut inkʼaʼ naqaye: «Qabʼaanuhaq li inkʼaʼ us re naq tchalq li us» joʼ nokooʼeʼxqʼabʼa chi xyeebʼal wiibʼ oxibʼ li qas qiitzʼin? Xkʼulubʼebʼ li winq aʼin li raqbʼa aatin li tchalq saʼ xbʼeenebʼ.
9 Ma qʼaxal us wiʼ chik wanko laaʼo laj judiiy chiruhebʼ li junchʼol? Maajoqʼe bʼiʼan! Xbʼaan naq ak xqakanabʼ chi chʼolchʼo ru naq chiqajunilo wanko rubʼel xwankil li maak, maakʼaʼ naxye ma laaʼo aj judiiy malaj laaʼo aj griego. 10 Joʼkan tzʼiibʼanbʼil: «Maakʼaʼ junaq winq li tiik xchʼool chi moko wank ta junaq; 11 maakʼaʼ junaq li qas qiitzʼin li naxkʼe reetal kʼaru tento xbʼaanunkil; maakʼaʼ junaq li qas qiitzʼin li naxsikʼ li Yos. 12 Chixjunilebʼ xeʼxjal xbʼe, chixjunilebʼ maakʼaʼ nekeʼok wiʼ, maaʼani naxbʼaanu li us chi moko wank ta junaq». 13 «Li xkuxebʼ chanchan jun li teetokil muqlebʼaal; nekeʼbʼalaqʼik rikʼin ruʼuj raqʼ». «Li naʼelk chi xtzʼuumal rehebʼ chanchan xmay kʼantiʼ». 14 «Ut li xtzʼuumal rehebʼ nujenaq chi josqʼil ut li xtzʼuumal rehebʼ junelik naxye naq ebʼ li junchʼol teʼxkʼul li inkʼaʼ us». 15 «Li roqebʼ saʼ junpaat naxik chi kamsink». 16 «Nekeʼxkʼe saʼ raaxiikʼ ebʼ li qas qiitzʼin ut nekeʼxbʼaanu naq ra wanqebʼ 17 ut inkʼaʼ xnawomebʼ ru xbʼehil li tuqtuukilal». 18 «Inkʼaʼ nekeʼxkʼe li Yos saʼ ruhebʼ».
19 Naqanaw naq chixjunil li naxye li Chaqʼrabʼ, choʼq rehebʼ li wankebʼ rubʼel xwankil li Chaqʼrabʼ re naq maaʼani t-aatinaq ut re naq chixjunil li ruuchichʼochʼ wanq xmaak chiru li Yos. 20 Joʼkan naq, maaʼani tyeemanq chirix naq tiik xchʼool rikʼin xbʼaanunkil li naxye li chaqʼrabʼ xbʼaan naq saʼ xkʼabʼaʼ li chaqʼrabʼ naqanaw chi tzʼaqal re ru kʼaru li maak.
21 Anaqwan ak xkʼutbʼesimank li xtiikilal li Yos abʼan moko rikʼin ta li xtenqʼ li chaqʼrabʼ joʼ naxye li Xchaqʼrabʼ laj Moisés ut li xeʼxtzʼiibʼa chaq ebʼ li Propeet. 22 Ut chixjunilebʼ li nekeʼpaabʼank teʼxtaw li xtiikilal li Yos rikʼin xpaabʼankil li Jesukriist. Xbʼaan naq maakʼaʼ xjalanil li junjunq, 23 chixjunilebʼ xeʼmaakobʼk ut inkʼaʼ nekeʼruuk xkʼutbʼesinkil li xloqʼal li Yos. 24 Li Kristo Jesús kixkolebʼ naq kixtoj li xmaakebʼ ut chi joʼkan yeebʼil naq tiikebʼ xchʼool chiru li Yos. Aʼin li maatan li kixkʼe li Yos rehebʼ saʼ xkʼabʼaʼ li xnimal rusilal. 25 Li Yos kixkʼe aʼan choʼq mayej re naq ebʼ li qas qiitzʼin teʼxkʼam wiʼ chik ribʼ saʼ usilal rikʼin. Ut teʼruuq xtawbʼal aʼin wi nekeʼxpaabʼ naq li Kriist kixkʼe li xkikʼel chirixebʼ. Li Yos kixbʼaanu aʼin re xkʼutbʼesinkil li xtiikilal xbʼaan naq wank chaq xkuyum ut kixkuyebʼ chaq xmaak. 26 Ut chiruhebʼ li kutan aʼin, aʼan ajwiʼ naxkʼut chiqu li xtiikilal rikʼin xyeebʼal naq tiik xchʼool li napaabʼank re li Jesús.
27 Joʼkan bʼiʼ, ma wank xyaalal naq tqanima qibʼ? Maakʼaʼ xyaalal. Ma naru naqanima qibʼ saʼ xkʼabʼaʼ naq naqapaabʼ li chaqʼrabʼ? Inkʼaʼ naru, kaʼajwiʼ tooruuq xnimankil qibʼ rikʼin xtaqenkil li chaqʼrabʼ chirix li paabʼal. 28 Chʼolchʼo chiqu naq saʼ xkʼabʼaʼ li xpaabʼal jun li winq nayeemank naq tiik xchʼool ut maawaʼ xbʼaan naq naxyal xbʼaanunkil li naxye li chaqʼrabʼ. 29 Ma kaʼaj tawiʼ choʼq rehebʼ laj judiiy li Yos aʼin? Ma inkʼaʼ tabʼiʼ aʼan ajwiʼ Xyos li maawaʼebʼ aj judiiy? Heeheʼ, Xyos ajwiʼ li maawaʼebʼ aj judiiy. 30 Saʼ xkʼabʼaʼ naq jun ajwiʼ li Yos, aʼan tixye naq tiikebʼ xchʼool ebʼ laj judiiy* joʼ ajwiʼ li maawaʼebʼ aj judiiy* saʼ xkʼabʼaʼebʼ li xpaabʼal. 31 Joʼkan bʼiʼ, ma naqasach xwankil li chaqʼrabʼ rikʼin li naqapaabʼ? Chʼolchʼo naq inkʼaʼ. Naqakʼe bʼan xwankil li chaqʼrabʼ.