Hechos
17 Tojaʼ naq xeʼnumeʼk Anfípolis ut Apolonia, ut xeʼwulak Tesalónica saʼ jun li naʼaj bʼarwiʼ nekeʼloqʼonink ebʼ laj judiiy. 2 Ut joʼ kʼaynaq chaq xbʼaanunkil, kiʼok bʼarwiʼ wankebʼ aʼan ut chiru oxibʼ sábado* kiroksi li Raatin li Yos re naʼlebʼak rikʼinebʼ. 3 Naxchʼolobʼ chiruhebʼ ut naxkʼut rikʼin li raatin li Yos naq aajel ru naq trahobʼtesiiq li Kriist ut twaklesiiq chi yoʼyo saʼ xyanqebʼ li kamenaq. Kiʼok xyeebʼal rehebʼ: «Aʼin li Kriist aʼ li Jesús chirix li yookin wiʼ chi aatinak». 4 Saʼ xkʼabʼaʼ aʼin, wiibʼ oxibʼ rehebʼ aʼan xeʼok chi paabʼank ut xeʼok saʼ xyanqebʼ laj Pablo ut laj Silas. Joʼkan ajwiʼ xeʼxbʼaanu naabʼalebʼ laj griego li nekeʼxloqʼoni li Yos ut naabʼalebʼ li ixq li wankebʼ xwankil.
5 Saʼ xkʼabʼaʼ naq numtajenaq xkaqalebʼ laj judiiy, xeʼxchʼutubʼ wiibʼ oxibʼ li winq li maaʼusebʼ xnaʼlebʼ li nekeʼbʼebʼot* saʼ kʼayil, ut xeʼxchʼutubʼ ajwiʼ naabʼal li qas qiitzʼin re xpoqoqinkil* li tenamit. Tojaʼ naq xeʼok saʼ rochoch laj Jasón chi maakʼaʼebʼ xleseens chi xsikʼbʼal laj Pablo ut laj Silas re xqʼaxtesinkil saʼ ruqʼ li kʼiila tenamit. 6 Xbʼaan naq inkʼaʼ xeʼxtaw laj Pablo ut laj Silas, xeʼxjukuki laj Jasón ut wiibʼ oxibʼ laj paabʼanel chiruhebʼ li nekeʼjolomink saʼ li tenamit, ut xeʼok xyeebʼal chi kaw xyaabʼebʼ xkux: «Ebʼ li winq li yookebʼ xbʼaanunkil naq twanq chʼaʼajkilal saʼ li ruuchichʼochʼ wankebʼ ajwiʼ arin 7 ut laj Jasón kixkʼulebʼ saʼ rochoch. Chixjunilebʼ li winq aʼin nekeʼxqʼet xchaqʼrabʼ li awabʼej re Roma* ut nekeʼxye naq wank jun chik awabʼej aʼ li Jesús». 8 Naq xeʼrabʼi aʼin, ebʼ li qas qiitzʼin ut ebʼ li nekeʼjolomink saʼ li tenamit, xeʼxuwak 9 joʼkan naq, xeʼxye re laj Jasón ut rehebʼ li junchʼol naq teʼxtoj li relikebʼ,* ut chirix chik aʼan xeʼkanabʼaak chi xik.
10 Saʼ li qʼoqyink ajwiʼ aʼan, ebʼ laj paabʼanel xeʼxtaqla laj Pablo ut laj Silas aran Berea. Ut naq xeʼwulak, xkohebʼ saʼ li naʼaj bʼarwiʼ nekeʼloqʼonink ebʼ laj judiiy. 11 Abʼan ebʼ laj judiiy aʼin qʼaxal nekeʼraj wiʼ chik tzolok chiruhebʼ laj Tesalónica xbʼaan naq xeʼxkʼulubʼa li aatin chi anchalebʼ xchʼool, ut wulaj wulaj nekeʼxtzʼil rix chiʼus li Raatin li Yos re rilbʼal ma tzʼaqal yaal li yookebʼ rabʼinkil. 12 Joʼkan bʼiʼ, naabʼal rehebʼ xeʼok chi paabʼank. Joʼkan ajwiʼ kikʼulmank rikʼin wiibʼ oxibʼ li winq ut naabʼalebʼ li ixq aj griego li oxloqʼinbʼilebʼ. 13 Abʼan naq ebʼ laj judiiy re Tesalónica xeʼxnaw naq laj Pablo yook chaq ajwiʼ xyeebʼal resil li raatin li Yos aran Berea xkohebʼ aran re xchiqʼbʼalebʼ xjosqʼil ebʼ li qas qiitzʼin ut re naq teʼxpoqoqi ribʼ.* 14 Saʼ junpaat ebʼ laj paabʼanel xeʼxtaqla laj Pablo chire li palaw, abʼan laj Silas ut laj Timoteo xeʼkanaak aran. 15 Abʼanan, li nekeʼochbʼeenink re laj Pablo xeʼxkʼam toj Atenas. Naq xeʼsutqʼiik chaq, xeʼxye re laj Timoteo ut re laj Silas naq teʼxseebʼa ribʼ chi xtawbʼal chaq laj Pablo joʼ kixye chaq rehebʼ.
16 Joʼkan bʼiʼ, naq laj Pablo yook roybʼeninkilebʼ aran Atenas, kichalk xjosqʼil chi rilbʼal naq li tenamit nujenaq chi pechʼbʼil yos. 17 Joʼkan naq kiʼok chi naʼlebʼak rikʼinebʼ laj judiiy ut rikʼin jalanebʼ chik li qas qiitzʼin li nekeʼxloqʼoni li Yos saʼ li naʼaj re loqʼonink. Joʼkan ajwiʼ kixbʼaanu rikʼinebʼ li wankebʼ saʼ kʼayil. 18 Abʼan wiibʼ oxibʼ li winq aj nawonel xninqal ru kʼaʼuxl xeʼok xchoqinkil laj Pablo. Ebʼ li winq aʼin aj epicúreo* ut aj estoico* nayeemank rehebʼ. Wankebʼ xeʼok xyeebʼal: «Kʼaru tawiʼ naraj xyeebʼal li mem aj winq aʼin?». Jalanebʼ chik xeʼok xyeebʼal: «Chanchan naq aj yeehol resil li jalanil yos». Xeʼxye aʼin xbʼaan naq laj Pablo yook xkʼebʼal chi naweʼk li chaabʼil esil chirix li Jesús ut chirix li wakliik chi yoʼyo. 19 Joʼkan naq xeʼxchap ut xeʼxkʼam saʼ li naʼaj Areópago xkʼabʼaʼ. Ut xeʼok xyeebʼal: «Ma naru naqanaw li akʼ kʼutum chirix li yookat chi aatinak? 20 Xbʼaan naq yookat chi aatinak chirix li maajunwa qabʼihom ut naqaj xnawbʼal kʼaru naraj xyeebʼal». 21 Xbʼaan naq chixjunilebʼ laj Atenas ut ebʼ laj abʼl tenamit li wankebʼ aran* junes xseeraqʼinkil malaj rabʼinkil li akʼ naʼlebʼ nekeʼxbʼaanu naq nekeʼhilank. 22 Tojaʼ naq laj Pablo kixaqli saʼ xyi li Areópago ut kixye:
«Ex aj Atenas, ninkʼe reetal naq laaʼex qʼaxal nekeeroxloqʼi wiʼ chik ebʼ li yos chiruhebʼ li junchʼol. 23 Jun eetalil, naq yookin chi bʼeek ut xkaʼyankil chixjunil li nekeeloqʼoni, xintaw ajwiʼ jun li altar li tzʼiibʼanbʼil ru ut naxye: “Choʼq re jun li Yos li Inkʼaʼ Nawbʼil Ru”. Chirix aʼan tzʼaqal yookin chi aatinak eerikʼin, chirix li nekeeloqʼoni ut inkʼaʼ nekeenaw ru. 24 Li Yos li kixyiibʼ li ruuchichʼochʼ ut chixjunil li wank chisaʼ, aʼan Xqaawaʼ li choxa ut li ruuchichʼochʼ, joʼkan naq moko wank ta saʼebʼ li ochoch re loqʼonink li yiibʼanbʼil xbʼaanebʼ li winq. 25 Chi moko naxye ta rehebʼ li qas qiitzʼin naq ttenqʼaaq xbʼaan naq moko naʼajmank ta chiru tenqʼaak, aʼan bʼan naxkʼe rehebʼ li qas qiitzʼin li yuʼam, li musiqʼ ut chixjunil li naʼajmank chiruhebʼ. 26 Rikʼin jun ajwiʼ chi winq kixyobʼtesi chixjunilebʼ li tenamit re naq teʼxnujobʼresi li ruuchichʼochʼ, ut kixxaqabʼ xhoonalil re naq tkʼulmanq wiibʼ oxibʼ li kʼaʼaq re ru, ut kixxaqabʼ li xnubʼalil ebʼ li naʼaj re naq ebʼ li qas qiitzʼin teʼruuq chi wank. 27 Kixbʼaanu aʼin re naq teʼxsikʼ li Yos ut wi teʼxkʼe xchʼool chi xsikʼbʼal, chʼolchʼo naq teʼxtaw xbʼaan naq moko najt ta wank qikʼin chiqajunqal. 28 Xbʼaan naq saʼ xkʼabʼaʼ aʼan wank qayuʼam, nokooʼekʼank ut yoʼyoko. Joʼ xeʼxye wiibʼ oxibʼ laj tzʼiibʼ saʼ eeyanq: “Xbʼaan naq laaʼo ajwiʼ ralal xkʼajol”.
29 »Ut saʼ xkʼabʼaʼ naq laaʼo ralal xkʼajol li Yos, inkʼaʼ naru naqakʼoxla naq li Yos chanchan li oor, li plaat malaj li pek chi moko li yiibʼanbʼil rikʼin xseebʼal ruqʼ ut xkʼaʼuxl li winq. 30 Li Yos inkʼaʼ chik naxkʼe saʼ ajl ebʼ li kutan naq ebʼ li qas qiitzʼin inkʼaʼ nekeʼxnaw chaq ru, abʼan anaqwan yook xyeebʼal re chixjunilebʼ naq teʼxyotʼ xchʼool ut teʼxjal xnaʼlebʼ. 31 Xbʼaan naq ak kixxaqabʼ xkutankil naq traqoq aatin saʼ tiikilal saʼ xbʼeen chixjunil li ruuchichʼochʼ saʼ xkʼabʼaʼ jun li winq li xaqabʼanbʼil xbʼaan. Ut ak kixkʼe jun li eetalil rehebʼ li qas qiitzʼin naq kixwaklesi chi yoʼyo saʼ xyanqebʼ li kamenaq».
32 Joʼkan bʼiʼ, naq xeʼrabʼi chi xyeebʼal chirix li xwaklijikebʼ li kamenaq, wankebʼ xeʼok xseʼenkil ut jalanebʼ chik xeʼok xyeebʼal: «Saʼ jun chik kutan tatqabʼi chi aatinak chirix aʼin». 33 Tojaʼ naq xkoho laj Pablo 34 ut wiibʼ oxibʼ li winq xkohebʼ chirix ut xeʼok chi paabʼank. Saʼ xyanqebʼ aʼan wank laj Dionisio, aj raqol aatin re li Aréopago, ut jun li ixq Dámaris xkʼabʼaʼ, ut jalanebʼ chik li qas qiitzʼin.