2 Tesalonicenses
1 Laaʼin laj Pablo ut li wankebʼ wochbʼeen aʼan laj Silvano* ut laj Timoteo naqataqla li esilhu aʼin choʼq re li chʼuut re Tesalónica li wank saʼ junajil rikʼin li Yos, li Qayuwaʼ, ut li Qaawaʼ Jesukriist:
2 Chiwanq taxaq eerikʼin li xnimal rusilal ut li xtuqtuukilal li Yos, li Yuwaʼbʼej, ut li Qaawaʼ Jesukriist.
3 Ex aj paabʼanel junelik naqekʼa naq tento toobʼanyoxinq cheerix chiru li Yos. Ut us xbʼaanunkil xbʼaan naq kʼajoʼ yook chi kʼiik leepaabʼal ut li rahok li nekeerekʼa cheeribʼil eeribʼ inkʼaʼ naxkanabʼ kʼiik. 4 Joʼkan naq naqanima eeru saʼebʼ li xchʼuut li Yos saʼ xkʼabʼaʼ leekuyum ut leepaabʼal li nekeekʼutbʼesi naq yookex xkuybʼal chixjunil li rahobʼtesiik ut ebʼ li chʼaʼajkilal. 5 Aʼin naxkʼutbʼesi naq li Yos naraqok aatin saʼ tiikilal ut saʼ xkʼabʼaʼ aʼin eekʼulubʼ naq texʼoq saʼ li Xʼawabʼejilal li Yos xbʼaan naq yookex xkʼulbʼal li rahilal.
6 Saʼ xkʼabʼaʼ naq tiik xchʼool li Yos, tixkʼehebʼ chi xtojbʼal xmaak li nekeʼrahobʼtesink eere. 7 Abʼan laaʼex li yookex xkʼulbʼal li rahilal teekanabʼ xkʼulbʼal li rahilal qochbʼeen, naq tkʼutunq saʼ choxa li Qaawaʼ Jesús rochbʼeenebʼ li xʼánjel* 8 saʼ xyanq li ruʼuj raqʼ xaml, chiruhebʼ li kutan aʼan traqoq aatin saʼ xbʼeenebʼ li inkʼaʼ nekeʼxnaw ru li Yos ut saʼ xbʼeenebʼ li inkʼaʼ nekeʼxpaabʼ li chaabʼil esil chirix li Qaawaʼ Jesús. 9 Li Qaawaʼ traqoq aatin saʼ xbʼeenebʼ li qas qiitzʼin aʼin. Tixkʼehebʼ chi xtojbʼal xmaak naq tixsachebʼ chi junajwa. Joʼkan naq inkʼaʼ chik trilebʼ ru chi moko tixtenqʼahebʼ rikʼin li xnimal xwankil. 10 Naq tchalq li Qaawaʼ re naq tkʼeheʼq xloqʼal rochbʼeenebʼ li santil paabʼanel, chixjunilebʼ li nekeʼpaabʼank re teʼsachq xchʼool xbʼaan. Ut saʼ xkʼabʼaʼ naq xeepaabʼ li xqaye eere, laaʼex ajwiʼ texwanq saʼ xyanqebʼ.
11 Saʼ xkʼabʼaʼ aʼin naq junelik nokootijok cheerix ut natzʼaama re li Qayos naq tril naq eekʼulubʼ xkʼulbʼal li yuʼam chirix li xexbʼoq wiʼ ut rikʼin li xwankil truuq xbʼaanunkil chixjunil li us li naraj xbʼaanunkil eere ut li kʼanjel li nekeebʼaanu chirix leepaabʼal us t-elq. 12 Re naq chi joʼkan, li xkʼabʼaʼ li Qaawaʼ Jesús tkʼeheʼq xloqʼal saʼ xkʼabʼaʼ leebʼaanuhom ut laaʼex wanqex saʼ junajil rikʼin, aʼin tixkʼutbʼesi li xnimal rusilal li Qayos ut li Qaawaʼ Jesukriist.