Romanos
10 Ex wechpaabʼanel, nawaj chi anchal linchʼool ut nintzʼaama chiru li Yos naq ebʼ aʼan teʼkoleʼq. 2 Laaʼin ninkʼe chi naweʼk naq nekeʼxkʼe xchʼool chi xloqʼoninkil li Yos abʼan inkʼaʼ nekeʼxtaw ru chiʼus li rajom li Yos. 3 Saʼ xkʼabʼaʼ naq inkʼaʼ nekeʼxnaw li xtiikilal li Yos, xeʼxbʼaanu li xeʼxkʼoxla naq tiik ru. Joʼkan naq, inkʼaʼ xeʼxpaabʼ li xtiikilal li Yos. 4 Rikʼin li Kriist kiraqeʼk li Chaqʼrabʼ. Ut li tixkʼutbʼesi naq naxpaabʼ, tixtaw li tiikilal.
5 Laj Moisés kixtzʼiibʼa chanru xtawbʼal li tiikilal rikʼin li Chaqʼrabʼ: «Li nabʼaanunk re aʼin, twanq xyuʼam saʼ xkʼabʼaʼ aʼin». 6 Abʼan li Raatin li Yos naxye ajwiʼ naq saʼ xkʼabʼaʼ li xpaabʼal jun li qas qiitzʼin naru naʼileʼk naq tiik xchʼool. Arin naxye: «Maaye saʼ laachʼool “Ani ttaqeʼq saʼ choxa?”, aʼin naraj xyeebʼal, ani ttaqeʼq saʼ choxa re xkubʼsinkil li Kriist? 7 Chi moko taaye “Ani tkubʼeeq saʼ xchamal li jul?”,* aʼin naraj xyeebʼal, re risinkil li Kriist saʼ xyanqebʼ li kamenaq». 8 Abʼan kʼaru naxye li Raatin li Yos? Li aatin nachʼ wank aawikʼin, wank chi xtzʼuumal aawe ut saʼ laachʼool, aʼin naraj xyeebʼal, li aatin li kʼulubʼanbʼil saʼ xkʼabʼaʼ li paabʼal. 9 Xbʼaan naq wi rikʼin xtzʼuumal aawe nakaaye chiruhebʼ li junchʼol naq li Jesús aʼan li Qaawaʼ ut rikʼin laachʼool nakaakʼutbʼesi naq nakaapaabʼ naq li Yos kixwaklesi chi yoʼyo saʼ xyanqebʼ li kamenaq, tatkoleʼq. 10 Naq junaq li qas qiitzʼin naxkʼutbʼesi li paabʼal li chalenaq saʼ li xchʼool, aʼin naxbʼaanu naq tiikaq xchʼool ut naq naxkʼe chi naweʼk li xpaabʼal rehebʼ li junchʼol, aʼin naxbʼaanu naq tkoleʼq.
11 Xbʼaan naq jun xraqal li Raatin li Yos naxye: «Li naxkʼojobʼ xchʼool chirix inkʼaʼ tkanaaq saʼ xutaan». 12 Xbʼaan naq maakʼaʼ xjalanilebʼ laj judiiy rikʼinebʼ laj griego. Jun ajwiʼ li Qaawaʼ wank saʼ qabʼeen. Aʼan qʼaxal narosobʼtesihebʼ li nekeʼxyaabʼasi li xkʼabʼaʼ re naq teʼtenqʼaaq. 13 Xbʼaan naq li naxyaabʼasi li xkʼabʼaʼ li Jehobʼa* re naq ttenqʼaaq, tkoleʼq. 14 Abʼanan, chanru teʼroksi li xkʼabʼaʼ re xtzʼaamankil naq teʼtenqʼaaq wi maajiʼ nekeʼok xpaabʼankil? Chanru teʼoq xpaabʼankil wi maajiʼ nekeʼrabʼi chirix? Ut chanru teʼrabʼi wi maaʼani naxkʼe resil? 15 Ut chanru teʼxkʼe resil wi inkʼaʼ taqlanbʼilebʼ? Joʼ chanru tzʼiibʼanbʼil: «Kʼajoʼ xchʼinaʼusal li roqebʼ li nekeʼxkʼe chi naweʼk li chaabʼil esil!».
16 Abʼan moko chixjunilebʼ ta xeʼxpaabʼ li chaabʼil esil. Xbʼaan naq laj Isaías naxye: «Jehobʼa,* ma wank junaq li qas qiitzʼin li naxpaabʼ li naqakʼe chi naweʼk?». 17 Joʼkan bʼiʼ, li paabʼal nachalk naq naʼabʼimank li aatin. Ut li aatin naʼabʼimank naq nakʼemank resil li Kriist. 18 Abʼan laaʼin ninpatzʼ: ma inkʼaʼ xeerabʼi? Chʼolchʼo naq xeerabʼi xbʼaan naq «kiʼabʼimank li xyaabʼ saʼ chixjunil li ruuchichʼochʼ ut kiwulak resil saʼebʼ li naʼaj li najt wankebʼ saʼ li ruuchichʼochʼ». 19 Abʼan laaʼin ninpatzʼ: ma inkʼaʼ tabʼiʼ naxnaw li tenamit Israel? Laj Moisés kixye xbʼeenwa: «Twoksi jun li chʼuut li maawaʼ tenamit re xchiqʼbʼal xkaqal leechʼool. Twoksi jun li tenamit li maakʼaʼ xnaʼlebʼ re xchiqʼbʼal leejosqʼil». 20 Abʼan laj Isaías chi maakʼaʼ xxiw kixye: «Li inkʼaʼ yookebʼ insikʼbʼal xineʼxtaw. Li inkʼaʼ nikineʼxpatzʼ xeʼxnaw wu». 21 Abʼanan, chirix laj Israel naxye: «Chixjunil li kutan teeto li wuqʼ chiru li tenamit li kaw xjolom ut naxye li inkʼaʼ us chiwix».