Li Jesus Wank Getsemani

NAQ li Jesus ut ebʼ li xtzolom keʼelk saʼ li ochoch bʼarwiʼ keʼxnima li waʼak, kohebʼ saʼ xnaʼaj li awimq, Getsemani. Saʼ li naʼaj aʼin, li Jesus naabʼal sut kikʼulunk rikʼinebʼ li xtzolom. Saʼ li Getsemani, li Jesus kixye rehebʼ li xtzolom naq junelik aj-ooqebʼ ru ut inkʼaʼ teʼxkanabʼ tijok. Kixkanabʼ junpaat ebʼ li xtzolom ut kixwiqʼibʼ ribʼ saʼ chʼochʼ chi tijok.

Kʼaru yookebʼ xbʼaanunkil ebʼ li xtzolom li Jesus naq kisutqʼiik chaq? Yookebʼ chi wark! Li Jesus kixye rehebʼ oxibʼ sut naq inkʼaʼ teʼwarq. Abʼan inkʼaʼ keʼabʼink. Saʼ li rox sut naq kisutqʼiik kixye rehebʼ: ‹Kʼaʼut naq kexwark? Yook chi wulak xhoonal naq tinqʼaxtesiiq saʼ ruqʼebʼ li xikʼ nekeʼilok we›.

Toj yook chi aatinak li Jesus rikʼinebʼ li xtzolom, naq kichalk li kʼiila tenamit chi xtawbʼal. Wankebʼ rikʼin jutzʼ chʼiichʼ ut cheʼ. Ut wankebʼ xxaml re rilbʼalebʼ xbʼe. Naq keʼnachʼok, saʼ xyanq li tenamit kiʼelk chaq jun winq, kijilok chi xkʼatq li Jesus ut kixtzʼubʼ ru joʼ nakʼutunk saʼ li eetalil. Li winq aʼan laj Judas Iscariote! Abʼan, kʼaʼut naq kixtzʼubʼ ru li Jesus?

Li Jesus kixye: ‹Judas, rikʼin xtzʼubʼal wu tinaaqʼaxtesi?› Naq laj Judas kixtzʼubʼ ru li Jesus, ebʼ li winq keʼxnaw naq aʼan li yookebʼ xsikʼbʼal. Xbʼaan naq aʼan li eetalil kixkʼe laj Judas rehebʼ. Tojaʼ naq ebʼ li winq, keʼjilok rikʼin li Jesus ut keʼxchap. Laj Pedro inkʼaʼ kiraj naq teʼxkʼam li Jesus. Joʼkan naq kirisi chaq li xchʼiichʼ ut kixyoʼk xxik jun li winq. Naq li Jesus kiril aʼin, kixchʼeʼ xxik li winq ut kixkʼirtasi.

Li Jesus kixye re laj Pedro: ‹Xok laachʼiichʼ. Ma inkʼaʼ tinruuq xpatzʼbʼal re Linyuwaʼ naq tixtaqla chaq naabʼal li anjel re naq tineʼxkol?› Li Jesus kiru raj xpatzʼbʼal re li Xyuwaʼ naq tkoleʼq. Abʼan inkʼaʼ kixbʼaanu, xbʼaan naq naxnaw naq kiwulak xhoonal naq tkʼameʼq xbʼaanebʼ li xikʼ nekeʼilok re. Joʼkan naq kixqʼaxtesi ribʼ saʼ ruqʼebʼ. Qilaq, li keʼxbʼaanu re li Jesus.