Chanru naq tookoleʼq chiru li maak ut li kamk

35 Ma najultikoʼk aawe naq laj Adan, li xbʼeen winq, kimaakobʼk? Aʼan kixsach li yuʼam ut li sahilal naʼajej ut chiqajunilo nokookamk ajwiʼ, xbʼaan naq laaʼo ralal xkʼajol. —Romanos 5:12; 3:23

36 Naru tqataw wiʼ chik li tzʼaqal yuʼam, wi junaq chik li winq li maakʼaʼ xmaak tixkʼe li xyuʼam saʼ qakʼabʼaʼ, malaj tooxkol chiru li kamk. —1 Corintios 15:45; Romanos 5:19, 21

37 Li Jesus aʼan li Ralal li Yos. Aʼan tzʼaqal re ru. Inkʼaʼ kimaakobʼk. —Hebreos 5:9; 7:26

38 Kixkanabʼ ribʼ chi kamsiik, xbʼaanebʼ li winq li inkʼaʼ keʼxra li Yos. —Hechos 2:23

Aʼan kixmayeja ribʼ saʼ qakʼabʼaʼ. —1 Timoteo 2:6

39 Li Jesus kimuqeʼk saʼ jun ochoch pek malaj muqlebʼaal jobʼenbʼil. Kiwank chi kamenaq oxibʼ kutan. Tojoʼ naq li Yos kixwaklesi wiʼ chik chi yoʼyo.—Hechos 2:24

40 Aʼan kisutqʼiik saʼ choxa. Anaqwan naru xpatzʼbʼal re li Yos xtenqʼaalebʼ li nekeʼpaabʼank re li Yos. —Hebreos 9:24; 1 Juan 2:1, 2