Tzolom 1

Chanru Taanaw Kʼaru Naxpatzʼ Qe li Yos

Kʼaru chaabʼil naʼlebʼ naqataw saʼ li Santil Hu? (1)

Ani aj kʼaʼuxl wank saʼ li Santil Hu? (2)

Kʼaʼut tento naq taatzol li naxye li Santil Hu? (3)

1. Li Santil Hu aʼan jun chaabʼil maatan li naxkʼe qe li Yos. Chanchan jun li esil hu li naxtzʼiibʼa jun li chaabʼil yuwaʼbʼej choʼq rehebʼ li ralal xkʼajol. Naxye qe li yaal chirix li Yos ut naʼaatinak chirix li xchaqʼrabʼ. Joʼkan ajwiʼ naxchʼolobʼ chiqu chanru xtuqubʼankil ru qachʼaʼajkilal ut chanru tqataw li sahil chʼoolejil. Kaʼajwiʼ li Santil Hu naxye qe chanru tqasahobʼresi xchʼool li Yos (Salmo 1:1-3; Isaías 48:17, 18).

2. Chalen chaq li chihabʼ 1513, saʼ xkutankil laj Moises, keʼxtikibʼ chaq xtzʼiibʼankil li Santil Hu ut keʼtzʼiibʼank chaq re kaʼkʼaal tana chi winq chiru 1600 chihabʼ. Li Santil Hu kʼuubʼanbʼil rikʼin 66 chi kokʼ tasal hu. Ebʼ li keʼtzʼiibʼank chaq re, keʼmusiqʼaak chaq xbʼaan li Yos re naq teʼxtzʼiibʼa li xkʼaʼuxl. Joʼkan naq usta winq keʼtzʼiibʼank chaq re, moko xkʼaʼuxebʼ ta wank chisaʼ, re bʼan li Yos li wank saʼ choxa (2 Timoteo 3:16, 17; 2 Pedro 1:20, 21).

3. Naq xeʼxtzʼiibʼa chaq wiʼ chik reetalil li Santil Hu, li Yos kixkʼe xchʼool chi rilbʼal naq inkʼaʼ tjalmanq li wank chisaʼ ut re naq inkʼaʼ tsachq. Naabʼal reetalil li Santil Hu ak xpuktesimank chiru jalan chik tasal hu. Moko chixjunilebʼ ta teʼsahoʼq saʼ xchʼool aawikʼin naq yooqat xtzolbʼal li naxkʼut li Santil Hu. Abʼan maakanabʼ tzolok usta inkʼaʼ sa taateʼril, xbʼaan naq naru twanq aayuʼam chi junelik wi nakaanaw ru li Yos ut wi nakaabʼaanu li naraj (Mateo 5:10-12; Juan 17:3).