Li Naʼlebʼ li Wank saʼ li Santil Hu

Li Yos kixyoobʼtesi laj Adan ut xʼEva ut kiraj naq teʼwanq chi junelik saʼ li Chʼinaʼusil Naʼajej arin saʼ Ruuchichʼochʼ. Laj Tza kixmaajewa li xkʼabʼaʼ li Jehobʼa ut kixye naq maakʼaʼ xkʼulubʼ chi awabʼejink. Laj Adan ut xʼEva keʼxjunaji ribʼebʼ rikʼin laj Tza. Chi joʼkan keʼxtenebʼ li maak ut li kamk saʼ xbʼeenebʼ li poyanam

Li Jehobʼa kixye kʼaru teʼxkʼul ebʼ laj qʼetol aatin ut kixye naq jun li Alalbʼej tixsach laj Tza ut trisi chixjunil li rahilal li kixkanabʼ li maak

Li Yos kixye re laj Abrahan ut laj David naq aʼanaqebʼ xxeʼtoonil li Alalbʼej malaj li Sikʼbʼil Ru li t-awabʼejinq chi junelik

Li Jehobʼa kiroksi ebʼ laj kʼanjel chiru re xyeebʼal naq li Sikʼbʼil Ru trisi li maak ut li kamk ut twanq choʼq Awabʼej saʼ li Xʼawabʼejilal li Yos. Ut jun chʼuut chi poyanam t-awabʼejinq rochbʼeen re risinkil li yalok u, li yajel ut li kamk

Li Jehobʼa kixye naq li Jesus aʼan li Sikʼbʼil Ru. Ut kixtaqla saʼ Ruuchichʼochʼ re xpuktesinkil li Xʼawabʼejilal li Yos ut tixqʼaxtesi xyuʼam saʼ qakʼabʼaʼ. Naq kikamk, li Jehobʼa kixqʼaxtesi wiʼ chik xyuʼam saʼ musiqʼej

Li Yos kixxaqabʼ li Jesus choʼq Awabʼej saʼ choxa ut kitiklaak chaq li rosoʼjik. Li Jesus aj ilol re li puktesink chirix li Xʼawabʼejilal li Yos li nabʼaanumank saʼ xbʼeen li ruuchichʼochʼ

Li Jehobʼa kixye re li Ralal naq t-oq chi awabʼejink saʼ Ruuchichʼochʼ. Li Xʼawabʼejilal tixsach ebʼ li awabʼej, tixchʼinaʼusa wiʼ chik li Ruuchichʼochʼ ut trisi li maak saʼ xbʼeenebʼ li tiikebʼ xchʼool. Maaʼani chik tweechʼinq re xkʼulubʼ li Jehobʼa chi awabʼejink, ut li xkʼabʼaʼ santaq ut saqaq ru chi junelik