1 Kʼaʼut us naq tootijoq?
LI TIJOK. Naabʼalebʼ li kristiʼaan nekeʼraj xnawbʼal kʼaru naxye li Santil Hu chirix li tijok. Saʼ li tzolom aʼin tooʼaatinaq chirix wuqubʼ li patzʼom li nabʼaanumank chirix li tijok ut kʼaru naxye li Santil Hu chirix aʼin. Ebʼ li tzolom aʼin tatxtenqʼa re naq taatikibʼ tijok chiru li Jehobʼa. Wi ak nakaabʼaanu tateʼxtenqʼa ajwiʼ re naq chʼolchʼooq chaawu naq li Yos trabʼi laatij.
SAʼ CHIXJUNIL li ruuchichʼochʼ maakʼaʼ naxye li xwanjikebʼ malaj li xpaabʼal chixjunilebʼ nekeʼtijok. Nekeʼtijok saʼebʼ li iklees, li ochoch li nekeʼroksi re loqʼonink ut nekeʼroksi jalan jalanq li naʼlebʼ naq nekeʼtijok chiru li Yos. Maakʼaʼ naxye ma wankebʼ xjunes malaj saʼ chʼuutal chixjunilebʼ nekeʼtijok.
Li tijok naxbʼaanu naq ebʼ li kristiʼaan jalanaqebʼ chiru ebʼ li junchʼol chik chi yobʼtesihom. Abʼan wank qajuntaqʼeetalil rikʼinebʼ li xul. Joʼebʼ aʼan naqaj li tzekemq, iqʼ ut haʼ. Ut ajwiʼ nokooyoʼlaak, nawank qayuʼam ut nokookamk (Eclesiastés 3:19). Abʼan, kʼaʼut naq kaʼajwiʼ ebʼ li kristiʼaan nekeʼtijok?
Xbʼaan naq naʼajmank chiqu. Naabʼalebʼ nekeʼtijok chiru li yos li nekeʼxloqʼoni ru. Joʼ naxye saʼ li Santil Hu ak qe naq naqaj xbʼaanunkil aʼin (Eclesiastés 3:11). Li Jesús naxye: «Sahebʼ saʼ xchʼool li nekeʼxkʼe reetal naq naʼajmank li Yos saʼebʼ li xyuʼam» (Mateo 5:3, La Biblia. Traducción del Nuevo Mundo, TNM, 2019 saʼ español).
Chiqajunilo naqaj li Yos saʼ li qayuʼam. Joʼkan naq wank naabʼal li paabʼal ut ebʼ li naʼaj bʼarwiʼ ebʼ li kristiʼaan nekeʼxloqʼoni ru ut nekeʼtijok chiruhebʼ li xyos. Wankebʼ chik nekeʼrekʼa naq wank kʼaru naʼajmank saʼebʼ li xyuʼam joʼkan naq nekeʼxsikʼ xtenqʼ rikʼin li rechkristiʼaanil. Ma yaal naq wankebʼ li kristiʼaan nekeʼxye naq moko naʼajmank ta li Yos saʼebʼ li xyuʼam? Chiqajunilo wank naabʼal li inkʼaʼ naru naqabʼaanu, yal numel li qayuʼam ut wank naabʼal li naʼlebʼ inkʼaʼ naqataw ru. Naʼajmank naq wank ani ttenqʼanq qe. Naʼajmank junaq li wank xnaʼlebʼ, kaw ribʼ ut maajunwa nakamk. Abʼan kʼaru li tenqʼ naʼajmank?
Jun eetalil, naq xaanumsi junaq li chʼaʼajkilal maare naʼajmank naq ani tbʼeresinq aawe, tixkʼe aanaʼlebʼ ut tixsume laapatzʼom. Naq nakaawaj xbʼaanunkil junaq li naʼlebʼ saʼ laayuʼam, nakamk junaq laakomon malaj laawamiiw, ma nakaakʼoxla naq moko natzʼaqlok ta xkʼojobʼankil laachʼool rikʼin li naʼlebʼ nekeʼxkʼe aawe?
Abʼanan li Santil Hu naxye naq li tijok naru nokooxtenqʼa re xqʼaxbʼal ru li chʼaʼajkilal aʼin. Natawmank ajwiʼ li xtij ebʼ laj kʼanjel chiru li Yos bʼarwiʼ xeʼxpatzʼ xkʼojobʼankil xchʼool, xtenqʼankil ut naq teʼkuyeʼq xmaak. Joʼ ajwiʼ xeʼxtaw xsumenkil li xninqal ru patzʼom (Salmo 23:3; 71:21; Daniel 9:4, 5, 19; Habacuc 1:3).
Chixjunil aʼin wank xjuntaqʼeetalil xbʼaan naq chʼolchʼo chiruhebʼ chiru ani yookebʼ chi tijok.