3 Chanru tootijoq?

NAABʼALEBʼ li paabʼal nekeʼxkʼut chanru tqakʼe qibʼ naq tootijoq ut xsikʼbʼal chiʼus ebʼ li aatin li tqaye. Abʼan li Santil Hu nokooxtenqʼa re rilbʼal li kʼaru wank xwankil naq tootijoq.

Li Santil Hu naxye chanru naq ebʼ li xmoos li Yos nekeʼtijok chiru saʼ jalan jalanq li naʼajej ut naru nekeʼkanaak chi wiqʼwo malaj nekeʼxxaqabʼ ribʼ naq nekeʼtijok. Wankebʼ xeʼtijok saʼ xchʼoolebʼ ut wankebʼ saʼ kawil kuxej. Wankebʼ naq nekeʼtijok nekeʼxtaqsi li rilobʼaal ut junchʼol chik nekeʼxxulubʼ li xjolom. Maajunwa xeʼroksi li jalam u, li rosaar malaj junaq li hu. Xeʼxye bʼan kʼaru wank saʼebʼ li xchʼool. Kʼaʼut naq li Jehobʼa kirabʼi li xtijebʼ?

Joʼ ak xqatzol kaʼajwiʼ chiru li Jehobʼa nekeʼtijok. Abʼan naqataw jun chik li xyaalal saʼ 1 Juan 5:14, SBG: «Aʼin wan wiʼ xkawubʼ qachʼool rikʼin li Yos: naq Aʼan nokoorabʼi wi wank kʼaru tqatzʼaama chiru joʼ chanru naraj Aʼan». Joʼkan naq, li qatij tento tixchap ribʼ rikʼin li rajom. Kʼaru naraj xyeebʼal aʼin?

Tento tqanaw kʼaru li rajom li Yos. Aajel ru naq tqatzol li Raatin. Abʼan li Jehobʼa moko naroybʼeni ta naq tqanaw chixjunil li wank chisaʼ. Naraj bʼan naq tqanaw kʼaru li rajom ut tqayuʼami (Mateo 7:​21-23). Li naqatzol saʼ li Santil Hu tento naq tixchap ribʼ rikʼin li qatij.

Naq naqanaw ru li Jehobʼa ut li rajom nakawuuk li qapaabʼal. Aʼin jun chik li xyaalal re naq li Yos toorabʼi, li Jesús kixye: «Chixjunil li kʼaru teetzʼaama saʼ li tijok chi anchal eepaabʼaal, teekʼul» (Mateo 21:22, SBG). Usta wank qapaabʼal moko naraj ta xyeebʼal naq maakʼaʼ xxeʼil, wank bʼan xyaalal kʼaʼut naqapaabʼ li inkʼaʼ naqil (Hebreos 11:1). Yaal naq inkʼaʼ naqil ru li Jehobʼa abʼan saʼ li Santil Hu wank naabʼal li naʼlebʼ li naxkʼut naq wank, naq paabʼajel ut naq naxsume li xtij li wankebʼ xpaabʼal. Li Jehobʼa moko napoʼk ta qikʼin naq naqapatzʼ re xtzʼaqobʼ li qapaabʼal. Nasahoʼk bʼan saʼ xchʼool chi xkʼebʼal qe (Lucas 17:5; Santiago 1:17).

Wank jun chik xyaalal re naq li Yos toorabʼi. Li Jesús kixye: «Maaʼani naxik rikʼin li Yuwaʼbʼej, wi inkʼaʼ ta saʼ inkʼabʼaʼ» (Juan 14:6, SBG). Joʼkan naq kaʼajwiʼ saʼ xkʼabʼaʼ li Jesús naru nokoonachʼok chixkʼatq li Jehobʼa. Joʼkan peʼ naq li Jesús kixkʼut chiruhebʼ li xtzolom naq teʼtijoq saʼ xkʼabʼaʼ! (Juan 14:13; 15:16). Tijok saʼ xkʼabʼaʼ li Jesús moko naraj ta xyeebʼal tijok chiru. Naraj bʼan xyeebʼal naq saʼ xkʼabʼaʼ naru nokootijok chiru li Jehobʼa, li qʼaxal saant.

Saʼ jun kutan jun li xtzolom li Jesús kixye re: «Qaawaʼ, tzolo chi tijok» (Lucas 11:1, SBG). Kʼaru keʼraj xyeebʼal? Kutan saqenk naq ak nekeʼxnaw tijok. Li keʼxpatzʼ re aʼan naq teʼkʼuteʼq chiru kʼaru tento teʼxpatzʼ saʼebʼ li xtij ut chirix kʼaru teʼtijoq.