7 Ma trabʼi li qatij li Yos?
NAABʼALEBʼ nekeʼraj xnawbʼal ma relik chi yaal naq li Jehobʼa narabʼi ut naxsume li qatij. Ak xqil naq li Yos moko narabʼi ta chixjunil ebʼ li tij. Laaʼo bʼan yaal qe ma trabʼi li qatij li Yos.
Li Jesús kixwechʼ rix ebʼ laj kʼamolbʼe saʼebʼ li paabʼal li wankebʼ chaq saʼ xkutan: kixye rehebʼ naq aʼanebʼ aj kaʼpakʼal u ut nekeʼtijok kaʼajwiʼ re naq teʼileʼq xbʼaanebʼ li kristiʼaan. Joʼkan naq kixye rehebʼ naq «ak xeʼxkʼul li xqʼajkamunkilebʼ». Ebʼ li kristiʼaan aʼin moko nekeʼraj ta naq li Yos trabʼi li xtijebʼ nekeʼraj bʼan naq teʼileʼq xbʼaanebʼ li junchʼol (Mateo 6:5, SBG). Joʼkan ajwiʼ nakʼulmank saʼebʼ li qakutan. Naabʼal nekeʼtijok kaʼajwiʼ chirix li kʼaru nekeʼraj ut moko nekeʼxkʼe ta saʼ ajl li Yos. Ut xbʼaan naq moko naxchap ta ribʼ rikʼin li naʼlebʼ li naxkʼe li Santil Hu inkʼaʼ narabʼihebʼ li xtij.
Ut ma narabʼi tawiʼ li qatij? Re xsumenkil li qatij li Jehobʼa moko naxkʼe ta reetal li qabʼonol, li qatenamit malaj li qawanjik. Li Santil Hu naxye: «Li Yos juntaqʼeet narilebʼ chixjunil ut sa naxkʼul chixjunilebʼ li nekeʼpaabʼank re ut nekeʼxbʼaanu li tiikilal, aʼ yaal kʼaʼ chi tenamitul yoʼlajenaqebʼ wiʼ» (Hechos 10:34, 35, SBG). Joʼkan naq li kristiʼaan li naxpaabʼ li Yos chi anchal xchʼool moko naxbʼaanu ta junaq li naʼlebʼ li inkʼaʼ nawulak chiru. Ut li naxbʼaanu «li tiikilal» naxyal xqʼe chi xbʼaanunkil li nawulak chiru li Yos ut maawaʼ li kʼaru nawulak chiru aʼan malaj li kʼaru nekeʼxkʼoxla ebʼ li junchʼol. Joʼkan bʼiʼ wi naqaj naq li Jehobʼa tixsume li qatij tento tqayuʼami li naxye li Santil Hu.a
Naabʼalebʼ nekeʼxkʼoxla naq li Yos tixsume li xtijebʼ rikʼin junaq li sachbʼachʼoolej. Abʼanan junxil moko junelik ta naxsume ebʼ li tij chi joʼkan. Li eetalil li wank saʼ li Santil Hu naxkʼut naq wank sut ak nanumeʼk naabʼal chihabʼ naq naxsume junaq li tij rikʼin junaq li sachbʼachʼoolej. Li Santil Hu naxye ajwiʼ naq ebʼ li sachbʼachʼoolej traqeʼq naq ak xeʼkamk chik ebʼ li apóstol (1 Corintios 13:8-10). Abʼan aʼin moko naraj ta xyeebʼal naq li Yos inkʼaʼ naxsume li qatij. Qatzʼilaq wiibʼ oxibʼ li eetalil bʼarwiʼ naxkʼut naq li Jehobʼa naxsume ebʼ li qatij.
Naxkʼe choxahil naʼlebʼ. Chixjunil li choxahil naʼlebʼ chalenaq rikʼin li Jehobʼa ut naxkʼe chi anchal xchʼool choʼq rehebʼ li nekeʼxsikʼ xtenqʼ ut li nekeʼxyal xqʼe chi xpaabʼankil (Santiago 1:5).
Naxkʼe xsantil musiqʼej. Li santil musiqʼej aʼan xmetzʼew li Yos ut maakʼaʼ chik kʼaru qʼaxal wank metzʼew chiru aʼan. Nokooxtenqʼa re xqʼaxbʼal ru ebʼ li chʼaʼajkilal, naxkʼe xtuqtuukilal qachʼool ut naxbʼaanu naq tqayuʼami ebʼ li chaabʼil naʼlebʼ (Gálatas 5:22, 23). Li Jesús kixye naq li Yos tixkʼe qe li xsantil musiqʼej chi anchal xchʼool naq t-ajmanq chiqu (Lucas 11:13).
Naxkʼe xnaʼlebʼ li nekeʼxsikʼ li yaal. Joʼ naxye saʼ Hechos 17:26, 27 naabʼalebʼ li qas qiitzʼin yookebʼ xsikʼbʼal li Yos. Nekeʼraj xnawbʼal li xkʼabʼaʼ, li rajom choʼq re li Ruuchichʼochʼ, choʼq re li kristiʼaan ut kʼaru teʼxbʼaanu re jilok chixkʼatq (Santiago 4:8). Ebʼ laj Testiiw nekeʼxtaw li kristiʼaan li nekeʼnaʼlebʼak chi joʼkan ut chi anchalebʼ xchʼool nekeʼxsume ebʼ li xpatzʼom rikʼin li Santil Hu.
Ma aʼin aj e naq xaakʼulubʼa li hu aʼin? Ma yookat xsikʼbʼal li Yos? Wi joʼkan, maare aʼin xsumenkil laatij.