Ma wank ani kiyobʼtesink re li Yos?

Jun li yuwaʼbʼej naxye re li ralal li wank wuqubʼ chihabʼ re: «Junxil chaq li Yos kixyiibʼ li Ruuchichʼochʼ ut chixjunil li naqil. Kixyiibʼ ajwiʼ li Saqʼe, li Po ut ebʼ li chahim». Li chʼinaʼal naʼok chi kʼoxlak tojaʼ naq naxye: «Papá... ma wank ani kiyobʼtesink re li Yos?».

«Inkʼaʼ, chan li yuwaʼbʼej. Li Yos junelik xwank chaq». Saʼ li hoonal aʼan nakʼojlaak xchʼool li chʼinaʼal naq narabʼi aʼin. Abʼanan, naq yook chi kʼiik toj naxkʼoxla rix li patzʼom aʼan. Nachʼaʼajkoʼk chiru xtawbʼal ru naq maaʼani kiyobʼtesink re li Yos. Naxkʼoxla: «Chan put ru aʼin? Chixjunil kiyobʼtesiik. Kiyobʼtesiik li choxa ut li Ruuchichʼochʼ». Joʼkan naq: Bʼar chalenaq li Yos?

Kʼaru naxye li Santil Hu chirix aʼin? Juntaqʼeet rikʼin li kixye li yuwaʼbʼej. Laj Moisés kixye re li Jehobʼa: «Naq toj maakʼaʼebʼ chaq li tzuul ut toj majiʼ nakʼubʼlaak saʼ xnaʼaj li choxachʼochʼ, ak laaʼat ajwiʼ chaq li qaYos junqʼe junqʼe kutan!» (Salmo 90:1, 2, Li Santil Hu, Sociedad Bíblica de Guatemala, SBG). Li propeet Isaías kixye ajwiʼ aʼin: «Ma inkʼaʼ nakanaw laaʼat? Ma inkʼaʼ aawabʼihom resil? Li Qaawaʼ aʼan li Yos wank chi junelik; Aʼan kixaqabʼank re li xnubʼajlil li ruuchichʼochʼ» (Isaías 40:28, SBG). Ut li hu li kixtzʼiibʼa chaq laj Judas naxye naq «chalen chaq junxil» ak wank chaq li Yos (Judas 25, SBG).

Ebʼ li raqal aʼin naxkʼutbʼesi naq li Yos aʼan «li Rey li wank xwankil chi junelik qʼe kutan» joʼ kixye li apóstol Pablo (1 Timoteo 1:17, SBG). Aʼin naraj xyeebʼal naq maakʼaʼ naxye chirix kʼaru qʼehil tooʼaatinaq li Yos junelik wank ut junelik wanq (Apocalipsis 1:8). Li xyuʼam li Yos maakʼaʼ xtiklajik ut xraqik, aʼan aʼin xjalanil li xwanjik.

Kʼaʼut nachʼaʼajkoʼk chiqu xtawbʼal ru aʼin? Xbʼaan naq moko najt ta roq li qayuʼam ut moko naqil ta li kutan joʼ naril li Jehobʼa. Jun eetalil, choʼq re li Yos jun mil chihabʼ aʼan joʼ jun kutan, xbʼaan naq junelik nawank (2 Pedro 3:8). Qilaq jun eetalil, li xyuʼam jun li saakʼ aʼan 50 kutan. Ma tixtaw raj ru naq laaʼo yoʼyooko chiru 70 malaj 80 chihabʼ? Maajoqʼe bʼiʼan! Joʼkano ajwiʼ laaʼo naq naqajuntaqʼeeta qibʼ rikʼin li Yos. Moko hoon ta naqajuntaqʼeeta qanaʼlebʼ rikʼin li xnaʼlebʼ li Yos (Isaías 40:22; 55:8, 9). Joʼkan naq moko tooruuq ta xtawbʼal ru chixjunil li xwanjik li Yos.

Wank xyaalal li naʼlebʼ aʼin usta tchʼaʼajkoʼq chiqu xtawbʼal ru naq li Yos junelik kiwank chaq. Li kristiʼaan li kiyobʼtesink raj re li Yos aʼan kikanaak raj choʼq aj Yobʼtesinel. Abʼan li Santil Hu naxye naq li Yos kiyobʼtesink re chixjunil (Apocalipsis 4:11). Laaʼo ajwiʼ naqanaw naq kiwank jun qʼehil bʼarwiʼ maakʼaʼ li choxachʼochʼ (Génesis 1:1, 2). Ani kiyiibʼank re? Chʼolchʼo naq ak wank chik laj Yobʼtesinel. Ak wank chaq li Yos naq toj maajiʼ nawank li Ralal ut ebʼ li ánjel (Job 38:4, 7; Colosenses 1:15). Chʼolchʼo naq li Yos wank xjunes naq toj maajiʼ naʼok chi yobʼtesink. Joʼkan naq maaʼani kiyobʼtesink re.

Chixjunil li yobʼtesihom ut li qayuʼam naxkʼutbʼesi naq wank jun li Yos li maakʼaʼ rosoʼjik. Junelik wank li kiyiibʼank re li choxachʼochʼ ut kixxaqabʼ chanru tixbʼeresi ribʼ. Kaʼajwiʼ aʼan kikʼehok re li yuʼam (Job 33:4).