Ma naqatzolebʼ chiʼus ebʼ li qas qiitzʼin chirix li Santil Hu?
1. Kʼaru tenebʼanbʼil saʼ qabʼeen joʼ aj puktesinel li naqatzolebʼ li qas qiitzʼin chirix li Santil Hu?
1 Maaʼani naru nawank choʼq aj kʼanjel chiru li Jehobʼa wi inkʼaʼ «kʼambʼil chaq» xbʼaan (Juan 6:44). Usta yaal aʼin, tenebʼanbʼil saʼ qabʼeen xtenqʼankilebʼ li qas qiitzʼin re naq teʼjiloq rikʼin li Xyuwaʼ li wank saʼ choxa (Sant. 4:8). Abʼan re xbʼaanunkil aʼin naʼajmank naq tqatzol qibʼ chiʼus. Ut chi joʼkan tooruuq xtenqʼankilebʼ chi xtawbʼal ru li yookebʼ xtzolbʼal ut chi xkawresinkilebʼ xpaabʼal xbʼaan naq moko tzʼaqal ta rikʼin xyeebʼal rehebʼ naq teʼxyaabʼasi ebʼ li raqal ut teʼxsume ebʼ li patzʼom li wank chi tzʼiibʼanbʼil.
2. Kʼaru tento xbʼaanunkil re xtzolbʼal chiʼus junaq li qas qiitzʼin chirix li Santil Hu?
2 Re xtzolbʼal chiʼus junaq li qas qiitzʼin chirix li Santil Hu tento xbʼaanunkil aʼin: 1) xtawbʼal ru chiʼus li naxkʼut li Santil Hu, 2) xpaabʼankil ut 3) xyuʼaminkil (Juan 3:16; 17:3; Sant. 2:26). Maare t-ajmanq naabʼal po re xbʼaanunkil li junjunq chi naʼlebʼ aʼin abʼan aajel ru re naq li tzolom yooq chi jilok chixkʼatq li Jehobʼa ut moqon chik tixqʼaxtesi li xyuʼam chiru.
3. Kʼaru ebʼ li patzʼom tento tqabʼaanu wi naqaj xtzolbʼal chiʼus junaq li qas qiitzʼin chirix li Santil Hu, ut kʼaʼut?
3 Kʼaru naxkʼoxla li qatzolom? Re naq tqanaw ma yook xtawbʼal ru li naxtzol ut ma naxpaabʼ li naxkʼut li Santil Hu, tento tqasikʼ chanru tqabʼaanu re naq t-aatinaq ut moko laaʼo ta tqaye re chixjunil li kʼaru tixye (Sant. 1:19). Ma naxtaw ru li tzolom li naxkʼut li Santil Hu chirix li naʼlebʼ li yook xtzolbʼal? Ma truuq xchʼolobʼankil rikʼin raatin? Kʼaru naxkʼoxla chirix li naʼlebʼ li yook xtzolbʼal? Ma naxpaabʼ naq yaal li naxye li Santil Hu? (1 Tes. 2:13.) Ma chʼolchʼo chiru naq tento tixjal xnaʼlebʼ? (Col. 3:10.) Re xnawbʼal kʼaru tzʼaqal naxkʼoxla li qatzolom, tento tqakʼoxla chiʼus kʼaru li patzʼom tqabʼaanu re naq inkʼaʼ tqakʼe saʼ xutaan ut chirix chik aʼan tqakʼe qaxik chi rabʼinkil (Mat. 16:13-16).
4. Kʼaru tqabʼaanu wi chʼaʼaj chiru li qatzolom xtawbʼal ru malaj xyuʼaminkil junaq li naʼlebʼ li naxkʼut li Santil Hu?
4 Wi ak xxeʼin saʼ li xchʼool junaq li qas qiitzʼin li xkʼaʼuxl ut li xbʼaanuhom, maare chʼaʼajkaq chiru xjalbʼal xnaʼlebʼ (2 Cor. 10:5). Kʼaru tqabʼaanu wi chʼaʼaj chiru li qatzolom xpaabʼankil ut xyuʼaminkil li yook xtzolbʼal? Tento tqoybʼeni ut tqakʼe xhoonal li qatzolom re naq li Raatin li Yos ut li santil musiqʼej t-oq xqʼuntesinkil li xchʼool (1 Cor. 3:6, 7; Heb. 4:12). Wi chʼaʼaj chiru xtawbʼal ru malaj xyuʼaminkil junaq li naʼlebʼ li naxkʼut li Santil Hu, maare us raj naq tqil junaq chik li tzolom. Wi inkʼaʼ nokoolubʼk chi xtzolbʼal ut inkʼaʼ tqakanabʼ xraabʼal, maare timil timil t-oq xjalbʼal xnaʼlebʼ.