Re xnawbʼal

◼ Saʼ Junio: Kʼaru Tzʼaqal Naxchʼolobʼ li Santil Hu? malaj ebʼ li tratado: Ani tzʼaqal najolomink re li ruuchichʼochʼ?, Ma teʼwanq wiʼ chik xyuʼam ebʼ li kamenaq? ut Ma twulaq xqʼehil naq tqakanabʼ xkʼulbʼal li rahilal? Saʼ Julio ut Agosto: Li Chaabʼil Esil li Nachalk Rikʼin li Yos malaj ebʼ li folleto: Chaapaabʼ li Yos re naq Twanq Aayuʼam chi Junelik malaj Chaapaabʼ li Yos ut Laajunkabʼal naru naxtaw li sahil chʼoolejil. Ut saʼ Septiembre: Naru Toowanq choʼq Ramiiw li Yos malaj ebʼ li folleto: Chaapaabʼ li Yos re naq Twanq Aayuʼam chi Junelik malaj Chaapaabʼ li Yos.

◼ Saʼ li hu bʼarwiʼ naqatzʼiibʼa li qahoonal rajlal po wank li aatin «folletos y tratados» ut rubʼel aʼan tqatzʼiibʼa chixjunil ebʼ li tratado ut ebʼ li hu li naqajekʼi chirix li xkamik li Jesus ut chirix li nimla chʼutam ut tqatzʼiibʼa ajwiʼ li tqakanabʼ saʼebʼ li ochoch li inkʼaʼ xqatawebʼ xsaʼ. Ut taakʼe aaqʼe chi rulaʼaninkilebʼ li xeʼabʼink aawe ut li xeʼxkʼul chaawu jun li hu usta yal jun li tratado.

◼ Rajlal chihabʼ, ebʼ li cheekel winq tento teʼxjultika chiru li chʼuut li naxye li esilhu 6 re Enero 2012 li naʼaatinak chirix kʼaru tento tqabʼaanu naq nachalk li kaqsut-iqʼ.

◼ Tooruuq xbʼaanunkil 30 malaj 50 hoonal chiru Agosto xbʼaan naq naxkʼam chaq oobʼ Sabado ut Domingo.

◼ Wi wiibʼ oxibʼ teʼtzʼaq puktesink bʼarwiʼ nekeʼnumeʼk naabʼal li poyanam rikʼin roksinkil li karretiiy, meex malaj junaq chik li kʼanjelobʼaal, tento teʼxtzʼiibʼa jarubʼ li hu yook chi xik ut naq traqeʼq xhoonalil li kʼanjel, teʼxjekʼi saʼ xyanqebʼ re naq chixjunqalebʼ teʼxtzʼiibʼa saʼ li hu Informe de Predicación (S-4-S).