Ma naqil li xnimal ru xnaʼlebʼ li Yos li inkʼaʼ ilbʼil ru?

Ma naqakʼoxla rix li kiyobʼtesink qe naq naqil jun li chʼinaʼusil uutzʼuʼuj, li choxa nujenaq chi chahim malaj li xkawil roq li haʼ naq napujujnak chaq chi elk saʼ xbʼeen li tzuul? Li yobʼtesihom li wank saʼ qasutam nokooxtenqʼa chi «rilbʼal» chiʼus li xnimal ru xnaʼlebʼ li Jehobʼa li inkʼaʼ ilbʼil ru (Ro 1:20). Naq naqakʼe qahoonal chi xkʼoxlankil rix li naqil, nokooruuk rilbʼal li xwankilal li Yos, li xrahom, li xnimal xnaʼlebʼ, li xtiikilal xchʼool ut li xchaabʼilal (Sl 104:24).

Kʼaru xyobʼtesihom li Jehobʼa nakaawil wulaj wulaj? Usta wankat saʼ junaq li tenamit, tatruuq rilbʼal ebʼ li xul li nekeʼrupupik malaj ebʼ li cheʼ. Wi naqakʼe qachʼool chi rilbʼal li xyobʼtesihom li Yos, naru nokooxtenqʼa re naq inkʼaʼ tnimanq li qakʼaʼuxl, xkʼebʼal saʼ xnaʼaj li qachʼaʼajkilal ut xkawresinkil li qapaabʼal chirix li Jehobʼa naq aʼan junelik tooril (Mt 6:25-32). Wi wank aakokʼal, tenqʼahebʼ chi rilbʼal li xchaqʼalil ru xnaʼlebʼ li Jehobʼa. Naq naqabʼanyoxi li kixyobʼtesi li Jehobʼa, tqekʼa naq nachʼ wanko rikʼin (Sl 8:4, 5).

NAQ AK XAAWIL LI BʼIDEO LI XCHʼINAʼUSAL LI XYOBʼTESIHOM LI YOS NAXKʼUT LI XLOQʼAL: LI SAQENK UT EBʼ LI BʼONOL, TAASUME EBʼ LI PATZʼOM AʼIN:

• Kʼaʼut nokooruuk rilbʼal ebʼ li bʼonol?

• Kʼaʼut wankebʼ li bʼonol nekeʼjalaak aʼ yaal chanru naʼilmank?

• Kʼaʼut naqil naq jalan jalanq xbʼonol li choxa?

• Kʼaru li kʼaʼaq re ru li chʼinaʼus xbʼonol ak xaawil chixkʼatq laawochoch?

• Kʼaʼut tento tqakʼe qahoonal chi rilbʼal chiʼus li wank saʼ li qasutam?